សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ចិន បានប្រកាសផ្អាកនាំចូលគ្រឿងសមុទ្រពីជប៉ុនជាលើកទី២ ខណៈដែលជម្លោះការទូតរវាងប្រទេសទាំងពីរនៅមិនទាន់មានភាពធូរស្រាលនៅឡើយ នេះបើយោងតាមសេចក្ដីរាយការណ៍ពី The Guardian ។
កាលពីថ្ងៃពុធ សប្ដាហ៍នេះ ក្រសួងការបរទេសចិន បានលើកឡើងថា ចិននឹងមិនមានទីផ្សារសម្រាប់គ្រឿងសមុទ្រជប៉ុននោះទេ ដោយសារជប៉ុនបរាជ័យក្នុងការផ្តល់ឯកសារពាក់ព័ន្ធនឹងសុវត្ថិភាពចំណីអាហារដែលខ្លួនបានសន្យា ខណៈដែលការអធិប្បាយរបស់នាយករដ្ឋមន្រ្តី លោកស្រី Sanae Takaichi លើបញ្ហាតៃវ៉ាន់បានបង្កឱ្យមានការខឹងសម្បារជាសាធារណៈនៅក្នុងប្រទេសចិន។ ការផ្អាកនាំចូលគ្រឿងសមុទ្រពីជប៉ុនជាលើកទីពីរនេះកើតឡើងប៉ុន្មានខែប៉ុណ្ណោះ បន្ទាប់ពីចិនដកបំរាមកាលពីឆ្នាំ ២០២៣។ នៅក្នុងអំឡុងពេលនោះ ចិនបានផ្អាកការនាំចូលគ្រឿងសមុទ្រពីជប៉ុនពាក់ព័ន្ធករណីបញ្ចេញសំណល់ពីរោងចក្រនុយក្លេអ៊ែរនៅ Fukushima ចូលក្នុងសមុទ្រ បង្កជាក្ដីព្រួយបារម្ភអំពីសារធាតុវិទ្យុសកម្ម។
ទន្ទឹមនឹងនេះ ជម្លោះការទូតរវាងប្រទេសទាំងពីរកាន់តែមានភាពតានតឹងបន្ទាប់ពីនាយករដ្ឋមន្រ្តី លោកស្រី Sanae Takaichi បាននិយាយថា ជប៉ុនអាចចូលរួមផ្នែកយោធា ប្រសិនបើចិនវាយប្រហារកោះតៃវ៉ាន់ ព្រោះវានឹងក្លាយជាការគំរាមកំហែងដល់ប្រទេសជប៉ុន។ យ៉ាងណាក៏ដោយ បើទោះបីជារដ្ឋាភិបាលជប៉ុនអះអាងពីជំហររក្សាគោលនយោបាយការពារខ្លួនមិនផ្លាស់ប្តូរ និងបានបញ្ជូនមន្ត្រីក្រសួងការបរទេសជាន់ខ្ពស់មួយរូបទៅកាន់ទីក្រុងប៉េកាំងដើម្បីចរចាក៏ដោយ ប៉ុន្តែវាហាក់ដូចមិនបានបង្ហាញពីភាពធូរស្រាលនៃជម្លោះការទូតរវាងប្រទេសទាំងពីរនោះទេ។ ការអធិប្បាយរបស់លោកស្រី Takaichi បានបង្កឱ្យខូចខាតដល់មូលដ្ឋានគ្រឹះនៃទំនាក់ទំនងចិន-ជប៉ុន ខណៈដែលចិនបានចេញវិធានការហាមឃាត់ និងសងសឹកផ្នែកសេដ្ឋកិច្ចប្រឆាំងនឹងពីជប៉ុនជាបន្តបន្ទាប់។ ជាការកត់សម្គាល់ ក្នុងរយៈពេល៣ថ្ងៃប៉ុណ្ណោះ ពលរដ្ឋចិនប្រហែល ៥ សែននាក់បានលុបចោលជើងហោះហើរទៅកាន់ប្រទេសជប៉ុន ខណៈទីភ្នាក់ងារទេសចរណ៍ខ្លះបានបញ្ឈប់ដំណើរការនៃការដាក់ពាក្យស្នើសុំទិដ្ឋាការរបស់ពលរដ្ឋចិនដែលធ្វើដំណើរទៅកាន់ប្រទេសដីកោះមួយនេះ។ មិនត្រឹមតែប៉ុណ្ណោះ ភាគហ៊ុននៅក្នុងក្រុមហ៊ុនលក់រាយ និងទេសចរណ៍ជប៉ុនបានធ្លាក់ចុះយ៉ាងខ្លាំងកាលពីថ្ងៃចន្ទ ដើមសប្ដាហ៍នេះ៕
Account
Security
Favourite Content