សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងវិនិយោគលើការបង្កើតរោងចក្រកែច្នៃអាលុយមីញ៉ូមរបស់ក្រុមហ៊ុន ខេមបូឌាន គូណាញូអេនើជី តម្លៃ៦០លានដុល្លារនឹងត្រូវលេចវត្តមាន និងដំណើរការក្នុងពេលឆាប់ៗក្នុងខេត្តព្រះសីហនុ ខណៈក្រសួងស្ថាប័នពាក់ព័ន្ធទាំងអស់បានគាំទ្រចំពោះដំណើរការវិនិយោគនៃគម្រោងនេះ ប៉ុន្តែត្រូវធ្វើយ៉ាងណាឱ្យគម្រោងនេះមានផលប៉ះពាល់តិចតួចបំផុត ។
រដ្ឋបាលខេត្តព្រះសីហនុ កាលពីថ្ងៃទី១៩ ខែសីហា ឆ្នាំ២០២៥ បានឱ្យដឹងថា គម្រោងបង្កើតរោងចក្រកែច្នៃអាលុយមីញ៉ូមរបស់ក្រុមហ៊ុន ខេមបូឌាន គូណា ញូអេនើជី ឯ.ក នេះ មានទុនវិនិយោគប្រមាណ ៦០ លានដុល្លាអាម៉េរិក និងមានទីតាំងស្ថិតក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ។ រោងចក្រនេះ នឹងធ្វើការកែច្នៃដុំអាលុយមីញ៉ូមពាក់កណ្តាលសម្រេច (Aluminum Ingot) ដើម្បីកែច្នៃជាបន្ទះអាលុយមីញ៉ូម និងគ្រឿងបង្គុំអាលុយមីញ៉ូមសម្រាប់នាំចេញទៅទីផ្សារអាស៊ាន និងសហរដ្ឋអាម៉េរិក ។
លោក ឡុង ឌីម៉ង់ អភិបាលរងខេត្តព្រះសីហនុ បានបញ្ជាក់ក្នុងកិច្ចប្រជុំអន្តរក្រសួងស្តីពីការពិនិត្យ និងផ្តល់យោបល់លើរបាយការណ៍សិក្សាវាយតម្លៃហេតុប៉ះពាល់បរិស្ថានពេញលេញលើគម្រោងបង្កើតរោងចក្រកែច្នៃអាលុយមីញ៉ូមនេះបានឱ្យដឹងថា ការអនុវត្តគម្រោងនេះត្រូវបានរំពឹងថានឹងផ្ដល់ជាប្រយោជន៍សំខាន់ៗនៅដំណាក់កាលសាងសង់ និងដំណាក់កាលអនុវត្តដូចជា៖ ការបង្កើតការងារជូនប្រជាពលរដ្ឋ, ការពង្រឹងជំនាញបច្ចេកទេសរបស់បុគ្គលិក-កម្មករ, ការបង្កបរិយាកាសវិជ្ជមានសម្រាប់វិនិយោគិន ស្របពេលជាមួយនឹងការពង្រឹងសេដ្ឋកិច្ចមូលដ្ឋានក្នុងខេត្ត ។
ក្នុងឱកាសនេះ លោក ឡុង ឌីម៉ង់ បានណែនាំឱ្យម្ចាស់គម្រោងត្រូវធ្វើយ៉ាងណាគ្រប់គ្រង និងកាត់បន្ថយការប៉ះពាល់បរិស្ថានមកនៅត្រឹមកម្រិតអប្បបរមា ត្រូវយកចិត្តទុកដាក់ខ្ពស់លើការគ្រប់គ្រងហានិភ័យដែលអាចកើតមាន រឹតបន្តឹងលើបទបញ្ជាផ្ទៃក្នុងពាក់ព័ន្ធនឹងកិច្ចការពារសុវត្ថិភាព និងសុខភាពបុគ្គលិក ក៏ដូចជាកម្មករ និងជុំវិញរោងចក្រឱ្យប្រើប្រាស់ធនធានទាំងអស់ដែលមាននៅក្នុងខេត្ត ក៏ដូចជាយកអ្នកបច្ចេកទេស និងកម្លាំងពលកម្មក្នុងស្រុកមកប្រើប្រាស់ឱ្យអស់លទ្ធភាព ពិនិត្យលទ្ធភាពពង្រីកគម្រោងឱ្យកាន់តែធំជាងនេះ។ ដោយឡែក ក្រុមហ៊ុនប្រឹក្សាយោបល់ត្រូវប្រមូលយកធាតុចូលដែលបានលើកឡើងដោយអង្គប្រជុំដាក់ចូលក្នុងរបាយការណ៍ឱ្យបានត្រឹមត្រូវ និងមានសង្គតិភាព។
ជាលទ្ធផល ស្របជាមួយនឹងការគាំទ្រចំពោះគម្រោងនេះ តំណាងក្រសួង ស្ថាប័ន និងនាយកដ្ឋានទាំងអស់បានចូលរួមមតិយោបល់ និងវិធានការការពារទៅតាមជំនាញរៀងៗខ្លួន ធ្វើយ៉ាងណាឱ្យគម្រោងអាចដំណើរការទៅមុខ និងមានផលប៉ះពាល់តិចតួចបំផុត។
គួររម្លឹកថា យោងតាមផែនការរបស់រាជរដ្ឋាភិបាលកម្ពុជា បានកំណត់យកខេត្តព្រះសីហនុជាតំបន់សេដ្ឋកិច្ចគំរូពហុបំណង ដោយក្នុងការផែនមេរបស់លេខាធិការដ្ឋាននៃក្រុមការងារជំរុញការវិនិយោគខេត្តព្រះសីហនុ នឹងទាក់ទាញគម្រោងវិនិយោគក្នុងទឹកប្រាក់ឱ្យបាន២០ពាន់លានដុល្លារអាមេរិក ក្នុងរយៈពេល១៥ឆ្នាំខាងមុខ ហើយរាជរដ្ឋាភិបាលក៏បានដាក់ចេញនូវកម្មវិធីពិសេសជំរុញការវិនិយោគខេត្តព្រះសីហនុ និងបានអនុគ្រោះ ដល់ការវិនិយោគនានាក្នុងខេត្តមួយនេះ ៕
Account
Security
Favourite Content