សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជាបន្តស្វាគមន៍យ៉ាងកក់ក្ដៅចំពោះវិនិយោគិនចិន និងអន្តរជាតិមកពីបណ្ដាប្រទេសផ្សេងទៀត ក្នុងការស្វែងរកឱកាសវិនិយោគនៅក្នុងប្រទេសកម្ពុជាលើវិស័យជាច្រើន ដូចជាវិស័យឧស្សាហកម្ម ហេដ្ឋារចនាសម្ព័ន្ធ ភស្តុភារកម្ម ថាមពលបៃតង ឌីជីថល និងទេសចរណ៍ជាដើម ។
នៅក្នុងឱកាសអញ្ជើញចូលរួមថ្លែងសុន្ទរកថាគន្លឹះ ក្នុងវេទិកាវិនិយោគពេលអនាគត ដែលរៀបចំឡើងដោយអង្គការសហប្រជាជាតិស្ដីពីពាណិជ្ជកម្ម និងការអភិវឌ្ឍ ក្នុងភាពជាដៃគូជា ជាមួយព្រឹត្តិការណ៍ពិព័រណ៍អន្តរជាតិចិន សម្រាប់ការវិនិយោគ និងពាណិជកម្ម នៅខេត្តហ្វូជៀន ប្រទេសចិន កាលពីថ្ងៃទី០៨ ខែកញ្ញា ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានប្រកាសស្វាគមន៍យ៉ាងកក់ក្ដៅចំពោះវិនិយោគិនចិន និងវិនិយោគិនមកពីបណ្ដាប្រទេសផ្សេងទៀត ដែលមានបំណងស្វែងរកឱកាសវិនិយោគនៅក្នុងប្រទេសកម្ពុជា ។
នៅក្នុងឱកាសជាមួយគ្នានេះ ឯកឧត្តមបានថ្លែងអំណរគុណចំពោះរដ្ឋាភិបាលចិន និងគ្រប់ភាគីពាក់ព័ន្ធទាំងអស់ ដែលបានរៀបចំវេទិកានេះឡើង ។
ឯកឧត្តមបានមានប្រសាសន៍ថា បច្ចុប្បន្នរាជរដ្ឋាភិបាលកម្ពុជា តាមរយៈក្រុមប្រឹក្សាអភិវឌ្ឍន៍កម្ពុជា បាន និងកំពុងខិតខំប្រឹងប្រែងទាក់ទាញវិនិយោគិនមកកម្ពុជា ដោយហេតុថា កម្ពុជាបានផ្ដល់ឱកាសវិនិយោគជាច្រើនដោយផ្អែកលើសក្ដានុពលដែលអាចផ្ដល់ជូន ។ សក្ដានុពលទាំងនោះ មានដូចជា ទីតាំងយុទ្ធសាស្ត្រចំបេះដូងនៃតំបន់អាស៊ាន តភ្ជាប់ខ្វាត់ខ្វែងនូវហេដ្ឋារចនាសម្ព័ន្ធ ផ្លូវថ្នល់ កំពង់ផែ និងផ្លូវអាកាស , បរិយាកាសវិនិយោគបើកចំហ និងប្រកួតប្រជែង កម្លាំងពលកម្មវ័យក្មេង និងប្រកបដោយថាមវ័ន្ត ទីផ្សារទូលំទូលាយ តាមរយៈសមាជិកភាពនៃអាស៊ាន អង្គការពាណិជ្ជកម្មពិភពលោក និងក្របខណ្ឌនានាផ្សេងទៀត ជាពិសេសមានរដ្ឋាភិបាលគាំទ្រដល់ភាពរីកលូតលាស់របស់វិនិយោគិន ។
ឯកឧត្តមឧបនាយករដ្ឋមន្ត្រី បានបន្តថា តាមរយៈកិច្ចព្រមព្រៀងពាណិជ្ជកម្មសេរីកម្ពុជា -ចិន និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (អាសិប) កំពុងធ្វើឱ្យស៊ីជម្រៅលើការធ្វើពាណិជ្ជកម្ម ការវិនិយោគ និងកិច្ចសហប្រតិបត្តិការបច្ចេកវិទ្យាផងដែរ ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា ក្នុងរយៈពេល៨ខែ ដើមឆ្នាំ ២០២៥នេះ កម្ពុជាទទួលបានគម្រោងវិនិយោគសរុប៤៩១គម្រោង ដោយមានទុនវិនិយោគសរុបចំនួន៧,២ពាន់លានដុល្លារអាម៉េរិក ក្នុងនោះប្រភពទុនវិនិយោគវិនិយោគមកពីប្រទេសចិនមានទឹកប្រាក់រហូតដល់ជិត៤ពាន់លានដុល្លារអាម៉េរិក ឬស្មើនឹងប្រមាណ៥២,៨២ភាគរយនៃប្រភពទុនវិនិយោគសរុប ។ តាមរយៈការដាក់ទុនវិនិយោគជាបន្តបន្ទាប់របស់វិនិយោគិនចិន បានធ្វើឱ្យចិនឈរលំដាប់ទី១នៅកម្ពុជា ជាប្រទេសដែលមានវិនិយោគិនដាក់ទុនវិនិយោគច្រើនជាងគេ និងមានគម្រោងវិនិយោគធំៗលេចធ្លោរជាងគេផងដែរ ។
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា កម្ពុជាបើកចំហចំពោះការវិនិយោគពីបរទេសដោយមិនប្រកាន់ឡើយ ហើយកម្ពុជាក៏បានបន្តទាក់ទាញការវិនិយោគពីបណ្ដាប្រទេសនានា មិនថាចិន អាម៉េរិក ឬអឺរ៉ុបឡើយ ៕
Account
Security
Favourite Content