ភ្នំពេញ ៖ក្រុមប្រឹក្សាធុរកិច្ចរួម កម្ពុជា-ឥណ្ឌា ត្រូវបានបង្កើតឡើងនៅទីក្រុងញ៉ូវដេលី ប្រទេសឥណ្ឌា កាលពីថ្ងៃទី២៣ ខែកម្ភៈ ឆ្នាំ២០២៤ ។ ក្រុមប្រឹក្សាមួយនេះមានគោលដៅជំរុញសកម្មភាពពាណិជ្ជកម្ម និងវិនិយោគតាមរយៈកិច្ចពិភាក្សា និងសហប្រតិបត្តិការរវាងវិស័យឯកជននៃប្រទេសទាំងពីរត្រួសត្រាយផ្លូវនៃកិច្ចសហប្រតិបត្តិការសេដ្ឋកិច្ចឥណ្ឌា និងកម្ពុជា ឆ្ពោះទៅរកភាពរីកចម្រើន និងវិបុលភាពរួមគ្នានាពេលអនាគត។

សមាគមឧកញ៉ាកម្ពុជា និងសហព័ន្ធសភាពាណិជ្ជកម្ម និងឧស្សាហកម្មឥណ្ឌា (FICCI) បានសហការរៀបចំបង្កើតឱ្យមាននូវក្រុមប្រឹក្សាធុរកិច្ចរួមកម្ពុជា-ឥណ្ឌា ព្រមទាំងការជ្រើសតាំងសមាសភាពដែលជាប្រធានក្រុមប្រឹក្សាភិបាល និងនាយកប្រតិបត្តិរបស់ក្រុមហ៊ុនធំៗ ចូលរួមជាសមាជិក និងបំពេញតួនាទីជាលេខាធិការដ្ឋានរបស់ក្រុមប្រឹក្សាធុរកិច្ចរួមនេះផងដែរ។

នៅក្នុងពិធីសម្ពោធជាផ្លូវការនេះ ក៏មានការផ្គូរផ្គងដៃគូវិនិយោគរវាងភាគីទាំងពីរដោយរួមមានក្រុមធុរជនរបស់កម្ពុជាជាមួយនឹងក្រុមពាណិជ្ជកររបស់ឥណ្ឌាដែលសុទ្ធតែជាក្រុមហ៊ុនធំៗ កំពុងវិនិយោគលើវិស័យសំខាន់ៗដូចជា ៖ ការអភិវឌ្ឍន៍ជំនាញ, ការរុករក និងជីកយករ៉ែ, សុខាភិបាល, ផលិតកម្មកែច្នៃម្ហូបអាហារ, វិស័យសំណង់, ការស្រាវជ្រាវអប់រំ និងអចលនទ្រព្យជាដើម។

ឯកឧត្តម ទិត រិទ្ធីពល អនុរដ្ឋលេខាធិការក្រសួងពាណិជ្ជកម្ម ដឹកនាំគណៈប្រតិភូកម្ពុជាចូលរួមក្នុងពិធីសម្ពោធជាផ្លូវការក្រុមប្រឹក្សាធុរកិច្ចរួមកម្ពុជា-ឥណ្ឌា បានថ្លែងថា៖

«ការបង្កើតក្រុមប្រឹក្សាធុរកិច្ចរួមកម្ពុជា-ឥណ្ឌា នឹងជួយជំរុញពាណិជ្ជកម្ម ការវិនិយោគ និងសកម្មភាពធុរកិច្ចផ្សេងទៀតរវាងប្រទេសទាំងពីរ ជាពិសេសគឺជួយពង្រឹងកិច្ចសហប្រតិបត្តិការផ្នែកធុរកិច្ច បង្កើតនូវឱកាសក្នុងការបង្កើតបណ្តាញធុរកិច្ចសម្រាប់ធុរជន ម្ចាស់អាជីវកម្ម និងអ្នកជំនាញឧស្សាហកម្មផ្សេងៗទៀត ក៏ដូចជាដើម្បីពង្រីកសក្ដានុពលអាជីវកម្ម និងផលប្រយោជន៍ពាណិជ្ជកម្មរវាងប្រទេសទាំងពីរផងដែរ»។

កិច្ចប្រជុំលើកដំបូងនៃក្រុមប្រឹក្សាធុរកិច្ចរួមឥណ្ឌា-កម្ពុជា (ICJBC) នៅរដ្ឋធានីញូវដេលី នៃសាធារណរដ្ឋឥណ្ឌា អ្នកឧកញ៉ា ហ៊ុន ឡាក់ អគ្គលេខាធិការសមាគមឧកញ៉ាកម្ពុជា បានមានប្រសាសន៍ថា ៖

