សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖លោក ឡែមផូរ សុថាវរិទ្ឋិ ប្រធានគណៈកម្មការប្រតិបត្តិនៃសមាគមវារីវប្បកម្មនៅកម្ពុជាបានមានប្រសាសន៍ប្រាប់សារពត៌មានAMS Economy ថាកម្ពុជាមានតម្រូវការត្រីប្រមាណជាង ៩៥០តោនក្នុងមួយថ្ងៃ សម្រាប់ផ្គត់ផ្គង់លើទីផ្សារទូទាំងប្រទេស ខណៈដែលការផលិតក្នុងស្រុកមានចំនួនប្រមាណជា ៥៨%ប៉ុណ្ណោះ នៃតម្រូវការទីផ្សារទូទាំងប្រទេស។
ករណីនេះ លោកបានអំពាវនាវដល់ប្រជាពលរដ្ឋ ពិសេសកសិកររស់នៅជុំវិញបឹងទន្លេសាប បង្កើនការចិញ្ចឹមត្រីឱ្យបានកាន់តែច្រើន ដើម្បីបង្កើនចំណូលគ្រួសារ។
លោកបានលើកឡើងថា៖ «ខ្ញុំតែងប្រាប់ទៅសមាជិកខ្លួនថា យើងត្រូវបង្កើនការចិញ្ចឹមត្រី ដោយសារមានតម្រូវការទីផ្សារខ្ពស់ហើយតម្លៃអាចបានចំណេញ ។យើងជំរុញគាត់ឱ្យចិញ្ចឹមដោយសារយើងគិតឃើញមានតម្រូវការទីផ្សារ»។
លោក ថាយ សុមុន្នី ប្រធាននាយកដ្ឋានអភិរឌ្ឍន៍វារីវប្បកម្ម នៃក្រសួងកសិកម្មរុក្ខាប្រម៉ាញ់និងនេសាទមានប្រសាសន៍ថា៖ ក្រោយពីកម្ពុជាបិទច្រកព្រំដែនជាមួយប្រទេសថៃ បានធ្វើឱ្យតម្រូវការត្រីក្នុងស្រុកមានការកើនឡើង។ លោកបានលើកឡើងថា «សំខាន់តម្រូវការមានការកើនឡើង ដោយសារការបិទច្រកជាមួយថៃ តម្រូវការផលិតកម្មក្នុងស្រុក ជាពិសេសត្រីដែលយើងចិញ្ចឹមមានតម្លៃល្អច្រើន ជារួមគាត់ចិញ្ចឹមបានក្នុងលក្ខខណ្ឌល្អ ផលិតកម្មគាត់មានទីផ្សារល្អ»។
ខេត្តដែលកសិករចិញ្ចឹមត្រីច្រើនជាងគេមានដូចជា ខេត្តកណ្តាល កំពង់ចាម បាត់ដំបង ពិសេសកសិករដែលរស់នៅជាប់បឹងទន្លេសាប ដែលពួកគាត់មានការចិញ្ចឹមកាន់តែច្រើនឡើងៗ ខណៈដែលកម្ពុជាគាំទ្រនិងឱ្យតម្លៃផលិតក្នុងស្រុកជាជាងផលិតផលនាំចូល។
យោងតាមរបាយការណ៍រដ្ឋបាលជលផលនៃក្រសួងកសិកម្មរុក្ខាប្រមាញ់និងនេសាទ ឱ្យដឹងថាក្នុងមួយឆ្នាំកម្ពុជាប្រមូលត្រីបានប្រមាណជាង ៩សែនតោន ទាំងប្រភេទត្រីចិញ្ចឹមនិងត្រីធម្មជាតិ។
ទោះយ៉ាងណាចំនួនត្រីក្នុងស្រុក មិនអាចផ្គត់ផ្គត់លើទីផ្សារកម្ពុជាបានគ្រប់គ្រាន់នោះឡើយ ដែលតម្រូវឱ្យមានការនាំចូលពីប្រទេសវៀតណាម ចន្លោះពី៣០០ ទៅ ៤០០តោនមួយថ្ងៃ ក្នុងនោះនាំចូលពីប្រទេសថៃផងដែរ តាមច្រកព្រំដែនប្រទេសឡាវប្រមាណជា ២០ទៅ៣០តោនក្នុងមួយថ្ងៃដែលជាប្រភេទត្រីបង្កកសម្រាប់ធ្វើផ្អក ប្រហុកជាដើម៕
Account
Security
Favourite Content