ភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា-ចិន ក្នុងរយៈពេល៨ខែ ឆ្នាំ២០២៣នេះសម្រេចបានចំនួនប្រមាណជាង ៨ ពាន់លានដុល្លារ កើនឡើងចំនួន ១.១៥ភាគរយ។ នេះបើយោងតាមរបាយការណ៍របស់​អគ្គនាយក​ដ្ឋានគយ និងរដ្ឋាករកម្ពុជា។

តាមរបាយការណ៍កាលពីសប្ដាហ៍កន្លងទៅបានបង្ហាញថា រយៈពេល៨ខែ គិតចាប់ពីខែ មករា ដល់ចុងខែសីហា ទំហំពាណិជ្ជកម្មទ្វេភាគីរវាងកម្ពុជា-ចិន សម្រេចបានចំនួន ៨ ០៩៣ ០៧២ ៩៤៦លានដុល្លារអាមេរិក។ ក្នុងនោះ កម្ពុជានាំចេញទំនិញទៅកាន់ប្រទេសចិនមានចំនួន ៩៣៩ ៩៥៥ ៨៨២ លានដុល្លារ កើនឡើង១៦.​៨១​ភាគរយ។ ចំណែកការនាំចូលទំនិញពីប្រទេសចិនមានចំនួន​ ៧ ១៥៣ ១១៧ ០៦៤លានដុល្លារ ធ្លាក់ចុះ ០.៦០ភាគរយ។ សម្រាប់ខែសីហា ឆ្នាំ២០២៣ ការនាំចេញរបស់កម្ពុជា ទៅចិនសម្រេចបានជាង ១២៥លានដុល្លារ កើនឡើង ២១ភាគរយ។

ផលិតផលសំខាន់ៗដែលកម្ពុជាបាននាំចេញទៅកាន់ប្រទេសចិនរួមមាន៖ សម្លៀកបំពាក់, ស្បែកជើង, កាបូប, ផលិតផលវាយនភណ្ឌផ្សេងៗទៀត, គ្រឿងអេឡិចត្រូនិក, គ្រឿងបន្លាស់រថយន្ដ, កង់, គ្រឿងបន្លាស់កង់, ឈើមូល, ឈើអារ, ក្ដារកុងប្លាកេ, ឈើកែច្នៃផ្សេងទៀត, ផលិតផលពីឈើ, អង្ករ កៅស៊ូ ផ្លែឈើ បន្លែ និងដំឡូងមី ព្រមទាំងផលិតផលប្រើប្រាស់ផ្សេងជាច្រើនទៀត។

ចំណែកទំនិញដែលកម្ពុជា បាននាំចូលមករួមមាន៖ ថ្នាំពេទ្យ និងឱសថបំប៉ន, បារី, ស្រាបៀរ, ស្រាចម្រុះ, ទឹកបរិសុទ្ធ, ភេសជ្ជៈ, ប៊ីចេង, ស្ករស, ប្រេងឆា គ្រឿងឧបភោគ បរិភោគ ក្រណាត់ចាក់ ក្រណាត់ត្បាញពីកប្បាស គ្រឿងចក្រ ដែក គ្រឿងសំណង់​ផ្សេងៗ បរិក្ខារ គ្រឿងអេឡិចត្រូនិក វត្ថុធាតុពីប្លាស្ទិក អាលុយមីញ៉ូម គ្រឿងសង្ហារឹម ក្រដាស និងក្រដាសកាតុងជាដើម។

កម្ពុជា-ចិន បានប្តេជ្ញាខិតខំរួមគ្នា ជំរុញការកសាងសហគមន៍ជោគវាសនាតែមួយ និងជំរុញទំហំពាណិជ្ជកម្ម​ទ្វេភាគីឱ្យកើនឡើងលើស ១២ ពាន់លានដុល្លារអាមេរិក ក្នុងឆ្នាំ២០២៣នេះ និងជំរុញទំហំពាណិជ្ជកម្ម​ទ្វេភាគីឱ្យកើនឡើងលើស ១៥ ពាន់លានដុល្លារនៅឆ្នាំ២០២៥។

យោងតាមទិន្នន័យ​ ​អគ្គនាយក​ដ្ឋា​ន​គយ និង​រដ្ឋាករ​កម្ពុជា បង្ហាញថា ក្នុង​ឆ្នាំ​២០២២ ពាណិជ្ជកម្ម​កម្ពុជា​-​ចិន មាន​ចំនួន​សរុប ១១ ៦៨៦ ១៦៤​ លាន​ដុល្លារ​កើនឡើង ៤,៤​ ភាគរយ​ធៀប​ឆ្នាំ ២០២១ ក្នុងនោះ​កម្ពុជា​នាំ​ទំនិញ​ទៅ​ទីផ្សារ​ប្រទេស​ចិន ១ ២៤០,៦៣​ លាន​ដុល្លារ ថយចុះ ១៧,៩​ ភាគរយ និង​ទំនិញ​កម្ពុជា​នាំចូល​ពី​ចិន មាន ចំនួន ១០ ៤៤៥,៥៣៣​ លាន​ដុល្លារ កើន ៧,៩​ ភាគរយ​។

ស្របគ្នានេះដែរ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលធ្វើដំណើរទស្សនកិច្ចផ្លូវការនៅប្រទេសចិនបានគូសបញ្ជាក់ថា រាជរដ្ឋាភិបាលកម្ពុជា នៅតែរក្សាគោលនយោបាយនៃទំនាក់ទំនង និង​កិច្ចសហប្រតិបត្តិការល្អ​ រវាងកម្ពុជា-ចិន និងបន្តគាំទ្រសម្របសម្រួល និង​លើកទឹកចិត្តឱ្យ​មានការវិនិយោគកាន់តែច្រើនមកកម្ពុជា។

សម្ដេចធិបតី ហ៊ុន ម៉ាណែត បានមានប្រសាសន៍ថា ៖ «រាជរដ្ឋាភិបាលកម្ពុជា នៅតែរក្សាគោលនយោបាយនៃទំនាក់ទំនង និងកិច្ចសហប្រតិបត្តិការល្អរវាងកម្ពុជា-ចិន និងបន្តគាំទ្រសម្របសម្រួល និងលើកទឹកចិត្តឱ្យមានការវិនិយោគកាន់តែច្រើនមកកម្ពុជា »។

សម្ដេចធិបតី ហ៊ុន ម៉ាណែត ក្នុងជំនួបក្រុមហ៊ុន Huawei Technology Co., Ltd ក៏បានបង្ហាញការគាំទ្រពេញទំហឹងចំពោះដំណើរការអាជីវកម្ម និងវិនិយោគរបស់ក្រុមហ៊ុននៅកម្ពុជា ដែលស្របតាមតម្រូវការសង្គម-សេដ្ឋកិច្ច និងគោលនយោបាយរបស់រដ្ឋាភិបាល។ ភាគីទាំងពីរ នៅតែរក្សាគោលនយោបាយនៃទំនាក់ទំនងបន្តទំនាក់ទំនងល្អរវាងប្រទេសទាំងពីរ កម្ពុជា-ចិន ឱ្យកាន់តែរីកចម្រើន និងឈានទៅរកភាពល្អប្រសើរជាលំដាប់ ដែលនេះគឺជាការបញ្ជាក់អំពីសារៈសំខាន់នៃ​សុខសន្ដិភាព និង​ស្ថិរភាពនយោបាយនៅកម្ពុជា ដែលជាមូលដ្ឋានគ្រឹះ​នៃ​ការ​បង្កើន​ទំនុកចិត្តដល់វិនិយោគិន​នៅកម្ពុជាផងដែរ៕