សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២២ ខែកញ្ញា ឆ្នាំ២០២៤ បានឱ្យដឹងថា កម្ពុជាបានសម្រេចជោគជ័យក្នុងការនាំចេញផលិតផលគ្រាប់ស្វាយចន្ទីជាលើកដំបូងចំនួន២តោន ក្រោយការបញ្ជាទិញចំនួន២០០តោន ក្នុងមួយឆ្នាំ ទៅកាន់ខេត្តហឺណាន នៃប្រទេសចិន។
ឯកឧត្តម ងិន ឆាយ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានថ្លែងក្នុងពិធីអបអរសាទរសម្រាប់ជើងយន្តហោះដឹកជញ្ជូនគ្រាប់ស្វាយចន្ទីកម្ពុជាលើកទីមួយទៅកាន់ប្រទេសចិនកាលពីថ្ងៃទី២២ ខែកញ្ញា ឆ្នាំ ២០២៤ ថា តាមផែនការ ខេត្តហឺណាន បញ្ជាទិញផលិតផលគ្រាប់ស្វាយចន្ទីចំនួន២០០តោនក្នុងមួយឆ្នាំ ហើយក្នុងជំហ៊ានលើកដំបូងនេះ ការនាំចេញត្រូវបានធ្វើឡើងត្រឹម២តោនប៉ុណ្ណោះ ដោយជារៀងរាល់សប្ដាហ៍ កម្ពុជានឹងបញ្ជូនគ្រាប់ស្វាយចន្ទីតាមជើងហោះហើរជាបន្តបន្ទាប់។
ឯកឧត្តម ងិន ឆាយ បានបញ្ជាក់ថា ៖
«រយៈពេល៨ ខែឆ្នាំ២០២៤ នេះ យើងបាននាំចេញគ្រាប់ស្វាយចន្ទីចំនួនប្រមាណ ៥៦ ម៉ឺនតោនរួចស្រេចទៅហើយ។ សម្រាប់កម្មវិធី ដែលយើងនាំផលិតផលគ្រាប់ស្វាយចន្ទីពីកម្ពុជាទៅខេត្តហឺណាន ដោយបញ្ជាទិញក្នុង ១ឆ្នាំ ចំនួន២០០តោន តែជាលើកដំបូងនេះយើងនាំចេញតែ២តោនប៉ុណ្ណោះ។ តែជារៀងរាល់សប្តាហ៍យើងនឹងបញ្ជូនផលិតផលគ្រាប់ស្វាយចន្ទីរបស់យើង ទៅតាមយន្តហោះអង្គរអ៊ែរទៅកាន់ប្រទេសចិន»។
ឯកឧត្តមបានបន្តឱ្យដឹងផងដែរថា ក្រៅពីទីផ្សារនៅប្រទេសចិន គ្រាប់ស្វាយចន្ទីកម្ពុជា ក៏បន្តការផ្សព្វផ្សាយ និងនាំចេញទៅប្រទេសជាច្រើនទៀត ដូចជា ប្រទេសអារ៉ាប់ ទីផ្សារសហភាពអឺរ៉ុប កូរ៉េ និងប្រទេសជប៉ុនជាដើម ដើម្បីពង្រីកទីផ្សារគ្រាប់ស្វាយចន្ទីកម្ពុជាឱ្យកាន់តែទូលាយ។
សូមជម្រាបដែរថា យោងតាមសមាគមស្វាយចន្ទីកម្ពុជា ក្នុងរយៈពេល៨ខែ ឆ្នាំ២០២៤ ការប្រមូលផលស្វាយចន្ទីកម្ពុជាសម្រេចបានចំនួនប្រមាណ ៨៧ ម៉ឺនតោន ក្នុងនោះនាំចេញទៅវៀតណាមប្រមាណ ៨០ ម៉ឺនតោន គិតជាទឹកប្រាក់ប្រមាណ ១,២០០ លានដុល្លារ ៕
Account
Security
Favourite Content