សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមប្រសាសន៍របស់ឯកឧត្តម ហេង សួរ រដ្ឋមន្ត្រីក្រសួងការងារ បណ្តុះបណ្តាល និងវិជ្ជាជីវៈ ដែលបានថ្លែងនាឱកាសពិធីសម្ពោធដាក់ឱ្យប្រើប្រាស់ស្ពាន សម្ដេចតេជោ ហ៊ុន សែន កោះយ៉ ស្ថិតក្នុងឃុំប៉ាក់ខ្លង ស្រុកមណ្ឌលសីមា ខេត្តកោះកុង បានឱ្យដឹងថា គិតត្រឹមថ្ងៃទី ៧ ខែមករា ឆ្នាំ ២០២៤ ចំនួនអ្នកចុះឈ្មោះចូលរៀនវគ្គបណ្ដុះបណ្ដាលជំនាញ បច្ចេកទេស និងវិជ្ជាជីវៈ (TVET) បានកើនឡើងដល់ ២១,៥៩៥នាក់ ហើយ។
នៅក្នុងនោះ អ្នកចុះឈ្មោះនៅទីក្រុងភ្នំពេញមានចំនួន ៨ ៣៥៣នាក់ ខេត្តបាត់ដំបងចំនួន ២ ៦៩៩នាក់ ខេត្តសៀមរាបចំនួន ១ ៦១២នាក់ ខេត្តកណ្ដាល ៧៧៦នាក់ ខេត្តព្រះសីហនុ ៧៥៨នាក់ និងបណ្ដាខេត្តផ្សេងៗចំនួន ៧៤០០នាក់។
ឯកឧត្តមក៏បានគូសបញ្ជាក់ផងដែរថា ៖ ក្រសួងនឹងចាប់ផ្ដើមបើកវគ្គបណ្ដុះបណ្ដាលជំហានដំបូងក្នុងពេលដ៏ខ្លីខាងមុខនេះចំនួន ៥០០ថ្នាក់ ដល់យុវជនប្រមាណ ១៥០០០នាក់។
យ៉ាងណាមិញ កម្មវិធីបណ្ដុះបណ្ដាលជំនាញ បច្ចេកទេស និងវិជ្ជាជីវៈ ១លាន៥សែននាក់ បានជួយដល់យុវជនដែលមកពីគ្រួសារមានប័ណ្ណសមធម៌ និងប័ណ្ណសម្គាល់គ្រួសារងាយរងហានិភ័យ តាមរយៈការចូលរៀនដោយមិនបង់ថ្លៃ ហើយទទួលបានប្រាក់ឧបត្ថម្ភប្រចាំខែចំនួន ២៨ម៉ឺន ទទួលបានការប្រឹក្សាយោបល់ពីការជ្រើសរើសជំនាញ និងព័ត៌មានទីផ្សារការងារ ចុះកម្មសិក្សានៅតាមសហគ្រាស គ្រឹះស្ថាន និងក្រុមហ៊ុនឯកជន ដែលធ្វើយ៉ាងណាឱ្យមានជំនាញមួយពិតប្រាកដដែលទីផ្សារកំពុងត្រូវការ មានឱកាសធ្វើការងារសមរម្យ និងទទួលបានប្រាក់ចំណូលទៀងទាត់ និងអាចជួយគ្រួសាររួចចាកផុតពីភាពក្រីក្រ។
គួរបញ្ជាក់ថា កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនចំនួនប្រមាណ ១,៥ លាននាក់មកពីគ្រួសារក្រីក្រ និងគ្រួសារងាយរងហានិភ័យ ត្រូវបានសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសដាក់ឱ្យអនុវត្តជាផ្លូវការកាលពីថ្ងៃទី ១៤ ខែវិច្ឆិកា ឆ្នាំ២០២៣ កន្លងទៅ ដើម្បីធ្វើយ៉ាងណាអាចជួយលើកកម្ពស់កម្រិតចំណេះដឹង ជំនាញ ដល់ប្រជាជនសកម្ម ជាពិសេសអ្នកដែលមានជីវភាពក្រីក្រ និងងាយរងហានិភ័យ ក៏ដូចជាជួយលើកកម្ពស់កំណើនសេដ្ឋកិច្ចផងដែរ៕
Account
Security
Favourite Content