ភ្នំពេញ ៖ សមាគមវាយនភណ្ឌ​ សម្លៀក​បំពាក់ ស្បែកជើង និងផលិតផល​ធ្វើដំណើរកម្ពុជា ហៅកាត់ថា ( TAFTAC ) បាន​រៀបចំសន្និបាតលើកទី១៧ និងបោះឆ្នោតជ្រើសរើស​ប្រធានថ្មី កាលពីថ្ងៃទី​១៧ ខែមករា ឆ្នាំ២០២៦ ។​ សន្និបាតនេះ ក៏មានការ​ចូលរួមពី​ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈផងដែរ ព្រមទាំង​សមាជិក​របស់សមាគ​ជាច្រើន​នាក់​ទៀត។

នៅក្នុងឱកាស​នោះឯកឧត្តម ហេង សួរ បានអបអរសាទរចំពោះលោក HE ENJIA ដែលត្រូវបានអង្គសន្និបាតបោះឆ្នោតជ្រើសតាំងជាប្រធានសមាគម TAFTAC សម្រាប់អាណត្តិទី១៧ (២០២៦-២០២៨)ដោយ ឯកឧត្តមបានវាយតម្លៃខ្ពស់ចំពោះសមាគម TAFTAC ដែលបានដើរតួយ៉ាងសំខាន់ជាដៃគូដែលអាចជឿទុកចិត្តបានរបស់រាជរដ្ឋាភិបាល និយោជក និងជាដៃគូដ៏ល្អរបស់កម្មករនិយោជិត ក្នុងការចរចា និងពិភាក្សាការងារផ្សេងៗ សំដៅរក្សា និងពង្រីកវិស័យនេះ ព្រមទាំងរួមចំណែកជំរុញលើកកម្ពស់លក្ខខណ្ឌការងារ សុខុមាលភាព និងសិទ្ធិការងារនៅកម្ពុជា ។ ជាមួយគ្នានេះ ឯកឧត្តមរដ្ឋមន្ត្រីក៏បានជឿជាក់យ៉ាងមុតមាំថា ការដឹកនាំថ្មីនេះនឹងធ្វើឱ្យសមាគមបន្តស្មារតីសាមគ្គីភាពដ៏រឹងមាំ ដើម្បីក្លាយជាកម្លាំងចលករក្នុងការទាក់ទាញវិនិយោគិនថ្មីៗ និងបង្កើនទំនុកចិត្តជូនអ្នកវិនិយោគដែលមានស្រាប់។

ឯកឧត្តម​ ហេង សួរ បានមានប្រសាសន៍ថា ភាពជោគជ័យនៃអាណត្តិថ្មីនេះ នឹងនាំមកនូវផលប្រយោជន៍ដោយផ្ទាល់ដល់និយោជក និងកម្មករនិយោជិត តាមរយៈការបង្កើតការងារ និងប្រាក់ចំណូល ព្រមទាំងរួមចំណែកយ៉ាងសំខាន់ក្នុងការរក្សាស្ថិរភាពម៉ាក្រូសេដ្ឋកិច្ច និងពិពិធកម្មរចនាសម្ព័ន្ធឧស្សាហកម្មកម្ពុជា ឱ្យស្របតាមចក្ខុវិស័យវែងឆ្ងាយរបស់រាជរដ្ឋាភិបាល។

គួររម្លឹកថា​ ក្នុងរយៈពេល ២៩ឆ្នាំមកនេះ សមាគម TAFTAC បានដើរតួនាទីជាតំណាងសំឡេងរួមតែមួយរបស់វិនិយោគិន ការពារ និងលើកកម្ពស់សិទ្ធិ និងប្រយោជន៍ស្របច្បាប់របស់វិនិយោគិនទាំងអស់ និងបានបង្កើតនូវវេទិកាសម្រាប់ការប្រឹក្សាយោបល់ និងកិច្ចសន្ទនាសង្គមនានាជាមួយគ្រប់ភាគីពាក់ព័ន្ធ ដើម្បីបង្កើតនូវបរិយាកាសវិនិយោគដែលអំណោយផលដល់កំណើននៃការនាំចេញ និងការអភិវឌ្ឍប្រកបដោយចីរភាព។ ការនាំចេញផលិតផលទាំងនេះក្នុងឆ្នាំ២០២៥ មានតម្លៃប្រមាណ ១៥,៧ពាន់លានដុល្លារអាមេរិក កើនឡើងពីតម្លៃប្រមាណ ១៣,៥ពាន់លានដុល្លារ ក្នុងឆ្នាំ២០២៤ (កើនឡើង ១៥,៨%)។

