សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ នៅក្នុងរយៈពេលស្ទើរពេញមួយឆ្នាំ២០២៥ សកម្មភាពសេដ្ឋកិច្ចរបស់ប្រទេសចិនត្រូវបានគេសង្កេតឃើញថា មានដំណើរការល្អលើសពីការរំពឹងទុក ដោយសារភាពតានតឹង និងសម្ពាធពាណិជ្ជកម្មមួយចំនួនត្រូវបានកាត់បន្ថយ ជាពិសេស តម្រូវការប្រើប្រាស់នៅក្នុងមានសន្ទុះកើនឡើងលឿន នេះបើយោងតាមសេចក្ដីរាយការណ៍ពី Asia News។
នៅក្នុងសន្និសីទសារព័ត៌មានស្ដីពីសេដ្ឋកិច្ចចិនប្រចាំឆ្នាំ២០២៥ នៅឯទីក្រុងប៉េកាំង លោក Han Wenxiu នាយករងប្រតិបត្តិការិយាល័យគណៈកម្មាធិការកណ្តាលសម្រាប់កិច្ចការហិរញ្ញវត្ថុ និងសេដ្ឋកិច្ច បានលើកឡើងថា សូចនាករសេដ្ឋកិច្ចសំខាន់ៗបានយកឈ្នះលើការព្យាករណ៍ ខណៈដែលទីផ្សារការងារនៅតែមានស្ថិរភាព ហើយពាណិជ្ជកម្មក្រៅប្រទេសមានការកើនឡើង និងបន្តភាពរឹងមាំ។ ជាមួយគ្នានេះ ការធ្វើពិពិធកម្មលើការនាំចេញកាន់តែមានភាពប្រសើរ ខណៈដែលកិច្ចពន្លឿនការសាងសង់ប្រព័ន្ធឧស្សាហកម្មឲ្យកាន់តែទំនើបក៏មានភាពមមាញឹក។ ជាលទ្ធផល កម្លាំងសេដ្ឋកិច្ចសរុបរបស់ចិនបានកើនឡើងគួរឲ្យកត់សម្គាល់ ដោយសារផលិតផលក្នុងស្រុកសរុបប្រចាំឆ្នាំរបស់ប្រទេសនេះបានកើនឡើងរាល់ឆ្នាំជាបន្តបន្ទាប់ ពោលគឺកើនឡើងលើសពី ១១០ ទ្រីលានយ័ន (១៥,៦ ទ្រីលានដុល្លារ) ក្នុងឆ្នាំ២០២១, ១២០ ទ្រីលានយ័ន (១៧ ទ្រីលានដុល្លារ) ក្នុងឆ្នាំ២០២២ និង ១៣០ ទ្រីលានយ័ន (១៨,៤ ទ្រីលានដុល្លារ) ក្នុងឆ្នាំ២០២៤។ ដោយឡែក នៅក្នុងឆ្នាំ២០២៥ នេះ ត្រូវបានគេព្យាករណ៍ថា នឹងឈានដល់ប្រហែល ១៤០ ទ្រីលានយ័ន (ជិត ២០ ទ្រីលានដុល្លារ)។
លោក Han បានបន្តលើកឡើងថា កម្លាំងផលិតភាពមានការកើនឡើងជាលំដាប់ ដោយចិនបានជាប់ចំណាត់ថ្នាក់ក្នុងចំណោមប្រទេសនាំមុខគេនៅលើពិភពលោកខាងផ្នែកស្រាវជ្រាវ ការអនុវត្តបញ្ញាសិប្បនិម្មិត វេជ្ជសាស្ត្រ និងមនុស្សយន្ត។ បន្ថែមពីនេះ អាជ្ញាធរបានជំរុញការកសាងទីផ្សារក្នុងស្រុក និងបង្កើនកិច្ចខិតខំប្រឹងប្រែងដើម្បីទប់ស្កាត់ការប្រកួតប្រជែងគ្មានតម្លាភាព។ ទីផ្សារមូលធនកាន់តែសកម្ម ដោយសារការកើនឡើងនូវទំនុកចិត្តក្នុងចំណោមវិនិយោគិនក្នុងស្រុក និងក្រៅប្រទេស។ មិនត្រឹមតែប៉ុណ្ណោះ ចិនបានអនុវត្តកិច្ចការពារពីហានិភ័យ និងការដោះស្រាយបញ្ហាក្នុងវិស័យសំខាន់ៗបានផ្តល់នូវលទ្ធផលជាក់ស្តែងនៅឆ្នាំនេះ។
លោក Han បន្ថែមថា កំណែទម្រង់ និងការកាត់បន្ថយហានិភ័យនៅតាមស្ថាប័នហិរញ្ញវត្ថុក្នុងស្រុកធំៗបានដំណើរការយ៉ាងរលូន បានជួយធ្វើឱ្យលំហូរសាច់ប្រាក់របស់សាជីវកម្មមានស្ថិរភាពជាងមុន។ គួរបញ្ជាក់ដែរថា សន្និសីទសេដ្ឋកិច្ចចិនប្រចាំឆ្នាំត្រូវបានរៀបចំដោយមជ្ឈមណ្ឌល China Center for International Economic Exchanges នៅទីក្រុងសៀងហៃ ដោយបានប្រមូលផ្តុំអ្នកបង្កើតគោលនយោបាយ អ្នកសេដ្ឋកិច្ច និងអ្នកដឹកនាំធុរកិច្ច ដើម្បីពិភាក្សាអំពីលទ្ធផលសេដ្ឋកិច្ចរបស់ប្រទេសចិនសម្រាប់ឆ្នាំ២០២៥ និងទស្សនវិស័យសម្រាប់ឆ្នាំបន្ទាប់ ២០២៦៕
Account
Security
Favourite Content