សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ចិន បានកំណត់ទិសដៅកំណើនសេដ្ឋកិច្ចរបស់ខ្លួននៅក្នុងឆ្នាំ២០២៦នេះចាប់ពី ៤,៥% ទៅ ៥% ដែលជាការទម្លាក់ចំណាត់ថ្នាក់ និងបន្ទាបផែនការលើកដំបូងចាប់តាំងពីឆ្នាំ២០២៣រហូតមក នេះបើយោងតាមសេចក្ដីរាយការណ៍ពី CNA ។
នៅក្នុងកិច្ចប្រជុំបើកសភាប្រជាជនចិន (NPC) កាលពីថ្ងៃព្រហស្បតិ៍ សប្ដាហ៍នេះ លោកនាយករដ្ឋមន្ត្រី Li Qiang បានបង្ហាញរបាយការណ៍ការងាររបស់រដ្ឋាភិបាលថា គោលដៅកំណើនសេដ្ឋកិច្ចត្រូវបានកំណត់ចន្លោះពី ៤,៥% ទៅ ៥% ជាលើកដំបូងសម្រាប់ឆ្នាំ២០២៦ បន្ទាប់ពីគោលដៅត្រូវបានកំណត់យ៉ាងហោចណាស់ ៥% ក្នុងរយៈពេល៣ឆ្នាំកន្លងមកនេះ។ ការកំណត់កំណើនសេដ្ឋកិច្ចពី ៤,៥% ទៅ ៥% គឺជាគោលដៅកំណើនទាបបំផុតចាប់តាំងពីឆ្នាំ១៩៩១។
នាយករដ្ឋមន្ត្រី Li Qiang បានលើកឡើងថា វាកម្រណាស់ដែលចិនជួបប្រទះនូវស្ថានភាពដ៏ធ្ងន់ធ្ងរ និងស្មុគស្មាញបែបនេះក្នុងរយៈពេលជាច្រើនឆ្នាំ រួមមាន បញ្ហាប្រឈមខាងក្រៅត្រូវបានផ្សារភ្ជាប់ជាមួយនឹងផលលំបាកក្នុងស្រុក និងជម្រើសគោលនយោបាយដ៏លំបាក។ ការទម្លាក់អត្រាគោលដៅនៃកំណើនសេដ្ឋកិច្ចនេះបានបង្ហាញពីការប្រុងប្រយ័ត្នបន្ថែមទៀត ដោយសារចិនជួបនឹងសម្ពាធបរិត្តផរណា វិបត្តិអចលនទ្រព្យអូសបន្លាយ និងការកើនឡើងនៃភាពតានតឹងពាណិជ្ជកម្មជាមួយអាម៉េរិក។
យោងតាមទិន្នន័យផ្លូវការដែលបានចេញផ្សាយនៅក្នុងខែមករា កន្លងទៅនេះ បានឲ្យដឹងថា កំណើនសេដ្ឋកិច្ចចិនកើនឡើង ៥% ឬ ឈានដល់ ១៤០ ទ្រីលានយ័ន (២០,៣ ទ្រីពាន់លានដុល្លារ) ក្នុងឆ្នាំ២០២៥ ដែលជាអត្រាយឺតបំផុតមួយក្នុងរយៈពេលជាច្រើនទសវត្សរ៍ចុងក្រោយនេះ ខណៈដែលរដ្ឋាភិបាលតស៊ូទប់ទល់នឹងការធ្លាក់ចុះនៃការចំណាយរបស់អ្នកប្រើប្រាស់ រួមទាំងវិបត្តិបំណុលនៅក្នុងវិស័យអចលនទ្រព្យ។ ទន្ទឹមនឹងនេះ រដ្ឋាភិបាលកំពុងពិចារណាលើការកែសម្រួលរចនាសម្ព័ន្ធ កិច្ចការពារហានិភ័យ និងកំណែទម្រង់ក្នុងឆ្នាំដំបូងនៃផែនការរយៈពេល ៥ ឆ្នាំនេះ ដើម្បីជាមូលដ្ឋានគ្រឹះដ៏រឹងមាំក្នុងការសម្រេចបាននូវលទ្ធផលល្អប្រសើរនៅឆ្នាំខាងមុខ។ នៅឆ្នាំ២០២៦ ចិនចាប់ផ្តើមផែនការ ៥ឆ្នាំជាលើកទី១៥ ដែលជាប្លង់មេសម្រាប់កំណត់អាទិភាពគោលនយោបាយ និងរៀបចំយុទ្ធសាស្រ្តសេដ្ឋកិច្ចរហូតដល់ឆ្នាំ២០៣០។
