សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចុងឆ្នាំ២០២៣នេះ មានក្រុមហ៊ុនបរទេសជាច្រើនបានចាប់អារម្មណ៍លើការវិនិយោគនៅក្នុងប្រទេសកម្ពុជាទៅតាមជំនាញ និងបទពិសោធរបស់ពួកគេ ដោយក្នុងនោះដែរប្រទេសចិន និងប្រទេសក្នុងតំបន់អាស៊ាន ហាក់មានការចាប់អារម្មណ៍លើការវិនិយោគក្នុងប្រទេសកម្ពុជាច្រើនជាងប្រទេសផ្សេងៗ ជាក់ស្ដែងនៅថ្ងៃទី៦ ខែធ្នូ ឆ្នាំ២០២៣នេះ មានក្រុមហ៊ុនចំនួនបី មកពីប្រទេសចិន ថៃ និងម៉ាឡេស៊ី បានចូលជួបជជែកពិភាក្សាជាមួយឯកឧត្តម ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា ដើម្បីសិក្សាពីឱកាសវិនិយោគនៅកម្ពុជា ។
ក្រុមហ៊ុនទាំងបី ដែលបានជួបជាមួយឯកឧត្តម ស៊ុន ចាន់ថុល រួមមានក្រុមហ៊ុន Beijing Urban Construction Group និងក្រុមហ៊ុន Prime Road Power Public Co., Ltd និងក្រុមហ៊ុន Rafulin Holdings ។
ក្រុមហ៊ុនទាំងបី ដែលជួបជាមួយនឹងឯកឧត្តមឧបនាយករដ្ឋមន្ត្រីសុទ្ធសឹងតែក្រុមហ៊ុនធំៗមានប្រតិបត្តិការនៅក្រៅប្រទេស ជាក់ស្ដែងក្រុមហ៊ុន Prime Road Power Public កំពុងមានប្រតិបត្តិការនៅប្រទេសថៃ ជប៉ុន តៃវ៉ាន់ និងកម្ពុជា ។ ក្រុមហ៊ុននេះក៏មានគម្រោងពង្រីកការវិនិយោគរបស់ខ្លួននៅកម្ពុជាបន្ថែមទៀត ។
ចំណែកក្រុមហ៊ុន Rafulin Holdings sdn Bhd ជាក្រុមហ៊ុនវិនិយោគលើការសាងសង់ហេដ្ឋារចនាសម្ព័ន្ធសំខាន់ៗ នៅបណ្ដាប្រទេសផ្សេងៗ ក៏បានបង្ហាញពីគម្រោងវិនិយោគរបស់ខ្លួននៅក្នុងប្រទេសកម្ពុជាផងដែរ ដោយបច្ចុប្បន្នកម្ពុជាកំពុងត្រូវការ ការវិនិយោគលើហេដ្ឋារចនាសម្ព័ន្ធបន្ថែមដើម្បីបំពេញតម្រូវការជាក់ស្ដែង ។
ចំណែកក្រុមហ៊ុនមួយទៀតដែលបានជួបជាមួយមន្ត្រីជាន់ខ្ពស់កម្ពុជាដដែលនេះ គឺជាក្រុមហ៊ុនធំមួយរបស់ចិន Beijing Urban Construction Group ដែលមានបទពិសោធន៍ក្នុងការវិនិយោគលើហេដ្ឋារចនាសម្ព័ន្ធ ហើយក៏បានបង្ហាញពីចំណាប់អារម្មណ៍លើការវិនិយោគនៅកម្ពុជាផងដែរ ដោយបាននិងកំពុងសិក្សាពី ឱកាសវិនិយោគរបស់ខ្លួននៅកម្ពុជា ។
ឯកឧត្តម ស៊ុន ចាន់ថុល ឧបនាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា កម្ពុជាត្រូវការអភិវឌ្ឍន៍លើហេដ្ឋារចនាសម្ព័ន្ធជាច្រើនទៀត ដើម្បីជំរុញកំណើនសេដ្ឋកិច្ចក្នុងប្រទេស ដោយត្រូវអភិវឌ្ឍន៍លើស្ពាន ថ្នល់ ផ្លូវល្បឿនលឿន ផ្លូវដែកជាដើម ។
គួរបញ្ជាក់ថានៅក្នុងឆ្នាំ ២០២៣នេះ ក្រោយវិបត្តិកូវីដ១៩បានធូរស្រាលឡើងវិញ មានក្រុមហ៊ុនបរទេសជាច្រើនចូលមកកម្ពុជា ដើម្បីរកឱកាសក្នុងការដាក់ទុនវិនិយោគ មានទាំងក្រុមហ៊ុនក្នុងតំបន់អាស៊ាន តំបន់អាស៊ី និងប្រទេសជាច្រើននៅលើពិភពលោក ។ កម្ពុជាក៏រំពឹងថាពីការទទួលបានក្រុមហ៊ុនថ្មីៗបន្ថែមទៀតចូលមកបណ្ដាក់ទុនវិនិយោគបង្កើតឱកាសការងារជូនប្រជាពលរដ្ឋជំរុញកំណើនសេដ្ឋកិច្ចឱ្យកាន់តែប្រសើរឡើងបន្ថែមទៀត ៕
Account
Security
Favourite Content