ភ្នំពេញ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី១៤ ខែធ្នូ ឆ្នាំ២០២៥ បានអញ្ជើញដឹកនាំកិច្ចប្រជុំ​កម្ម​វិធី​ដំណើរទស្សនកិច្ចបណ្តាអ្នកសារព័ត៌មាន ក្រោមប្រធានបទស្តីពី «ពង្រឹងការ​គ្រប់​គ្រង​ជល​ផលសមុទ្រតាមរយៈការតាមដាន ត្រួតពិនិត្យ និងការឃ្លាំ​មើល​តាមបែបឌីជីថល» ដែលកម្មវិធីនេះប្រព្រឹត្តទៅនៅខេត្ត​ព្រះសី​ហនុ ចាប់ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០២៥។

កិច្ចប្រជុំដែលរៀបចំឡើងនៅទីស្តីការក្រសួងកសិកម្ម រុក្ខាប្រមាញ់ និង​នេសាទ មុនចេញដំណើរទៅខេត្តព្រះសីហនុ មានការចូលរួមពី លោក ស្រ៊ុន លឹម​​សុង អនុប្រធានរដ្ឋបាលជលផល លោក បួយ រតនា អនុ​ប្រធាន​​រដ្ឋបាល​ជលផល លោក Ehsan Kabir, ប្រធានក្រុមទំនាក់ទំនងនៃអង្គការ FAO លោក Norberto Estepa ទីប្រឹក្សាបច្ចេកទេស គ្រប់គ្រងគម្រោងជលផល នៃអង្គការFAO រួមជាមួយអ្នកសារព័ត៌មាន​១៨នាក់ មកពី១០ស្ថាប័នព័ត៌មាន សរុបអ្នកចូលរួមជាង៣០នាក់។

ដំណើរទស្សនកិច្ចដែលរៀបចំសហការពីក្រសួងកសិកម្ម រដ្ឋបាលជល​ផល អង្គការ FAO ក្រោមជំនួយហិរញ្ញប្បទានពីសហភាពអឺរុប ធ្វើឡើង​ក្នុងគោលបំណងពិនិត្យមើលអំពីការប្រើប្រាស់ប្រព័ន្ធឌីជីថល ការបំពាក់​ប្រព័ន្ធគ្រប់គ្រងនាវា VMS និងអត្ថប្រយោជន៍VMS សម្រាប់ការគ្រប់​គ្រង​ជលផលសមុទ្រប្រកប​ដោយចីរភាព និងការយល់ដឹងពីការប្រើប្រាស់​ឧបករណ៍ឌីជីថលនេះនៅតំបន់សមុទ្រ។

លោកជំទាវ អុឹម រចនា បានគូសបញ្ជាក់ថា៖ កិច្ច​សហការ​រៀបចំដំណើរទស្សនកិច្ចរបស់អ្នកសារព័ត៌មានជាមួយអង្គកា រFAO ធ្វើឡើង​ជា​លើកទី២ហើយ ដែលទស្សនកិច្ចលើកនេះ នឹងបង្ហាញពីកិច្ច​ខិតខំ​ប្រឹង​ប្រែង​របស់អ្នកពាក់ព័ន្ធទាំងអស់ ក្នុងការអនុវត្តការងារ គាំទ្រ​ដល់​ការ​អភិរក្ស​តាមរយៈការធ្វើទំនើបកម្ម ប្រព័ន្ធបច្ចេកវិទ្យា នៃការគ្រប់​គ្រង​ជល​ផលសមុទ្រ។

បើតាមលោកជំទាវអនុរដ្ឋលេខាធិការ ​ការចូលរួមរបស់ស្ថាប័ន​ព័ត៌មាន​ទាំង១០ ក្នុងរយៈពេល៣ថ្ងៃនេះ ​ចុះទៅដល់ទីតាំងផ្ទាល់ ជួបជាមួយអ្នកនេសាទ ម្ចាស់នាវា ប្រតិបត្តិករ ដៃគូសហការទាំងអស់ នឹងបានផ្សព្វផ្សាយកាន់តែទូលំទូលាយ​ពីលទ្ធ​ផល​​នៃការបំពាក់ប្រព័ន្ធ VMS នៅលើនាវា ដែលមានសមត្ថភាពត្រួត​ពិនិត្យពេលវេលាជាក់ស្តែង ជួយទប់ស្កាត់សកម្មភាពនេសាទខុសច្បាប់ និងធានាបាននូវការនេសាទ​អនុ​លោមទៅតាមស្តង់ដាអន្តរជាតិ។

