សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី The Guardian បានរាយការណ៍ថា តម្លៃទំនិញនៅអាម៉េរិកបានបន្តថ្លៃឡើងដោយសារការដំឡើងពន្ធរបស់ប្រធានាធិបតី Donald Trump ប៉ះពាល់ដល់ការចំណាយប្រចាំថ្ងៃរបស់ប្រជាពលរដ្ឋដែលជាអ្នកប្រើប្រាស់។
ផ្អែកលើទិន្នន័យសេដ្ឋកិច្ចសំខាន់ៗដែលបានចេញផ្សាយកាលពីថ្ងៃអង្គារសប្ដាហ៍នេះបានឲ្យដឹងថា តម្លៃទំនិញបានបន្តឡើងថ្លៃខ្ពស់ជាង ២,៧% ធៀបកាលពីខែកក្កដាកាលពីឆ្នាំមុន ខណៈដែលតម្លៃអាហារវេចខ្ចប់ទិញពីហាងបានឡើងថ្លៃ ៣,៩% ។ មិនត្រឹមតែប៉ុណ្ណោះ តម្លៃសម្រាប់រថយន្តជជុះ លំនៅដ្ឋាន និងសុខាភិបាលក៏ឡើងថ្លៃផងដែរ ប៉ុន្តែតម្លៃថាមពលបានធ្លាក់ចុះ ១,៦% សម្រាប់ឆ្នាំនេះ ដែលធ្វើឲ្យអត្រាអតិផរណាមានស្ថិរភាព។
យ៉ាងណាមិញ របាយការណ៍ថ្មីៗនេះបង្ហាញថា សេដ្ឋកិច្ចអាម៉េរិកកំពុងជួបប្រទះភាពច្របូកច្របល់ដោយសារ Donald Trump បានដំឡើងពន្ធខ្ពស់លើប្រទេសជាច្រើន ដោយក្នុងនោះរួមមានដៃគូពាណិជ្ជកម្មសំខាន់ៗរបស់អាម៉េរិកផងដែរ និងពន្ធសកល ១០% លើប្រទេសមួយចំនួន។ មិនត្រឹមតែប៉ុណ្ណោះ Trump បានដំឡើងពន្ធ ២៥% ទៅ ៥០% លើឧស្សាហកម្មមួយចំនួន ដូចជា ដែកថែប និងអាលុយមីញ៉ូមទាំងអស់ដែលនាំចូលមកកាន់អាម៉េរិក។
ការដំឡើងពន្ធរបស់ Trump បានជំរុញឲ្យអ្នកលក់រាយមួយចំនួនបង្កើនការនាំចូលកាន់តែខ្លាំងសម្រាប់ស្តុកទុកមុនពេលដែលពន្ធចូលជាធរមាន ដើម្បីពន្យារផលប៉ះពាល់នៃពន្ធគយ និងរក្សាតម្លៃឱ្យមានស្ថិរភាព។ លើសពីនេះ ពន្ធគយជះឥទ្ធិពលអាក្រក់លើទីផ្សារការងារខ្លាំងជាងការព្យាករណ៍របស់អ្នកសេដ្ឋកិច្ចផងដែរ។ រដ្ឋាភិបាលបានព្យាករណ៍ថា ការងារចំនួន ២៩១ ០០០ កន្លែងនឹងត្រូវបានបន្ថែមទៅក្នុងសេដ្ឋកិច្ចចន្លោះខែឧសភា និងខែមិថុនា ប៉ុន្តែជាក់ស្តែង ចំនួនសរុបបានធ្លាក់ចុះមកត្រឹម ៣៣ ០០០ កន្លែងប៉ុណ្ណោះ ដោយសារពន្ធបង្កើនការចំណាយសម្រាប់អាជីវកម្ម ជាពិសេស ក្រុមហ៊ុនផលិត និងអ្នកនាំចេញ។ មូលហេតុនេះធ្វើឲ្យពួកគេផ្អាកការរើសបុគ្គលិក ឬ បញ្ឈប់ការងារ។ ជាលទ្ធផល ការកើនឡើងនៃតម្លៃ និងការធ្លាក់ចុះទីផ្សារការងារធ្វើឱ្យធនាគារកណ្តាលអាម៉េរិក (Fed) មានភាពតឹងតែងក្នុងការកាត់បន្ថយអត្រាការប្រាក់។ ទោះបីជា Trump ជំរុញធនាគារកណ្តាលអាម៉េរិកឲ្យកាត់បន្ថយអត្រាការប្រាក់ក៏ដោយ ប៉ុន្តែជារឿយៗ មន្ត្រី Fed បដិសេធពីការកែសម្រួលអត្រាការប្រាក់ ដោយលើកឡើងពីភាពមិនច្បាស់លាស់ពីផលប៉ះពាល់នៃពន្ធលើតម្លៃ៕
Account
Security
Favourite Content