ចាប់ពីដើមអាណត្តិទី៧ រហូតមកដល់ដំណាច់ឆ្នាំ២០២៥ ចំនួនរោងចក្រ សហគ្រាស គ្រឹះស្ថាន ដែលបានចុះបញ្ជីនៅក្រសួងបានកើនឡើងដល់ ៤៦ ៦៤៩សហគ្រាស និងចំនួនកម្មករនិយោជិតកើនដល់ ២ ១៤១ ២៤១នាក់។

ទន្ទឹមនឹងនេះ ឯកឧត្តមរដ្ឋមន្ត្រី ក៏បានផ្ដល់អនុសាសន៍ដល់ TAFTAC ឱ្យបន្តបង្កើនជំនឿទុកចិត្តរបស់សមាជិកភាព ប្រកបដោយតម្លាភាព គណនេយ្យភាព ប្រសិទ្ធភាព និងវិជ្ជាជីវៈ ព្រមទាំងបន្តជំរុញកិច្ចការអាទិភាពក្នុងស្មារតីបុរេសកម្មជាមួយគម្រោង ILO-BFC និងចូលរួមយុទ្ធនាការ «សហគ្រាសមួយ ជាសហគមន៍សុខសាន្តមួយ» ដើម្បីពង្រឹងវប្បធម៌អនុលោមភាព និងសុខដុមនីយកម្មនៃទំនាក់ទំនងវិជ្ជាជីវៈ។

លោក HE ENJIA ប្រធានសមាគមវាយនភណ្ឌ សម្លៀក​បំពាក់ ស្បែកជើង និងផលិតផល​ធ្វើដំណើរការ​នៅកម្ពុជា​ដែលទើបជាប់ឆ្នោតអាណត្តិថ្មី បាន​ប្ដេជ្ញា​ដឹកនាំ​សមាគម​ឱ្យក្លាយជា​សមាគម​ដែលមានការរួបរួម​គ្នារវាង​សមាជិកទាំងអស់ ត្រូវ​បន្តធ្វើជា​តំណាង​ឱ្យសម្លេង​រួម​របស់ក្រុមហ៊ុនផលិតធំៗ​ មធ្យម និង​តូច​ទាំងអស់ ដោយលើកទឹកចិត្ត​ឱ្យសមាជិក​ទាំងអស់អាច​ចូលរួមជា​យោបល់ មតិ​ ការចែករំលែក​ពីកង្វល់ដោយតម្លាភាព និង​បើក​ចំហ ។ ក្រៅពីនេះដែរ សមាគម​នឹង​បន្ត​ធ្វើជា​ដៃគូដែលគួរឱ្យ​ទុក​ចិត្ត​របស់រាជរដ្ឋាភិបាលកម្ពុជា ដោយក្នុងរយៈពេល​៣ឆ្នាំខាងមុខ សមាគម​នឹង​បន្តធ្វើការ​យ៉ាង​ជិត​ស្និទ្ធជា​មួយក្រសួងស្ថាប័នពាក់ព័ន្ធ លើ​គោល​នយោបាយ​ការងារ ទំនាក់ទំនង​ឧស្សាហកម្ម ពន្ធដារ ការ​សម្រ​បសម្រួល​ពាណិជ្ជកម្ម ថាមពល និងកំណែទម្រង់​បទប្បញ្ញត្តិ​  ។

គួររម្លឹកថា ក្នុងរយៈពេល​២ឆ្នាំកន្លងទៅ( ២០២៤-២០២៥) សមាគម​វាយនភណ្ឌ សម្លៀក​បំពាក់ ស្បែកជើង និងផលិតផលធ្វើដំណើរ​កម្ពុជា បានពង្រឹង​តួនាទីរបស់ខ្លួនជា​តំណាង​ឈានមុខគេនៃវិស័យ​នាំចេញធំជាងគេរបស់ប្រទេស ។ តាមរយៈការពង្រីក​សមាជិក​ភាព ការតស៊ូមតិ គោល​នយោបាយ​កាន់តែរឹង​មាំ ការកសាងសមត្ថភាព និងការ​ចូលរួមយ៉ាង​សកម្មជាមួយ​រាជរដ្ឋាភិបាល និងដៃគូអន្តរជាតិ សមាគម​បាន​ជួយការពារ​សមត្ថភាពប្រកួត​ប្រជែង​នៃវិស័យ​វាយនភណ្ឌ​ សម្លៀក​បំពាក់ ស្បែកជើង និងផលិតផលធ្វើដំណើរ​នៅកម្ពុជា លើ​កកម្ពស់​និរន្ត​រភាព​ និងរក្សា​ការចូលទីផ្សារ​ប្រកបដោយ​ស្ថិរភាព ៕