សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រយៈពេល៥ខែ ដើមឆ្នាំ២០២៤ រមណីយដ្ឋានអង្គរទទួលបានភ្ញៀវទេសចរបរទេសជាង ៤៧ ម៉ឺននាក់ ដោយរកចំណូលពីការលក់សំបុត្រចូលទស្សនាសរុបមានជាង ២២លានដុល្លារអាមេរិក កើនឡើងប្រមាណ ៣៧ ភាគរយ ធៀបនឹងឆ្នាំមុន។
យោងតាមរបាយការណ៍របស់គ្រឹះស្ថានអង្គរបានបង្ហាញថា ចាប់ពីខែមករា-ខែឧសភា ឆ្នាំ២០២៤ មានភ្ញៀវទេសចរបរទេសចំនួន ៤៧២ ២៥៨ នាក់ បានទិញសំបុត្រចូលទស្សនារមណីយដ្ឋានអង្គរ កើនកើន៣៦.៩៨% ភាគរយបើធៀបឆ្នាំ២០២៣ ខណៈថវិកាដែលប្រមូលបានពីការលក់សំបុត្រសរុប ២២ ២០៦ ៨៩១ ដុល្លារ កើនឡើង៣៨.២២% ភាគរយ។
ដោយឡែកក្នុងខែឧសភា ភ្ញៀវទេសចរបានទិញសំបុត្រមាន ៥០,៨៧៩នាក់ ស្មើនឹងទឹកប្រាក់ ២,២៨៩,៣៥៨ដុល្លារ។ ត្រឹមតែនៅក្នុងខែឧសភានេះ ទេសចរបរទេសចំនួន ៥០ ៨៧៩ នាក់ បានទិញសំបុត្រចូលទស្សនាគ្រឹះស្ថានអង្ករ ដែលរកចំណូលបាន ២,២៩ លានដុល្លារ កើនឡើង១២ ភាគរយ ប្រៀបធៀបនឹងខែមុន។
គ្រឹះស្ថានអង្គរ បានឲ្យដឹងពីការលក់សំបុត្រទូកកម្សាន្តនៅតំបន់ផែចុងឃ្នៀស រយៈពេល៥ខែ មកនេះ ចំណូលពីការលក់សំបុត្រទូកសរុប មានចំនួន ៤០០,៣០២ដុល្លារ។ ចំណែកតំបន់ប្រាសាទកោះកេរ សរុប៥ខែមកនេះផងដែរ មានចំនួន ១០,១២៧នាក់ ស្មើនឹង ១៥១,៩០៥ដុល្លារ។
គួរបញ្ជាក់ថា ស្ថិតនៅភាគពាយព្យនៃខេត្តសៀមរាប រមណីយដ្ឋានអង្គរ ទំហំ៤០១ គីឡូម៉ែត្រការ៉េ ដែលបានចុះក្នុងបញ្ជីបេតិកភណ្ឌពិភពលោករបស់អង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (យូណេស្កូ) ក្នុងឆ្នាំ១៩៩២ គឺជាគោលដៅទេសចរណ៍ពេញនិយមបំផុតនៅប្រទេសអាស៊ីអាគ្នេយ៍។
លោក ខៀវ ធី ប្រធានសមាគមមគ្គុទ្ទេសក៍ទេសចរណ៍អង្គរបានលើកឡើងថា ចំនួនភ្ញៀវទេសចរបានកើនឡើងវិញចាប់តាំងពីខែមករាដើមឆ្នាំនេះ ដោយសារទេសចរនៅអឺរ៉ុបចូលចិត្តដើរលេងអំឡុងពេលដំណាច់ឆ្នាំ ខណៈអាកាសធាតុនៅទីនោះត្រជាក់ ម្យ៉ាងទៀតភ្ញៀវទេសចរជ្រើសរើសប្រទេសដែលមានសុវត្ថិភាព និងប្រទេសដែលមានវប្បធម៌ សេវាកម្មល្អ ចំណីអាហារឆ្ងាញ់ ប្រជាជនរាក់ទាក់។
យោងតាមគេហទំព័រ Mornings.co.uk ដែលប្រមូលទិន្នន័យ និងស្វែងរកពាក្យគន្លឹះ «ថ្ងៃរះ» នៅក្នុងប្រទេសប្រមាណ៧២ប្រទេសនៅជុំវិញពិភពលោក ក្នុងនោះប្រាសាទអង្គរវត្តរបស់ប្រទេសកម្ពុជា ជាប់ជាទីតាំងដែលទទួលបានការលើកឡើងច្រើនជាងគេ និងត្រូវបានចាត់ទុកថា «ប្រាសាទអង្គរវត្ត» ជាប់ជាទីតាំងដ៏ល្អបំផុតលេខ១លើពិភពលោក សម្រាប់ទស្សនាព្រះអាទិត្យរះ ដែលការជាប់ជាទីតាំងដ៏ល្អបំផុតលេខ១លើពិភពលោកនេះក៏ជាកត្តានាំឱ្យក្លាយជាកន្លែងទាក់ទាញភ្ញៀវទេសចរមកទស្សនាកម្សាន្តផងដែរ។
សូមជម្រាបថា រយៈពេល៥ខែ ឆ្នាំ២០២៤នេះ រដ្ឋាភិបាលបានឧបត្ថម្ភមូលនិធិនៃមន្ទីរពេទ្យគន្ធបុប្ផាកម្ពុជាបានចំនួនសរុប ៩៤៤ ៥១៦ដុល្លារអាមេរិកពីចំណែកនៃការលក់បណ្ណជូនភ្ញៀវទេសចរបរទេសចូលទស្សនារមណីយអង្គរ ដើម្បីជួយក្នុងមូលនិធិសម្រាប់សង្គ្រោះជីវិតកុមារកម្ពុជា។
ឆ្នាំ២០២៣ ភ្ញៀវទេសចរបរទេសទិញបណ្ណចូលទស្សនារមណីយដ្ឋានអង្គរមានចំនួនជាង៧៩ម៉ឺននាក់ ទទួលបានចំណូល៣៧ ១៩៨ ៩៨៨ ដុល្លារអាមេរិក កើនឡើងចំនួន២២២.៦៨ភាគរយ។
ក្នុងឆ្នាំ២០២៣ កម្ពុជាទទួលបានភ្ញៀវទេសចរបរទេសចំនួន ៥,៤៥ លាននាក់ ចំណែកថវិកាដែលរកបានពីវិស័យទេសចរណ៍បរទេសមានប្រមាណ ៣,០៤ ពាន់លានដុល្លារ។ នេះបើយោងតាមក្រសួងទេសចរណ៍៕
Account
Security
Favourite Content