សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សហព័ន្ធស្រូវអង្ករកម្ពុជា និងក្រុមហ៊ុន Otis McAllister Inc. បានឯកភាពគ្នាដើម្បីជួយជំរុញវិស័យអង្កររវាងប្រទេសទាំងពីរឱ្យកាន់តែរីកធំឡើង ជាពិសេសការនាំចេញអង្ករដែលមានគុណភាពរបស់កម្ពុជាទៅសហរដ្ឋអាមេរិក។
ឧកញ៉ា សុង សារ៉ន ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា និង លោក Patrick Murphy អនុប្រធានប្រតិបត្តិទទួលបន្ទុកផ្នែកបញ្ជាទិញអង្ករ និងគ្រាប់ធញ្ញជាតិនៃក្រុមហ៊ុន Otis McAllister Inc. កាលពីថ្ងៃទី២២ ខែកញ្ញា ឆ្នាំ២០២៤ នាទីក្រុងសាន់ហ្វ្រាន់ស៊ីស្កូ បានចុះហត្ថលេខាលើអនុស្សារណៈនៃការយោគយល់គ្នាលើការលើកកម្ពស់វិស័យអង្ករនេះ ក្រោមវត្តមានឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ។
អនុស្សរណៈដែលបានចុះហត្ថលេខានាឱកាសនេះ គឺជាមូលដ្ឋានគ្រឹះសម្រាប់កិច្ចសហការនាពេលអនាគត ដើម្បីពង្រឹងកិច្ចសហប្រតិបត្តិការអាជីវកម្ម និងលើកកម្ពស់បន្ថែមទៀតនូវបរិមាណអង្ករកម្ពុជានៅក្នុងទីផ្សារសហរដ្ឋអាមេរិក។ ក្នុងនោះ សហព័ន្ធស្រូវអង្ករកម្ពុជា នឹងផ្តល់ជូននូវប្រភេទអង្ករដែលមានគុណភាពខ្ពស់ រួមមាន៖ អង្ករផ្កាម្លិះកម្ពុជា អង្ករសែនក្រអូបប្រភេទ SKO និង SRO ក៏ដូចជាអង្ករខ្សាយមួយចំនួនទៀត ជាមួយនឹងតម្លៃប្រកួតប្រជែង និងធានាការដឹកជញ្ជូនទាន់ពេលវេលា។
បន្ទាប់ពីការចុះអនុស្សារណៈនៃការយោគយល់គ្នានេះ វត្តមានអង្ករក្រោមស្លាកសញ្ញា “ផលិតនៅប្រទេសកម្ពុជា” រំពឹងថានឹងមានចំនួនកាន់តែច្រើនឡើងនៅក្នុងសហរដ្ឋអាមេរិក ជាពិសេស ក្នុងចង្កោមអាជីវកម្មផ្សារទំនើបខ្នាតយក្សដូចជា Costco និង WalMart ជាដើម។
លោក លន់ យេង អគ្គលេខាធិការសហព័ន្ធស្រូវអង្ករកម្ពុជា បានប្រាប់បណ្តាញសារពត៌មាន AMS ECONOMY នារសៀលថ្ងៃទី២៣ ខែកញ្ញាថា ៖ MOU នេះ មានសារៈសំខាន់ច្រើនណាស់ ហើយក្រុមហ៊ុន Otis កំពុងតែទិញអង្ករពីកម្ពុជា ដូច្នេះ វាជាការបើកផ្លូវរយៈពេលវែង។
លោក លន់ យេង បានបញ្ជាក់ឱ្យដឹងថា៖
សម្រាប់ឆ្នាំទី១ ខាងភាគីអាមេរិក នឹងទិញអង្ករចាប់ពីខ្ទង់ជាង ១០០០តោនឡើងទៅ ហើយដល់ឆ្នាំទី៥ ក្រុមហ៊ុន Otis នឹងទិញ ៥ម៉ឺនតោន» ។
គួរជម្រាបថា ក្នុងរយៈពេល៧ខែ ឆ្នាំ២០២៤នេះ កម្ពុជាបាននាំចេញអង្ករចំនួន ៣៧៩ ៥៤៦ តោនទៅកាន់ទីផ្សារ គោលដៅចំនួន ៦៤ ប្រទេស ដោយទទួលបានទឹកប្រាក់ជាង ២៨០លានដុល្លារ។ នេះបើយោងតាម របាយការណ៍ របស់សហព័ន្ធស្រូវអង្ករកម្ពុជា ការនាំចេញអង្ករបានធ្វើឡើង តាមរយៈ ក្រុមហ៊ុននាំចេញអង្ករចំនួន ៥៣ ក្រុមហ៊ុន។ ដោយឡែកក្រៅពីការនាំចេញនូវចំនួនបរិមាណខាងលើនេះ ស្រូវអង្ករកម្ពុជាដែលកំពុងមានតម្រូវការទីផ្សារ និងតម្លៃថ្លៃ រួមមានប្រភេទពូជស្រូវសែនក្រអូប០១ ប្រភេទផ្ការំដួលដែលទទួលបានពានរង្វាន់ក្នុងនាមជាអង្ករដែលល្អ មានរសជាតិឆ្ងាញ់នៅលើពិភពលោក រួមជាមួយនឹងប្រភេទមួយចំនួនទៀតដែលជាពូជរបស់ជាតិកម្ពុជា៕
Account
Security
Favourite Content