«ក្រុមប្រឹក្សា​ធុរកិច្ចរួមឥណ្ឌា-កម្ពុជា មានគោលបំណងបង្កើតឡើងនូវយន្តការពិគ្រោះយោល់ទ្វេភាគីដើម្បីឱ្យបណ្តាធុរជនដ៏មានសក្តានុពលនៃប្រទេសទាំងពីរអាចជជែកពិភាក្សាព្រមទាំងស្នើនូវដំណោះស្រាយផ្សេងៗដើម្បីបង្កើនសកម្មភាពពាណិជ្ជកម្ម ការវិនិយោគ និងកិច្ចសហប្រតិបត្តិការលើវិស័យនានារួមទាំងការលើកកម្ពស់​ និងការសម្របសម្រួលពាណិជ្ជកម្មក៏ដូចជាការផ្គូផ្គងដៃគូក្នុងវិស័យឧស្សាហកម្ម នវានុវត្តន៍ និង​សហ​គ្រិន​ភាព ព្រមទាំងកិច្ចសម្របសម្រួលលើបម្លាស់ប្តូរបច្ចេកវិទ្យារវាងភាគីទាំងពីរ ជាពិសេសផ្តោតទៅលើវិស័យអាទិភាពរួមមាន៖ កសិកម្ម,ផលិតកម្មកែច្នៃម្ហូបអាហារ,សុខាភិបាល, ឱសថ, សំណង់និងហេដ្ឋារចនាសម្ព័ន្ធ, ព័ត៌មានវិទ្យា, វិស័យអប់រំ,ទេសចរ​ណ៍, ឧស្សាហកម្មយានយន្តនិងវិស័យពាក់ព័ន្ធជាច្រើនទៀត»។

អ្នកឧកញ៉ា ហ៊ុន ឡាក់ បានមានប្រសាសន៍បន្តទៀតថា ៖ ក្រុមប្រឹក្សាធុរកិច្ចរួមឥណ្ឌា-កម្ពុជាបាន បោះជំហានយ៉ាងលឿនបំផុត ហើយភាពជោគជ័យនៃកិច្ចប្រជុំក៏ដូចជាពិធីប្រកាសជាផ្លូវការនេះពិតជាផ្តល់នូវសុទិដ្ឋិនិយមខ្ពស់។ ការពិភាក្សាដោយបើកចំហរ និងប្រកបដោយផ្លែផ្កាដែលភាគីទាំងពីរបានធ្វើនៅថ្ងៃនេះជាសក្ខីភាពនៃការប្តេជ្ញាចិត្តរួមគ្នារវាងធុរជន កម្ពុជា និងឥណ្ឌា ដើម្បីបង្កើតកាលានុវត្តភាពកម្រិតខ្ពស់បំផុតនៃកិច្ចសហប្រតិបត្តិការនៃវិស័យឯកជនរបស់ប្រទេសទាំងពីរ។

យោងសេចក្តីប្រកាសពត៌មានរបស់សមាគមឧកញ៉ាកម្ពុជា ក្រុមប្រឹក្សាធុរកិច្ចរួមគ្នានេះមាននាយកដ្ឋានជំរុញឧស្សាហកម្ម និងពាណិជ្ជកម្មផ្ទៃក្នុងប្រទេសជា លេខាធិការដ្ឋានសម្រាប់ភាគីឥណ្ឌា ចំណែកសមាគមឧកញ៉ាកម្ពុជាគឺជាលេខាធិការដ្ឋានសម្រាប់ភាគីកម្ពុជា។ ចំពោះកិច្ចប្រជុំ លើកដំបូងនៃក្រុមប្រឹក្សាធុរកិច្ចរួមឥណ្ឌា-កម្ពុជា បានធ្វើឡើងនៅរដ្ឋធានីញូវដែលីក្រោមការរៀបចំដោយ សហព័ន្ធសភាពាណិជ្ជកម្ម និងឧស្សាហកម្មឥណ្ឌា (FICCI) ខណៈដែលប្រតិភូនៃព្រះរាជាណាចក្រកម្ពុជាដឹកនាំដោយ ឯកឧត្តម ទិត រិទ្ធីពល អនុរដ្ឋលេខាធិការ ក្រសួងពាណិជ្ជកម្មអមដំណើរដោយធុរជនដែលជាថ្នាក់ដឹកនាំកំពូលៗនៃវិស័យឯកជននៅក្នុងប្រទេសកម្ពុជា។ សម្រាប់ប្រតិភូឥណ្ឌា ដឹកនាំដោយ លោក Rajesh Kumar Singh លេខាធិការនៃនាយកដ្ឋានជំរុញឧស្សាហកម្ម និងពាណិជ្ជកម្មផ្ទៃក្នុងប្រទេស និង ជាតំណាងក្រសួងពាណិជ្ជកម្ម និងឧស្សាហកម្មឥណ្ឌា។ នៅក្នុងពិធីសម្ពោធជាផ្លូវការនេះក៏មានការផ្គូផ្គងដៃគូវិនិយោគរវាងភាគីទាំង ពីរដោយរួមមានក្រុមធុរជនរបស់កម្ពុជាជាមួយនឹងក្រុមពាណិជ្ជកររបស់ឥណ្ឌាដែលសុទ្ធតែជាក្រុមហ៊ុនធំៗផងដែរ។

