បរទេស៖ ចិនបានសម្រេចលុបចោលជើងហោះហើរ ៤៩ ខ្សែទៅកាន់ប្រទេសជប៉ុន ខណៈដែលក្រសួងការបរទេសចិនបានព្រមានពលរដ្ឋរបស់ខ្លួនម្តងទៀតអំពីសុវត្ថិភាពក្នុងការធ្វើដំណើរ ជាពិសេសក្នុងអំឡុងពេលថ្ងៃឈប់សម្រាកចូលឆ្នាំចិនខាងមុខនេះដោយសារបញ្ហាសុវត្ថិភាព និងការធានាសន្តិសុខទេសចរ នេះបើយោងតាមសេចក្ដីរាយការណ៍ពី CNA ។

យោងតាមការចេញផ្សាយដោយកម្មវិធីទេសចរណ៍ចិន Flight Master បានបង្ហាញថា អត្រានៃការលុបចោល ឬ cancel សំបុត្រយន្តហោះរវាងចិនដីគោក និងជប៉ុន បានឈានកើន ៤២,៧% ហើយនៅក្នុងខែមករា ឆ្នាំ២០២៦នេះ។ មិនត្រឹមតែប៉ុណ្ណោះ កាលវិភាគនៃជើងហោះហើរចំនួន ៤៩ ខ្សែ ដែលគ្រោងទុកក្នុងខែកុម្ភៈ ក៏ត្រូវបានលុបចោលដែរ។ ការលុបចោលនេះប៉ះពាល់ដល់ជើងហោះហើរចំនួន ១១៩ ជើងរវាងអាកាសយានដ្ឋានអន្តរជាតិ Daxing របស់ទីក្រុងប៉េកាំង និងអាកាសយានដ្ឋានអន្តរជាតិ Kansai របស់ទីក្រុងអូសាកា រួមជាមួយ ជើងហោះហើរចំនួន ១៣ ផ្សេងទៀត រវាងអាកាសយានដ្ឋានអន្តរជាតិ Bao’an របស់ទីក្រុងសិនជិន និងអាកាសយានដ្ឋាន New Chitose របស់កោះហុកកៃដូ។ ទន្ទឹមនឹងនេះ បណ្តាក្រុមហ៊ុនអាកាសចរណ៍របស់ចិនរួមមាន Air China, China Eastern និង China Southern Airlines ក៏បានបន្តការផ្លាស់ប្តូរជើងហោះហើរ និងគោលការណ៍សងប្រាក់វិញសម្រាប់ការធ្វើដំណើរទៅជប៉ុនរហូតដល់ថ្ងៃទី ២៤ ខែតុលា ឆ្នាំ២០២៦ ខណៈដែលកាលពីមុន គោលការណ៍សងប្រាក់វិញ និងការផ្លាស់ប្តូរអាចអនុវត្តបានរហូតត្រឹមថ្ងៃទី ២៨ ខែមីនា តែប៉ុណ្ណោះ។

នៅក្នុងសេចក្តីថ្លែងការណ៍មួយកាលពីថ្ងៃចន្ទ សប្ដាហ៍នេះ ក្រុមហ៊ុនអាកាសចរណ៍ Air China បានប្រកាសថា សំបុត្រយន្តហោះដែលចេញមុនថ្ងៃទី ២៦ ខែមករា និងមានកាលបរិច្ឆេទធ្វើដំណើរចាប់ពីថ្ងៃទី ២៩ ខែមីនា ដល់ថ្ងៃទី ២៤ ខែតុលា ជើងហោះហើរទៅ-មកពីប្រទេសជប៉ុន មានសិទ្ធិទទួលបានការផ្លាស់ប្តូរជើងហោះហើរ ឬ ស្នើសុំការសងប្រាក់វិញ។ នេះគឺជាគោលការណ៍ថ្មី និងជាលើកដំបូងរបស់ Air China បើគិតចាប់តាំងពីមានភាពតានតឹងរវាងទីក្រុងប៉េកាំង និងទីក្រុងតូក្យូ ជុំវិញបញ្ហាពាក់ព័ន្ធជាមួយកោះតៃវ៉ាន់តាំងពីខែវិច្ឆិកា ឆ្នាំ២០២៥ កន្លងទៅនេះ។

ជាថ្មីម្ដងទៀត ក្រសួងការបរទេសចិន បានព្រមានដល់ពលរដ្ឋរបស់ខ្លួនឲ្យចៀសវាងការធ្វើដំណើរទៅលេងប្រទេសជប៉ុនក្នុងអំឡុងពេលថ្ងៃឈប់សម្រាកនាឱកាសចូលឆ្នាំចិនខាងមុខនេះ ក្រោមហេតុផលថា ថ្មីៗនេះ បញ្ហាសន្តិសុខសាធារណៈនៅក្នុងប្រទេសជប៉ុនកាន់តែយ៉ាប់យ៉ឺន ដោយមានឧប្បត្តិហេតុនៃអំពើខុសច្បាប់ និងឧក្រិដ្ឋកម្ម ដោយជាញឹកញាប់ សំដៅលើពលរដ្ឋចិន ដែលធ្វើឲ្យពួកគេប្រឈមមុខនឹងការគំរាមកំហែងសន្តិសុខយ៉ាងធ្ងន់ធ្ងរ។

សូមជម្រាបថា ជនជាតិចិន គឺជាប្រភពភ្ញៀវទេសចរដ៏ធំបំផុតរបស់ជប៉ុន ដែលមានប្រមាណជិត ៧,៥ លាននាក់ក្នុងរយៈពេល ៩ ខែដំបូងនៃឆ្នាំ២០២៥ ឬស្មើនឹង ១ ភាគ ៤ នៃភ្ញៀវទេសចរបរទេសសរុបរបស់ជប៉ុន លើសពីនេះ ជប៉ុន អាចរកចំណូលបានប្រមាណ ៣,៧ ពាន់លានដុល្លារពីភ្ញៀវទេសចរចិននៅក្នុងត្រីមាសទី៣។ យ៉ាងណាមិញ ភាពតានតឹងនៃទំនាក់ទំនងការទូតរវាងចិន​ និង ជប៉ុនបានធ្វើឲ្យចំនួន​ភ្ញៀវ​ទេសចរ​ចិន​ធ្លាក់​ចុះ​ប្រហែល ៤៥% ឬ នៅត្រឹម ៣៣ ម៉ឺននាក់ បើធៀប​នឹង​រយៈពេលដូចគ្នាកាលពីឆ្នាំ​២០២៤៕