ក្រោមកម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន ផ្នែកនេសាទ (FAO CAPFISH-Capture) ក៏ដូចជាការគាំទ្រហិរញ្ញប្បទានពីសហភាពអឺរុប រដ្ឋបាលជលផលបានអនុវត្ដកម្មវិធីស្មាត (SMART) សម្រាប់ប្រមូលទិន្នន័យ វិភាគទិន្នន័យ ធ្វើរបាយការណ៍ និងធ្វើផែនការត្រួតពិនិត្យនិងអធិការកិច្ចជលផល ដើម្បីបង្កើនប្រសិទ្ធភាពនៃការអនុវត្ដច្បាប់ស្ដីពីជលផល។ 

លោក ស្រ៊ុន លឹម​​សុង អនុប្រធានរដ្ឋបាលជលផល បានឱ្យដឹងថា VMS ជាប្រព័ន្ធបច្ចេកវិទ្យាទំនើបដែលបានអនុវត្តដើម្បីបង្កើនប្រសិទ្ធភាពការគ្រប់គ្រងធនធាន ធម្មជាតិ និងលើកកម្ពស់ស្តង់ដារសុខភាពសេដ្ឋកិច្ចរបស់ប្រជាពលរដ្ឋ ប្រជានេសាទ។ ជាពិសេសជាវិធានការសំខាន់មួយក្នុងការធានានិរន្តរភាពធនធានជលផល និងសុវត្ថិភាពអ្នកនេសាទ។គោលបំណងនៃការបំពាក់VMS គឺគ្រប់គ្រងការនេសាទឱ្យមានប្រសិទ្ធភាព និងស្របតាមបទដ្ឋានជាតិ/អន្តរជាតិ ធានាសុវត្ថិភាពអ្នកនេសាទតាមរយៈការតាមដានទីតាំងនាវាជាប្រចាំ ដោះស្រាយការនាំចេញផលិតផលជលផលទៅកាន់ទីផ្សារអន្តរជាតិ។

ក្រោមការគាំទ្របច្ចេកទេសពីអង្គការ FAO និងអង្គការសមាគមអភិរក្សសត្វព្រៃ (WCS) កម្មវិធី SMART ត្រូវបានកែសម្រួល (ដោយអាចប្រើជាខេមរភាសា) ស្របតាមតម្រូវការជាក់ស្ដែងសម្រាប់ការកត់ត្រាសកម្មភាពល្បាត រួមមានទីតាំង ពេលវេលា ឧបករណ៍នេសាទ ការដឹកជញ្ជូនផល ផលិតផលជលផលនិងការត្រួតពិនិត្យតំបន់ព្រៃលិចទឹកតាមរយៈឧបករណ៍ឌីជីថល។ទិន្នន័យទទួលបានពីការអនុវត្ដកម្មវិធី SMART ត្រូវបានផ្ទុកនៅក្នុងមូលដ្ឋានទិន្នន័យមេនៃរដ្ឋបាលជលផល និងអាចអនុញ្ញាតិឱ្យអធិការដ្ឋានរដ្ឋបាលជលផលនិងខណ្ឌរដ្ឋបាលជលផលសម្រាប់ប្រើ និងធ្វើផែនការអធិការកិច្ច។
 
មន្ដ្រីជំនាញរដ្ឋបាលជលផលនិងខណ្ឌរដ្ឋបាលជលផលបានទទួលការបណ្តុះបណ្តាលបច្ចេកទេសស្ដីពីការអនុវត្ដកម្មវិធី SMART ចាប់តាំងពីឆ្នាំ២០២០-២០២៤។ ការអនុវត្ដកម្មវិធី SMART ដោយមន្រ្ដីអធិការកិច្ចជលផល ទទួលបានលទ្ធផលប្រមាណជា៤៥.០០០ ករណីក្នុង១ឆ្នាំ តាមគោលដៅសូចនាករ និងចូលរួមចំណែកដល់ការគ្រប់គ្រង ការអភិរក្ស និងការអភិវឌ្ឍធនធានជលផលឱ្យបានកាន់តែប្រសើរ៕