សហព័ន្ធសភាពាណិជ្ជកម្ម និងឧស្សាហកម្មឥណ្ឌា និងសមាគមឧកញ៉ាកម្ពុជា ក៏នឹងចុះហត្ថលេខារួមគ្នាលើឯកសារ យោងសំខាន់ៗដើម្បីបង្កើតនូវយន្តការនៃកិច្ចប្រជុំប្រជុំឆ្នាំរបស់ក្រុមប្រឹក្សាធុរកិច្ចរួមនេះដោយនឹងត្រូវធ្វើឡើងនៅក្នុងប្រទេសឥណ្ឌា ឬនៅក្នុងប្រទេសកម្ពុជាពោលគឺអាស្រ័យលើការសម្រេចរវាងភាគីទាំងពីរ។

ចំពោះចំណុចសំខាន់ៗផ្សេងទៀតនៃក្រុមប្រឹក្សាធុរកិច្ចរួមគ្នារវាងឥណ្ឌា-កម្ពុជារួមមាន៖ ក្រុមប្រឹក្សានេះនឹងដឹកនាំរួមគ្នាដោយថ្នាក់ដឹកនាំជាន់ខ្ពស់នៃវិស័យឧស្សាហកម្មនៃប្រទេសនីមួយៗ ការបញ្ចូលនូវសមាជិកមកពីពហុវិស័យដែលតំណាងឱ្យក្រុមហ៊ុនឯកជនដែលមានចំណាប់អាម្មណ៍លើការអភិវឌ្ឍន៍ សេដ្ឋកិច្ចរបស់ប្រទេសឥណ្ឌា និងកម្ពុជា និងយន្តការផ្លាស់ប្ដូរជាប្រចាំនូវព័ត៌មាន និងបទដ្ឋានគតិយុត្តនានាពាក់ព័ន្ធទៅនឹងពាណិជ្ជកម្ម, ការវិនិយោគ និងនិន្នាការទី ផ្សាររបស់ប្រទេសទាំងពីរព្រមទាំង ការផ្ដល់អនុសាសន៍ជូនរដ្ឋាភិបាលនៃប្រទេសទាំងពីរដើម្បីកែលម្អបរិយាកាសធុរកិច្ច វិនិយោគនិងការបំពេញអាជីវកម្មនានា។

លោកជំទាវ Devyani Khobragade ឯកអគ្គរដ្ឋទូតនៃសាធារណរដ្ឋឥណ្ឌាប្រចាំនៅព្រះរាជាណាចក្រកម្ពុជាបានមានប្រសា​ស​ន៍​ថា៖

« ក្រុមប្រឹក្សាធុរកិច្ចរួមឥណ្ឌា-កម្ពុជា (ICJBC) នឹងផ្តល់នូវឱកាសដល់វិស័យឯកជនរវាងប្រទេសទាំងពីរបានចូលរួមពេញសិទ្ធិនិងជាផ្លូវការកម្រិតខ្ពស់បំផុតមួយ ដែលមានការគាំទ្រពេញទំហឹងពីរដ្ឋាភិបាលដែលប្រាកដជានឹងជំរុញសកម្មភាពពាណិជ្ជកម្ម និងការវិនិយោគហើយពង្រឹងភាពជា ដៃគូទ្វេភាគីរវាងឥណ្ឌានិងកម្ពុជាកាន់តែខ្លាំងក្លាថែមទៀត។ ខ្ញុំសូមជូនពរគ្រប់ភាគីទាំងអស់ទទួលបាននូវភាពជោគជ័យ»។

ជាមួយគ្នានេះ អ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជាបានលើកឡើងថា ៖ «ពិធីប្រកាសជាផ្លូវការក្រុម ប្រឹក្សាធុរកិច្ចរួមឥណ្ឌា-កម្ពុជានេះ គឺជាបោះជំហានចូលទៅកាន់ទំព័រថ្មីនៃកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរ។ នេះ ជាគឺជាវេទិកាមួយដែលនឹងអនុញ្ញតឱ្យយើងកំណត់បាននូវបញ្ហាប្រឈម ថ្មីៗសម្រាប់បំពេញផលប្រយោជន៍សេដ្ឋកិច្ចជាតិទៅវិញទៅមក។» និងការប្រកួតប្រជែងនានាដើម្បីបង្កើតនូវកាលានុវត្តភាព»។

—