ប៉េកាំង ៖ តួលេខជាផ្លូវការស្ដីពីសេដ្ឋកិច្ចចិនកាលពីថ្ងៃចន្ទបានបង្ហាញអំពីកំណើនយឺតយ៉ាវនៅក្នុងត្រីមាសទី២ ខណៈរបាយការណ៍នេះបានធ្វើឡើងចំថ្ងៃតែមួយដែលក្រុមមន្ត្រីធំៗនៅក្នុងបក្សកុម្មុយនីស្តមួយនេះបានចាប់ផ្តើមកិច្ចប្រជុំពេញអង្គលើកទី៣របស់ខ្លួននៅក្នុងទីក្រុងប៉េកាំង។

មហាយក្សសេដ្ឋកិច្ចធំបំផុតជាងគេទី២លើពិភពលោកនេះ កំពុងបន្តជួបបញ្ហារាំងស្ទះជាច្រើនក្រោយពេលកើតវិបត្តិកូវីដដែលទាំងនោះរួមមានទាំងបញ្ហាបំណុលក្នុងវិស័យអចលនទ្រព្យដ៏ច្រើនសន្ធឹកសន្ធាប់ បញ្ហានៃការធ្លាក់ចុះទំនុកចិត្តទីផ្សារក្នុងការចាយវាយក្នុងស្រុក ជាពិសេស បញ្ហាធនធានមនុស្សពេញវ័យធ្លាក់ចុះដោយសារកំណើនមនុស្សចាស់ច្រើនជាងជាដើម។

ក្រៅពីនោះ កត្តាខាងក្រៅដែលក៏កំពុងជះឥទ្ធិពលខ្លាំងដល់សេដ្ឋកិច្ចចិនដែរនោះ មានដូចជាបញ្ហាជម្លោះពាណិជ្ជកម្មជាមួយនឹងអាមេរិកផង អឺរ៉ុបផង ដែលគេអាចមើលឃើញថាការនាំចេញទំនិញរបស់ចិនដ៏សន្ធឹកសន្ធាប់ និងមានសក្ដានុពល ដូចជា ឧបករណ៍បច្ចេកវិទ្យា និងរថយន្តអគ្គិសនីជាដើម បានជួបឧបសគ្គក្នុងការប្រមូលចំណូលពីទីផ្សារបស់ពិភពលោកនៅតាមបណ្តាប្រទេសមួយចំនួន ជាពិសេសសហរដ្ឋអាមេរិក និងបណ្តាប្រទេសនៅអឺរ៉ុប។

របាយការណ៍កាលពីថ្ងៃចន្ទក្នុងសប្ដាហ៍នេះបានបង្ហាញថា កំណើនសេដ្ឋកិច្ចចិននៅត្រីមាសទី២នេះមានត្រឹមតែ ៤,៧ភាគរយធៀបទៅនឹងពេលវេលាដូចគ្នាកាលពីឆ្នាំទៅ ខណៈដែលការព្យាករណ៍ទុកចុងក្រោយមានទៅដល់ ៥,១ភាគរយឯណោះ។

ក្នុងជំនួបដ៏ធំបំផុតរបស់ចិនប្រចាំឆ្នាំជាលើកទី៣នៃក្រុមមេដឹកនាំបក្សចិនធ្វើឡើងនៅថ្ងៃជាមួយគ្នានេះ គឺមិនមែនជារឿងចៃដន្យនោះទេ ដោយសារតែរបៀបវារៈសំខាន់ៗដែលត្រូវដឹកនាំប្រជុំដោយលោកប្រធានាធិបតីចិន Xi Jinping គឺផ្តោតសំខាន់ទៅលើការរៀបចំគោលនយោបាយថ្មី អភិវឌ្ឍសេដ្ឋកិច្ចជាតិឲ្យកាន់តែប្រសើរឡើងវិញ។

របាយការណ៍អំពីសេដ្ឋកិច្ចជាតិនេះក៏ត្រូវបានដាក់បង្ហាញនូវក្នុងពិធីចាប់ផ្តើមនៃកិច្ចប្រជុំផងដែរ ខណៈដែលលោក Xi បានថ្លែងថា បក្សកុម្មុយនីស្តចិននឹងរៀបចំផែនការក្នុងការធ្វើការកំណែទំរង់ថ្មីមួយដែលច្បាស់នឹងក្លាយទៅជាកិច្ចការងារដើម្បីជំនួយដល់ស្ថានភាពសេដ្ឋកិច្ចជាតិក្នុងគ្រានេះ។

ទោះជាយ៉ាងណាក្តី អ្នកវិភាគម្នាក់មកពី The Moody លោក Harry Murphy បានលើកឡើងថា ៖ ដំណើរការនៃកិច្ចប្រជុំសំខាន់ដល់ទៅ៤ថ្ងៃនេះនឹងមិនអាចយកមកប្រើប្រាស់និងជួយធ្វើឲ្យប្រសើរឡើងនូវបញ្ហាយ៉ឺតយ៉ាវនៃសេដ្ឋកិច្ចជាតិនេះបានឆាប់ៗនោះឡើយ។

អ្នកវិភាគជាច្រើនទៀតក៏បានលើកឡើងស្រដៀងគ្នាដែរថា នឹងមានកិច្ចការងារចាំបាច់ជាច្រើនដែលត្រូវបំពេញដើម្បីអាចឲ្យសេដ្ឋកិច្ចជាតិងើបឡើងមកវិញបានដូចពីមុនពីព្រោះថាមកទល់ពេលនេះសេដ្ឋកិច្ចជាតិនៅតែពុំទាន់អាចឡើងទៅដល់កម្រិតមួយដូចកាលពីសម័យមុនកូវីដនៅឡើយ ជាពិសេសក្នុងរយៈពេល១៨ខែចុងក្រោយនេះ៕