សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឧត្តរមានជ័យ ៖ ក្រោយជម្លោះព្រំដែនរវាងកម្ពុជា និងថៃ ក្នុងរយៈពេលប៉ុន្មានខែចុងក្រោយនេះ ពលករកម្ពុជាជាច្រើននាក់បានសម្រេចចិត្តវិលត្រឡប់មកស្រុកកំណើតវិញ។ បន្ទាប់ពីការសម្រុកចូលយ៉ាងគំហុកពួកគេភាគច្រើនព្រួយបារម្ភពីកង្វះខាតការងារធ្វើនៅក្នុងស្រុក។
បើតាមទិន្នន័យពីក្រសួងការងារ បណ្ដុះបណ្ដាល និងវិជ្ជាជីវៈ ពលករកម្ពុជា ដែលកំពុងធ្វើការនៅក្នុងប្រទេសថៃមានចំនួនរហូតទៅដល់ជាង ១លាន ២សែននាក់ ហើយដើម្បីដោះស្រាយនូវបញ្ហានេះ ក្រសួងការងារ បានចេញនូវសកម្មភាពជាច្រើនរួមមាន បន្តផ្សព្វផ្សាយពីគោលនយោបាយបណ្ដុះ បណ្ដាលជំនាញ ១លាន ៥សែននាក់ ក៏ដូចជាបន្តផ្សព្វផ្សាយពីឱកាសការងារនៅតាមបណ្ដាខេត្ត និងរាជធានីផងដែរ។
ក្នុងនោះ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ក៏បាន និងកំពុងសហការជាមួយរដ្ឋបាលខេត្តជាច្រើន ដើម្បីរៀបចំយុទ្ធនាការ “វេទិកាការងារ” ជាបន្តបន្ទាប់។ តាមរយៈវេទិកានេះ ក្រសួងបាននាំយកនូវឱកាសការងារជាច្រើនកន្លែង ទៅផ្សព្វផ្សាយដោយផ្ទាល់ សម្រាប់បងប្អូនពលករដែលវិលត្រឡប់មកពីប្រទេសថៃ និងមានបំណងចង់ស្វែងរកការងារធ្វើ។
ជាមួយគ្នានេះ កញ្ញា យ៉ូន លីយ៉ា ជាអ្នករស់នៅស្រុកស្រីសន្ធរ ខេត្តកំពង់ចាម ព្រមទាំងជាពលករទើបត្រឡប់មកពីប្រទេសថៃ បានចូលរួមក្នុងវេទិកាខាងលើ និងបានឱ្យដឹងថា កញ្ញាមានអារម្មណ៍រំភើប ដែលបានត្រឡប់ចូលមកក្នុងស្រុក និងជាពិសេសបានជួបជុំជាមួយឪពុកម្ដាយ បងប្អូនវិញ។
អ្នកស្រី ភោគ លាងអុី ដែលរស់នៅស្រុកតាំងគោក ខេត្តកំពង់ធំឯណោះវិញ ក៏បានឱ្យដឹងដែរថា អ្នកស្រីបានទៅធ្វើការនៅប្រទេសថៃប្រមាណជាង ១០ឆ្នាំហើយ ដោយធ្វើការខាងភោជនីយដ្ឋាន ជាអ្នករត់តុ។សម្រាប់ការត្រឡប់មកស្រុកវិញគឺជារឿងដែលគួរឱ្យរំភើប ព្រោះអ្នកស្រីបានឃ្លាតពីគ្រួសារ ច្រើនឆ្នាំមកហើយ។
ក្នុងឱកាសនេះ អ្នកស្រីបានលើកឡើងយ៉ាងដូច្នេះថា៖
«ខ្ញុំគិតថាពលករផ្សេង ក៏គួរតែត្រឡប់មកស្រុកយើងវិញ ការងារយើងមានច្រើន ប្រាក់ខែក៏មិនចាញ់ស្រុកគេដែរ យើងនៅប្រទេសគេ គេមានកាត់ថ្លៃលិខិតឆ្លងដែន និងសេវាផ្សេងៗ វាមិនជាងគ្នាប៉ុន្មានទេ»។
លោក ធុក ថាន ដែលរស់នៅក្នុងខេត្តកំពង់ចាមឯណោះ ក៏ទើបត្រឡប់មកស្រុកវិញបានប្រមាណ ១សប្ដាហ៍ បន្ទាប់ពីធ្វើការនៅប្រទេសថៃចំនួន ១០ឆ្នាំ។ បើតាមការរៀបរាប់របស់លោកបានឱ្យដឹងថា អំឡុងពេលដែលរស់នៅក្នុងប្រទេសថៃ លោកប្រកបការងារខាងជាងភ្លើង និងទឹក។
យ៉ាងណាក៏ដោយ ការត្រឡប់មកស្រុកវិញនាពេលនេះ ទាំងលោក និងក្រុមគ្រួសារកាត់បន្ថយការ ព្រួយបារម្ភបានច្រើន និងមានភាពកក់ក្ដៅជាងមុន។ កក់ក្ដៅ ដោយសារតែលោកមើលឃើញថា រាជរដ្ឋាភិបាលមានការយកចិត្តទុកដាក់ខ្ពស់ ដោយផ្ដល់នូវមធ្យោបាយធ្វើដំណើរពីតំបន់ព្រំដែន មកដល់ផ្ទះ ដោយមិនគិតថ្លៃ និងថែមទាំងរកការងារឱ្យធ្វើបន្តទៀត។
មិនត្រឹមតែប៉ុណ្ណោះ រដ្ឋាភិបាលក៏បានបើកឱកាសសម្រាប់អ្នកដែលចង់ផ្លាស់ប្ដូរជំនាញ អាចចុះឈ្មោះ ចូលរៀនដោយមិនគិតប្រាក់ទៀតផង។
គួរបញ្ជាក់ថា គិតចាប់ពីថ្ងៃទី២ ខែសីហា រហូតដល់ថ្ងៃទី១០ ខែសីហា ឆ្នាំ២០២៥ ក្រសួងការងារ បានរៀបចំ «វេទិកាការងារ» ចំនួន ២៦៩កន្លែង ដោយនាំយកព័ត៌មានឱកាសការងារសរុបចំនួន ១១២ ២៦៧កន្លែង ទៅផ្សព្វផ្សាយជូនប្រជាពលរដ្ឋ និងពលករខ្មែរ ដែលបានចូលរួមវេទិកាផ្សព្វផ្សាយចំនួន ៧៩ ៩១១នាក់ និងមានអ្នកទទួលបានការងារភ្លាមចំនួន ១៥ ៣៣២នាក់ផង។
គួររំលឹកថា ថៃ ជាប្រទេសដែលបានស្រូបទាញកម្លាំងពលកម្មពីកម្ពុជា ច្រើនជាងគេ ដែលមានរហូតដល់ជាង១លាន២សែននាក់ បន្ទាប់មកកូរ៉េខាងត្បូង មានជាង៤,៦ម៉ឺននាក់, ជប៉ុនជាង២ម៉ឺននាក់, ម៉ាឡេស៊ី ជាង២ម៉ឺននាក់, សិង្ហបុរី ជាង៣រយនាក់, តំបន់រដ្ឋបាលពិសេសហុងកុង ចំនួនជាង១រយនាក់ និងអារ៉ាប់ប៊ីសាអូឌីត មានចំនួន១៤នាក់៕
Account
Security
Favourite Content