មិនត្រឹមតែប៉ុណ្ណោះ រដ្ឋាភិបាលក៏មានបំណងបង្កើតការងារថ្មីៗនៅតាមទីក្រុងជាង ១២ លានកន្លែងផងដែរ ដោយរក្សាអត្រាគ្មានការងារធ្វើនៅតាមទីក្រុងនៅប្រហែល ៥,៥%។ ជាមួយគ្នានេះ ដើម្បីគាំទ្រដល់គោលដៅទាំងនោះ ទីក្រុងប៉េកាំងគ្រោងនឹងបង្កើនការចំណាយថវិកាសាធារណៈលើសពី ៣០ ទ្រីលានយ័នជាលើកដំបូង ដែលកើនឡើងប្រហែល ១,២៧ ទ្រីលានយ័នធៀបនឹងឆ្នាំមុន។ ទោះជាយ៉ាងណា ការប្រើប្រាស់ក្នុងស្រុកគឺជាចំណុចកណ្តាលនៃការជំរុញខ្ទង់ចំណាយ ហើយអាទិភាពរបស់ទីក្រុងប៉េកាំងគឺបង្កើនកិច្ចខិតខំប្រឹងប្រែងដើម្បីជំរុញការប្រើប្រាស់ និងពង្រីកការវិនិយោគ។ លើសពីនេះ រដ្ឋាភិបាលបានកំណត់ថវិកាចំនួន ២៥០ ពាន់លានយ័នសម្រាប់កម្មវិធីពាណិជ្ជកម្មទំនិញប្រើប្រាស់ និងបង្កើតមូលនិធិសម្របសម្រួលសារពើពន្ធ និងហិរញ្ញវត្ថុថ្មី ១០០ ពាន់លានយន់ ដើម្បីជំរុញតម្រូវការក្នុងស្រុក។ ចិន ក៏រក្សាសន្ទស្សន៍តម្លៃទំនិញប្រើប្រាស់ (CPI) របស់ខ្លួនក្នុងកម្រិតប្រហែល ២% ដូចនឹងឆ្នាំមុនដែរ។
យ៉ាងណាមិញ អ្នកបង្កើតគោលនយោបាយកំពុងប្រឈមនឹងសម្ពាធបរិត្តផរណាទៅលើសេដ្ឋកិច្ចចិន ។ សន្ទស្សន៍តម្លៃអ្នកផលិតធ្លាក់ចុះ ១,៤% នៅក្នុងខែមករា ដែលជាការធ្លាក់ចុះរយៈពេល ៤០ ខែជាប់ៗគ្នា។ វិស័យអចលនទ្រព្យដែលធ្លាប់មានចំណែកប្រហែល ១ ភាគ ៤ នៃផលិតផលក្នុងស្រុកសរុប (GDP) របស់ចិន នៅតែស្ថិតក្នុងស្ថានភាពអាក្រក់។ ការវិនិយោគអចលនទ្រព្យធ្លាក់ចុះ ១៧,២ ក្នុងឆ្នាំ២០២៥ ខណៈពេលដែលការលក់លំនៅដ្ឋានធ្លាក់ចុះ ៨,៧%។
នាយករដ្ឋមន្ត្រី លោក Li Qiang បានសន្យាដាក់គោលនយោបាយជាក់លាក់ដើម្បីគ្រប់គ្រងចំនួនគម្រោងអចលនទ្រព្យថ្មីៗ កាត់បន្ថយសារពើភ័ណ្ឌលំនៅដ្ឋាន និងកែលម្អ ដើម្បីធានាបាននូវការផ្តល់លំនៅដ្ឋានឲ្យបានទាន់ពេលវេលា និងការពារហានិភ័យពីការសងបំណុល។ លើសពីនេះ ទីក្រុងប៉េកាំងនឹងលើកទឹកចិត្តដល់ភាគហ៊ុនលំនៅដ្ឋានដែលមិនទាន់លក់ចេញ ឲ្យបំប្លែងទៅជាលំនៅដ្ឋានដែលឧបត្ថម្ភធនដោយរដ្ឋាភិបាល។ ដោយឡែក កត្តាពីខាងក្រៅវិញ ភាពតានតឹងពាណិជ្ជកម្មនៅតែជាបញ្ហាប្រឈម ដោយពន្ធអាម៉េរិកលើទំនិញចិនជាមធ្យមប្រហែល ៣៤% បើទោះបីជាត្រូវបានបន្ទាបពីកម្រិតខ្ពស់កាលពីគ្រាមុនក៏ដោយ៕
Account
Security
Favourite Content