សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ដូចទៅនឹងការគ្រោងទុក បើទោះបីជាមានការរំខានដោយអត្រាពន្ធរបស់សហរដ្ឋអាម៉េរិកយ៉ាងក៏ដោយ ក៏កំណើនសេដ្ឋកិច្ចរបស់ប្រទេសចិននៅក្នុងឆ្នាំ២០២៥កន្លងទៅនេះសម្រេចបាន ៥ភាគរយ ខណៈដែលការនាំចេញមានទំហំធំជាងការនាំចូល និងជាតួលេខមិនធ្លាប់មាន នេះបើយោងតាមសេចក្ដីរាយការណ៍ពី BBC ។
យោងតាមតួលេខផ្លូវការរបស់រដ្ឋាភិបាលចិនបានឱ្យដឹងថា កំណើននៃការនាំចេញយ៉ាងសន្ធឹកសន្ធាប់បានជួយឱ្យប្រទេសមហាអំណាចមួយនេះសម្រេចបាននូវគោលដៅរបស់ខ្លួនជាមួយកំណើនសេដ្ឋកិច្ចប្រចាំឆ្នាំ ៥ ភាគរយ បើទោះជាការចំណាយក្នុងស្រុករបស់ប្រជាជនមានកំណើនយឺត ហើយវិបត្តិអចលនទ្រព្យនៅអូសបន្លាយក៏ដោយ។ មិនត្រឹមតែប៉ុណ្ណោះ ចិន ថែមទាំងសម្រេចបាននូវអតិរេកពាណិជ្ជកម្មប្រមាណ ១,១ ទ្រីលានដុល្លារ ដោយសារការនាំចេញរបស់ខ្លួនមានបរិមាណច្រើនជាងការនាំចូល ពោលគឺការនាំចេញមានតម្លៃ ៣,៨ ទ្រីលានដុល្លារ ហើយការនាំចូលមានតម្លៃត្រឹមជាង ២,៦ ទ្រីលានដុល្លារ ដែលធ្វើឱ្យទំហំពាណិជ្ជកម្មប្រចាំឆ្នាំ២០២៥ កើនឡើងដល់តម្លៃ ៦,៥ ទ្រីលានដុល្លារ ។
លោក Kang Yi ប្រធានការិយាល័យស្ថិតិជាតិរបស់ចិនបានលើកឡើងថា បើទោះជាឆ្នាំ២០២៥ កំណើនសេដ្ឋកិច្ចអាចសម្រេចបានដូចការរំពឹងទុក ប៉ុន្តែភាពប្រឈមនៅក្នុងឆ្នាំ២០២៦នៅតែមាន ដោយសារតែការផ្គត់ផ្គង់នៅក្នុងស្រុកកំពុងលើសពីតម្រូវការជាក់ស្ដែង ដោយសារតែរាល់ការចំណាយរបស់ប្រជាជនត្រូវបានធ្វើឡើងយ៉ាងប្រយ័ត្នបំផុត ធ្វើឱ្យបណ្តាអ្នកវិនិយោគដែលជាអ្នកផលិត ឬម្ចាស់អាជីវកម្មបង្កើនការប្រយ័ត្នដូចគ្នា ។ ក្រៅពីនេះ វិបត្តអចលនទ្រព្យនៅតែអូសបន្លាយបើជារដ្ឋាភិបាលបានប្រើយុទ្ធសាស្ត្រផ្សេងៗជាច្រើនដើម្បីអាចរក្សាបានស្ថិរភាពទីផ្សារ។ គួរកត់សម្គាល់ថា ជាទូទៅ តម្លៃលំនៅឋាននៅក្នុងអំឡុងខែធ្នូ ឆ្នាំ២០២៥ បានធ្លាក់ចុះ ២,៧% ធៀបនឹងរយៈពេលដូចគ្នាកាលពីឆ្នាំ២០២៤ ហើយការវិនិយោគលើវិស័យអចលនទ្រព្យក៏មានការធ្លាក់ចុះ ១៧,២% ផងដែរ។ មិនត្រឹមតែប៉ុណ្ណោះ វិបត្តិប្រជាសាស្រ្តរបស់ចិនកាន់តែអាក្រក់ទៅៗ ដោយអត្រាកំណើតធ្លាក់ចុះ និងអត្រាមនុស្សចាស់កើនឡើងជាបន្តបន្ទាប់ក្នុងរយៈពេល ៤ ឆ្នាំជាប់ៗគ្នា។
លោក Louise Loo ប្រធានសេដ្ឋកិច្ចអាស៊ីនៅ Oxford Economics បានលើកឡើងថា កំណើនសេដ្ឋកិច្ចរបស់ចិនដែលបានឈានដល់ ៥% គឺមិនមានអ្វីគួរឱ្យភ្ញាក់ផ្អើលនោះទេ ដោយសាររដ្ឋាភិបាលនៃទីក្រុងប៉េកាំងបានយកចិត្តទុកដាក់យ៉ាងខ្លាំងក្នុងការជំរុញ និងលើកទឹកចិត្តទាំងអ្នកវិនិយោគដែលជាអ្នកផលិត ទាំងប្រជាពលរដ្ឋដែលជាអ្នកប្រើប្រាស់ ដើម្បីអាចធានាបាននូវស្ថិរភាព។ ទន្ទឹមនឹងនេះ មេដឹកនាំចិន លោក Xi Jinping បានសន្យាជំរុញសកម្មភាពបន្ថែមទៀតនៅឆ្នាំ២០២៦នេះ ដើម្បីបង្កើនការចំណាយក្នុងស្រុក ហើយកាត់បន្ថយលើការពឹងផ្អែកតែទៅលើការនាំចេញ និងការវិនិយោគថ្មីបន្ថែម៕
Account
Security
Favourite Content