សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមហ៊ុនយក្សមួយរបស់អាម៉េរិក គ្រោងបោះទុនវិនិយោគប្រមាណ ៣០០លានដុល្លារអាម៉េរិក ដើម្បីបង្កើតតំបន់សេដ្ឋកិច្ចពិសេសមួយកន្លែងនៅខេត្តជាប់ទន្លេមេគង្គនៃប្រទេសកម្ពុជា។ នេះបើតាមការអះអាងរបស់មន្រ្តីជាន់ខ្ពស់នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។
ឯកឧត្តម ហេង សុខគង់ អ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា ទន្លេមេគង្គកម្ពុជា នឹងក្លាយជាផ្លូវដឹកជញ្ជូនទំនិញពាណិជ្ជកម្មដ៏សំខាន់ ក្នុងការតភ្ជាប់ទៅសមុទ្រតាមរយៈព្រែកជីកហ៊្វូណនតេជោ ដែលធ្វើឲ្យក្រុមហ៊ុនយក្សមួយរបស់អាម៉េរិកចាប់អាម្មណ៍បង្កើតតំបន់សេដ្ឋកិច្ចពិសេសនៅក្បែរទន្លេមេគង្គ ព្រោះវាអាចផ្ដល់ភាពងាយស្រួល ចំណេញពេលវេលា និងថ្លៃដឹកជញ្ជូនទំនិញរបស់ពួកគេ។
មិនទាន់បង្ហាញឈ្មោះក្រុមហ៊ុនយក្សអាម៉េរិក និងទីតាំងជាក់លាក់នៅឡើយទេ។ ប៉ុន្តែ អ្នកនាំពាក្យរូបនេះ បានបញ្ជាក់ថា ជាជំហ៊ានដំបូងក្រុមហ៊ុននេះនឹងសាងសង់លើផ្ទៃដីប្រមាណ ១០០ហិកតា ជាមួយដើមទុនវិយោគសរុបជាង ២៩៧លានដុល្លារ ដោយផ្ដោតសំខាន់លើប្រភេទឧស្សាហកម្មកែច្នៃ និងគ្រឿងសង្ហារឹម។
ឯកឧត្តមបញ្ជាក់បន្ថែមថា ៖
«តាមរយៈផែនការដែលក្រុមហ៊ុនមានបំណងបណ្ដាក់ទុននេះ គឺនឹងធ្វើនៅលើផ្ទៃជិត ១០០ហិកតា ក្នុងដើមទុនវិនិយោគ ២៩៧,៦លានដុល្លារ។ ជំហានដំបូង ក្រុមហ៊ុនអាចគិតគូរទៅលើប្រភេទឧស្សាហកម្មកែច្នៃ និងគ្រឿងសង្ហារឹម។ ជាជំហានបន្ទាប់ ក្រុមហ៊ុននឹងពង្រីកខ្លួនឈានទៅរកឧស្សាហកម្មធន់ធ្ងន់ និងឧស្សាហកម្មប្រើប្រាស់បច្ចេកវិទ្យាបន្ថែមទៀត»។
អ្នកនាំពាក្យដដែលរូបនេះ យល់ឃើញថា គម្រោងវិនិយោគរបស់ក្រុមហ៊ុនអាម៉េរិកនេះនឹងជួយបើកផ្លូវ ក៏ដូចជាបង្កើនការទុកចិត្តដល់អ្នកវិនិយោគិនបរទេសផ្សេងទៀតឱ្យមកបណ្ដាក់ទុនកាន់តែច្រើនថែមទៀតនៅកម្ពុជា ខណៈដែលបច្ចុប្បន្ន កម្ពុជាមានតំបន់សេដ្ឋកិច្ចពិសេសចំនួន ៤៦ទីតាំង ប៉ុន្តែកំពុងមានដំណើរការត្រឹមតែ ២៦ទីតាំងប៉ុណ្ណោះ និងបានផ្តល់ឱកាសការងារជាង ១៨ម៉ឺននាក់៕
Account
Security
Favourite Content