សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចំនួនអ្នកប្រើប្រាស់ទូរសព្ទចល័ត និងសេវាអ៊ីនធើណេតនៅក្នុងប្រទេសកម្ពុជាបានកើនឡើងជាបន្តបន្ទាប់ ជាក់ស្ដែងគិតត្រឹមចុងឆ្នាំ២០២៤ ទូទាំងប្រទេសកម្ពុជាមានអ្នកប្រើប្រាស់ទូរសព្ទចល័តចំនួន ២០លាន ៦សែន ដែលមានន័យថា មនុស្សម្នាក់អាចមានទូរសព្ទ ២គ្រឿង និងខ្លះ ៣គ្រឿង ចំណែកអ្នកប្រើប្រាស់សេវាទូរសព្ទក៏បានកើនឡើងដល់ចំនួន១៩លាន ។
ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍នៅក្នុងពិធីបិទសន្និបាតកាលពីរសៀលថ្ងៃទី៦ ខែកុម្ភៈ ឆ្នាំ២០២៥ បានឱ្យដឹងថា ក្នុងរយៈពេល៥ឆ្នាំចុងក្រោយនេះ ក្រសួងប្រៃសណីយ៍ និងទូរគមនាគមន៍ បានផ្ដល់អាជ្ញាបណ្ណប្រតិបត្តិការទូរគមនាគមន៍សរុបចំនួន៥៩ ក្នុងនោះអាជ្ញាបណ្ណទូរសព្ទចំនួន៤អាជ្ញាបណ្ណ ខ្សែកាបអុបទិកក្រោមបាតសមុទ្រចំនួន២ អាជ្ញាបណ្ណ ខ្សែកាបអុបទិកលើគោកចំនួន៥ និងអ៊ីនធើណេតចំនួន៣៩អាជ្ញាបណ្ណ ។
ឯកឧត្តមបន្តថា ៖ គិតត្រឹមឆ្នាំ២០២៤ អ្នកប្រើប្រាស់សេវាទូរសព្ទមានចំនួនប្រមាណ ២០,៦លាន និងសេវាអ៊ីនធើណេតចំនួន ១៩លាន ។ ដើម្បីជំរុញ និងសម្រួលដល់ការប្រើប្រាស់កាន់តែងាយស្រួល និងលឿនរហ័ស ក្រសួងបានជំរុញការអភិវឌ្ឍហេដ្ឋារចនាសម្ព័ន្ធតភ្ជាប់ឌីជីថល រួមមានបង្គោលអង់តែនទូរសព្ទ បណ្ដាញខ្សែកាបអុបទិកក្រោមបាតសមុទ្រ និងលើគោក ។ ក្នុងរយៈពេលប៉ុន្មានឆ្នាំមកនេះ ក្រសួងបានសង់បង្គោលអង់តែនទូរសព្ទសរុបចំនួន ១១៥១១បង្គោល ហើយក្រសួងមានផែនការជំរុញសាងសង់បង្គោលអង់តែនទូរសព្ទបន្ថែមចំនួន ៣ ៦៧៤ ដែលមានចំនួនស្ថានីយ៍អង់តែនសរុប ៦ ៣៥៥ ត្រឹមឆ្នាំ២០២៧ ។ដោយឡែកនៅរាជធានីភ្នំពេញ ក្រសួងបានសាងសង់បង្គោលអង់តែនបន្ថែមចំនួន ៤១៦ ក្នុងចំណោម១០០០បង្គោល ហើយក្រសួងបានចាត់ក្រុមការងារចមនួន៩ក្រុម ចុះត្រួតពិនិត្យអគារកម្ពស់ចាប់ពី៦ជាន់ឡើង ដើម្បីជំរុញសេវាទូរសព្ទ និងអ៊ីនធើណេតនៅក្នុងអគារ ។
ឯកឧត្តមបន្ថែមថា ក្រៅពីនៅរាជធានីភ្នំពេញ ក្រសួងបានសាងសង់បង្គោលអង់តែននៅខេត្តតាកែវ ខេត្តកណ្ដាល និងខេត្តសៀមរាបចំនួន១៩២ ក្នុងចំណោមផែនការ ៣៩៤បង្គោល និងបន្តសាងសង់បន្ថែមទៀតនៅតាមទីរួមខេត្ត ទីរួមស្រុក និងតំបន់ប្រជុំជននៅតាមឃុំ សង្កាត់ នៃបណ្ដាខេត្តនានាព្រមទាំងនៅតាមតំបន់ទេសចរណ៍ដាច់ស្រយាល ដោយប្រើមូលនិធិកាតព្វកិច្ចសេវាសកល ។ ដោយឡែកសម្រាប់បណ្ដាញខ្សែកាបអុបទិកលើគោកក៏បានសាងសង់បានប្រវែងប្រមាណ ៣៤ ៤៩១គីឡូម៉ែត្រ ក្នុងនោះបំពង់កប់ក្រោមដីមានប្រវែង ២ ៩២៣គីឡូម៉ែត្រ និងក្រោមបាតសមុទ្រប្រវែង ២៦ ៣០០គីឡូម៉ែត្រ និងគ្រោងសាងបណ្ដាញថ្មីប្រវែង ២ ៨៨៧គីឡូម៉ែត្រនៅឆ្នាំ ២០២៦ ។
ឯកឧត្តមរដ្ឋមន្ត្រី បានបញ្ជាក់ថា ដើម្បីលើកកម្ពស់គុណភាព និងការពារអ្នកប្រើប្រាស់សេវាទូរគមនាគមន៍ ក្រសួងបានបំពាក់ឧបករណ៍វាស់ស្ទង់សេវាលើរថយន្តចំនួន៥គ្រឿង សម្រាប់វាស់ស្ទង់សេវា និងបញ្ចៀសការឆ្លងរំខាន និងបានដាក់ដំណើរការកម្មវិធីទូរសព្ទ MPTC Speed Test ដើម្បីឱ្យអ្នកប្រើប្រាស់អាចវាស់ល្បឿនសេវាអ៊ីនធើណេតដោយខ្លួន ។
ទន្ទឹមនឹងនេះដែរ ក្រសួងក៏បានជួបប្រឈមនឹងបញ្ហាមួយចំនួនក្នុងការពង្រឹងគុណភាពសេវា ដើម្បីសម្រួលដល់ការប្រើប្រាស់ ដូចជាការដំឡើងបង្គោលអង់តែនសេវានៅតាមតំបន់មួយចំនួន ជាពិសេសគឺការប្រឆាំងជំទាស់របស់ពលរដ្ឋ ដោយពួកគាត់មិនអនុញ្ញាតឱ្យសង់បង្គោលអង់តែននៅក្បែរផ្ទះឬតំបន់របស់ពួកគាត់រស់នៅ ដោយពួកគាត់លើកឡើងថាធ្វើឱ្យប៉ះពាល់ដល់សុខភាព ខណៈការសាងសង់បង្គោលអង់តែនេះ មិនបានធ្វើឱ្យប៉ះពាល់អ្វីដល់ការរស់នៅទេ ផ្ទុយទៅវិញ វានឹងធ្វើឱ្យការប្រើប្រាស់សេវាទូរសព្ទ និងអ៊ីនធើណេតកាន់តែងាយស្រួលទៅវិញ ៕
Account
Security
Favourite Content