ភ្នំពេញ៖ ធនាគារអភិវឌ្ឍន៍អាស៊ី (ADB) នៅថ្ងៃទី៣ ខែធ្នូ ឆ្នាំ២០២៤ បានអនុម័តគម្រោងចំនួនពីរ ដែលមានកម្ចី និងជំនួយឥតសំណងចំនួន ១៧៣លានដុល្លារ ដើម្បីពន្លឿនការគ្រប់គ្រងធនធានទឹក សម្របទៅនឹងអាកាសធាតុនៅកម្ពុជា។

ធនាគារអភិវឌ្ឍន៍អាស៊ី បានឱ្យដឹងថា គម្រោង​ទី​១ គឺ​គម្រោង​គ្រប់​គ្រង​ធនធាន​ទឹក​ចម្រុះ​ដែល​មាន​ទឹក​ប្រាក់ ៨៨​លាន​ដុល្លារ​អាមេរិក ស្ថិត​នៅ​ក្នុង​គម្រោង​គ្រប់​គ្រង​ធនធានទឹក​រួម ដែល​ផ្តោត​លើ​អាង​ទន្លេ​ក្នុង​ខេត្ត​បាត់ដំបង និង​ខេត្ត​ពោធិ៍សាត់ ក្នុង​អាង​ទន្លេសាប។ គម្រោងនេះនឹងពង្រឹងការគ្រប់គ្រងធនធានទឹក សម្របតាមអាកាសធាតុ និងបរិស្ថាន ធ្វើទំនើបកម្មប្រព័ន្ធធារាសាស្ត្រ និងកាត់បន្ថយហានិភ័យទឹកជំនន់។

ទឹក​ប្រាក់​នេះ​ក៏​បូក​រួម​ទាំង​ជំនួយឥតសំណងចំនួន ៤.៣លានដុល្លារអាមេរិក ពីមូលនិធិអភិវឌ្ឍន៍អាស៊ី ដែលផ្តល់ជំនួយដល់ប្រទេសដែលងាយរងគ្រោះ ដើម្បីបង្កើនសមត្ថភាពរបស់សហគមន៍ក្នុងការគ្រប់គ្រងទឹក ដែលធន់នឹងអាកាសធាតុ។

ADB នឹងគ្រប់គ្រងផ្នែកខ្លះនៃប្រាក់កម្ចីចំនួន៨០ លានដុល្លារជាសហហិរញ្ញប្បទានដោយធនាគារវិនិយោគហេដ្ឋារចនាសម្ព័ន្ធអាស៊ី។ គម្រោងនេះក៏នឹងលើកកម្ពស់ការគ្រប់គ្រងទឹក ប្រព័ន្ធធារាសាស្រ្តកាត់បន្ថយអាកាសធាតុ តាមរយៈជំនួយបច្ចេកទេស ដែលបានភ្ជាប់មកជាមួយផ្តល់ហិរញ្ញប្បទានដោយមូលនិធិជប៉ុនសម្រាប់ភាពរុងរឿង និងធន់នឹងអាស៊ី-ប៉ាស៊ីហ្វិក។

គម្រោងទី២ គឺជាហិរញ្ញប្បទានបន្ថែមចំនួន ៨៥ លានដុល្លារអាមេរិក សម្រាប់គម្រោងកែលម្អប្រព័ន្ធធារាសា​ស្រ្តដែលកំពុងដំណើរការ ដើម្បីជួយក្រសួងធនធានទឹក និងឧតុនិយម លើកកំពស់ប្រសិទ្ធភាពការចែកចាយទឹក និងធន់នឹងអាកាសធាតុនៅទូទាំងប្រទេស ព្រមទាំងប្រព័ន្ធធារាសាស្ត្រចំនួន ៤ រួមមាន ខេត្តបាត់ដំបង កំពង់ចាម កំពង់ធំ និងខេត្តតាកែវ។

គម្រោងទាំងពីរនេះនឹងធ្វើទំនើបកម្មប្រព័ន្ធធារាសាស្ត្រ និងប្រព័ន្ធគ្រប់​គ្រងទឹកជំនន់ដ៏សំខាន់នៅក្នុងតំបន់ដែលប្រឈមនឹងគ្រោះរាំងស្ងួត ក៏ដូចជាហានិភ័យទឹកជំនន់ធ្ងន់ធ្ងរ ហើយនឹងធ្វើការ ដើម្បីការពារសហគមន៍ និងប្រព័ន្ធអេកូឡូស៊ីដូចគ្នា។ គម្រោងនេះ ក៏គាំទ្រដល់ការអភិវឌ្ឍន៍សមត្ថភាពប្រតិបត្តិការសម្រាប់មជ្ឈមណ្ឌលទិន្នន័យជាតិ គ្រប់គ្រងធនធានទឹករបស់កម្ពុជា និងប្រព័ន្ធព័ត៌មានធនធានទឹកដែលពាក់ព័ន្ធផងដែរ។ វាក៏នឹងគាំទ្រការងាររៀបចំ និងការរចនាសម្រាប់ការវិនិយោគនាពេលអនាគតក្នុងការគ្រប់គ្រងទឹកជំនន់ និងគ្រោះរាំងស្ងួត

អ្នកស្រី Jyotsana Varma នាយិកា​ធនាគារ​អភិវឌ្ឍន៍​អាស៊ី ប្រចាំ​ប្រទេស​កម្ពុជា​នបាន​ថ្លែង​ថា៖ ធនាគារ​អភិវឌ្ឍន៍​អាស៊ី​គាំទ្រ​កម្ពុជា ​ក្នុង​ការ​កសាង​ភាព​ធន់​នឹង​បញ្ហា​ប្រឈម​បណ្ដាល​មក​ពី​អាកាសធាតុ និង​ធានា​ដល់​ការ​គ្រប់គ្រង​ទឹក​ដោយ​និរន្តរភាព។

អ្នកស្រី Jyotsana Varma បានមានប្រសាសន៍ថា គម្រោងនេះនឹងចែករំលែកការអនុវត្តល្អបំផុតជាមួយកសិ​ករ ដើម្បីបង្កើនភាពធន់នឹងអាកាសធាតុ ដើម្បី​រក្សា​ជីវភាព​ និងធ្វើឱ្យ​ប្រសើរ​ឡើង​ដល់​ផលិតកម្ម​អា​ហារ ពង្រឹង​សន្តិសុខ​ស្បៀង។ ADB មានមោទនភាពក្នុងការធ្វើជាដៃគូជាមួយប្រទេសកម្ពុជា ដើម្បីដោះស្រាយតម្រូវការបន្ទាន់ទាំងនេះ និងជាមូលដ្ឋានគ្រឹះសម្រាប់អនាគតដ៏រឹងមាំមួយ។

យោងតាម​ធនាគារ​អភិវឌ្ឍន៍​អាស៊ី ទឹកជំនន់​ជា​ញឹក​ញាប់​នា​រដូវ​វស្សា​បានប៉ះពាល់​ដល់​ពលរដ្ឋ ៤​លាន​នាក់ ឬជិតមួយភាគបួននៃចំនួនប្រជាជន ដោយមានការខាតបង់​ថវិកា​ប្រចាំឆ្នាំប៉ាន់ស្មានចំនួន​ប្រមាណ ២៥០ លានដុល្លារ ដែលស្មើនឹងជាង១% នៃផលិតផលក្នុងស្រុកសរុបរបស់ប្រទេសកម្ពុជា៕