សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កម្ពុជាបានក្លាយជាប្រទេសនាំចេញអង្ករ (ទាំងស្រូវ និងអង្ករ) ឈរនៅលេខរៀងទី៧លើពិភពលោក នៅឆ្នាំ២០២៣ និងឆ្នាំ២០២៤។
ឯកឧត្តម បណ្ឌិត យ៉ង សាំងកុមារ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ក្នុងមួយឆ្នាំ កម្ពុជាផលិតស្រូវបានជាង ១២ លានតោន ឬជាង ៧លានតោនអង្ករ ដែលលើសពីតម្រូវការក្នុងស្រុកប្រមាណ៥០ ភាគរយ។ ដោយឡែកនៅក្នុងរយៈពេល៤ ខែឆ្នាំ២០២៤ នេះបរិមាណនាំចេញកើនឡើងថែមជាង ៣០ ភាគរយបើធៀបទៅនឹងរយៈពេល៤ខែដូចគ្នានៅឆ្នាំ២០២៣។
ឯកឧត្តមបណ្ឌិតបានបញ្ជាក់ថា ៖
« វិស័យស្រូវអង្ករកម្ពុជា មិនត្រឹមតែជោគជ័យក្នុងការផលិតស្បៀងសម្រាប់ធានាបានសន្តិសុខស្បៀងជូនជាតិទេ គឺថែមទាំងចូលរួមចំណែកដល់សន្តិសុខស្បៀងពិភពលោកផងដែរ។ គោលដៅទៅមុខរបស់យើងគឺបន្តធានាសន្តិសុខស្បៀងប្រកបដោយនិរន្តរភាពសេដ្ឋកិច្ច និងបរិស្ថាន ជាពិសេសគាំទ្រឲ្យមានការបង្កើនប្រាក់ចំណូលជូនកសិករដែលជាអ្នកផលិតស្បៀង»។
យ៉ាងណាក៏ដោយ បើទោះបីជាកម្ពុជាឈរនៅលេខរៀងទី៧លើពិភពលោកក៏ដោយ ក៏កម្ពុជានៅតែខិតខំក្នុងការនាំចេញជាចម្បងដោយកាលពីថ្ងៃទី៤ ខែឧសភា ឆ្នាំ២០២៤ សហព័ន្ធស្រូវអង្ករកម្ពុជា សហការជាមួយ The Rice Trader (TRT) បានរៀបចំកម្មវិធីជជែកពិភាក្សា និងបទបង្ហាញអំពីការនាំចេញអង្ករកម្ពុជា និងការប្ដូរនិន្នាការទីផ្សារពិភពលោក ក្រោមអធិបតីភាពដ៏ខ្ពង់ខ្ពស់របស់ ឯកឧត្តម សុខ ពុទ្ធិវុធ រដ្ឋលេខធិការក្រសួងប្រៃសណីយ៍ និងទូរគមនាគមន៍ និងជាប្រធានកិត្តិយសនៃសហព័ន្ធស្រូវអង្ករកម្ពុជា។
ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា ក្នុងគោលបំណងចែករំលែកនូវចំណេះដឹងពាក់ព័ន្ធនឹងស្ថានភាពទីផ្សារអន្តរជាតិ និងការរៀបចំផែនការដើម្បីប្រកបអាជីវកម្មនៅក្នុងវិស័យស្រូវអង្ករ បានបង្ហាញពីទិដ្ឋភាពទីផ្សារកម្ពុជា ធៀបទៅនឹងប្រទេសប្រកួតប្រជែងនៅលើទីផ្សារអន្តរជាតិ ដើម្បីជាផ្លូវមួយដែលអាចស្វែងរកគន្លឹះបន្ថែមក្នុងការជំរុញទីផ្សារអង្ករកម្ពុជាឱ្យកាន់តែរីកលូតលាស់បន្ថែមទៀត។
សូមជម្រាបដែរថា នៅត្រីមាសទី១ ឆ្នាំ២០២៤ កម្ពុជានាំចេញអង្គរបានចំនួន ១៦៦ ៤៥១តោន ទៅទីផ្សារអន្តរជាតិ ដែលគិតជាទឹកប្រាក់ប្រមាណ១២៣លានដុល្លារ។ ក្នុងរយៈពេលដូចគ្នានេះ កម្ពុជា ក៏បាននាំចេញស្រូវទៅកាន់ប្រទេសជិតខាងក្នុងបរិមាណ ២ ២២០ ៧២៩ តោន ដែរ ដោយគិតជាទឹកប្រាក់ប្រមាណ ៦០០លានដុល្លារ។ សរុបទឹកប្រាក់ដែលកម្ពុជាទទួលបានពីការនាំចេញស្រូវ និងអង្គរនេះមានប្រមាណ ៧២៣លានដុល្លារ។ នេះបើយោងតាមរបាយការណ៍របស់សហព័ន្ធស្រូវអង្ករកម្ពុជា៕
Account
Security
Favourite Content