ភ្នំពេញ៖ យោងតាមទិន្នន័យ​របស់​​អគ្គនាយក​ដ្ឋាន​គយ និង​រដ្ឋាករ​កម្ពុជា ​(GDCE) បានឱ្យ​ដឹង​ថា ក្នុងត្រីមាស​ទី​១ ឆ្នាំ​២០២៥កន្លងទៅ ​ការ​នាំ​ចូល នាំ​ចេញ​ទំនិញ​រវាង​ប្រទេស​កម្ពុជា និង​​ចិន មាន​ទឹក​ប្រាក់​សរុប ៤ ០៦​៨​,៦ លាន​ដុល្លារ កើន​ឡើង ២៦,៧ ភាគ​រយ​បើ​ធៀប​នឹង​រយៈពេលដូចគ្នាកាលពីឆ្នាំ២០២៤ ដែល​មាន​ចំនួន ៣ ២១០​,២៣ ​លាន​ដុល្លារ​។ ក្នុងរយៈពេល៣ខែកន្លងមកនេះ កម្ពុជាទទួលបាន​គម្រោង​វិនិយោគ​ចំនួន ១៧២ ជាមួយទុនវិនិយោគប្រមាណ ២,៥ពាន់​លានដុល្លារអាម៉េរិក ដែលភាគច្រើន​ជាការវិនិយោគ​របស់ចិន។

ទំហំ​ទឹក​ប្រាក់​នៃ​ពាណិជ្ជកម្ម​ទ្វេភាគី​រវាង​កម្ពុជា-ចិន ​បាន​គ្របដណ្តប់​​ជិត៣០​ភាគរយ​នៃ​ទំហំ​ពាណិជ្ជកម្ម​អន្តរ​ជាតិ​របស់​កម្ពុជា​ក្នុង​ត្រីមាស​ទី ១ ឆ្នាំ​២០២៥ ដែលមាន​ទឹក​ប្រាក់ ១៤ ៤៤៩,១៦លាន​ដុល្លារ​។​​ ក្នុង​ចំនួន​នេះ គឺ​ទំនិញ​​​​កម្ពុជា​នាំ​ទៅ​ប្រទេស​ចិន ​៣៤៨,១៩ ​លាន​ដុល្លារ ថយចុះ ៤,៩ ភាគរយ ចំណែកទំនិញ​ចិន​នាំ​ចូល​ ៣ ៧២០,៤១ ​លាន​ដុល្លារ កើន ៣០,៨ ភាគរយ។

គួរជម្រាបផងដែរថា ៖ ក្រោមកិច្ចសហការទ្វេភាគីរវាងកម្ពុជា-ចិន បានជំរុញដល់ការរីកចំរើនយ៉ាងខ្លាំលើការវិនិយោគឯកជន ដែលនាំមកនូវផ្លែផ្កាជាផលប្រយោជន៍យ៉ាងច្រើនសន្លឹកសន្ធាប់។ ក្នុងនោះ ទុនវិនិយោគរបស់ចិននៅកម្ពុជា បើគិតចាប់ពីទសវត្សរ៍ឆ្នាំ១៩៩០ មកទល់ដើមឆ្នាំ២០២៥នេះ មានទំហំប្រមាណ ៣៦ ពាន់លានដុល្លារអាម៉េរិក។ ក្នុងរយ:ពេល ៥ឆ្នាំចុងក្រោយ (២០២១-២០២៥) ប្រភពទុនវិនិយោគចិនបានឈរនៅលំដាប់លេខ ១ ឬ ២ សម្រាប់ការវិនិយោគឯកជននៅកម្ពុជា។ ទុនវិនិយោគរបស់ចិននៅកម្ពុជា ពីទសវត្សរ៍ឆ្នាំ១៩៩០ មកទល់ដើមឆ្នាំ២០២៥ មានទំហំប្រមាណ ៣៦ ពាន់លានដុល្លារអាមេរិក។

ជាក់ស្តែង នៅក្នុងឆ្នាំ២០២៤ កន្លងទៅនេះ ការវិនិយោគមកពីប្រទេសចិន ស្ថិតនៅលំដាប់លេខរៀងទី១ ដោយបានរួមចំណែកប្រមាណ ៣.៤២៣.៧៨១.២៧៤ លានដុល្លារអាម៉េរិក ស្មើនឹង ៤៩.៨២% នៃទុនវិនិយោគសរុបនៅកម្ពុជា។

យោងតាមប្រព័ន្ធទិន្នន័យ ( ODA Database) របស់គណៈកម្មាធិការសហប្រតិបត្តិការអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា ៖កិច្ចសហប្រតិបត្តិការទ្វេភាគីលើកិច្ចការអភិវឌ្ឍ ក៏បានផ្តល់នូវផ្លែផ្កាដ៏មហាសាលដល់កម្ពុជា ដែលចាប់ពីទសវត្សរ៍ឆ្នាំ១៩៩០ ដល់ដើមឆ្នាំ២០២៥នេះ ចិនបានផ្តល់ជំនួយអភិវឌ្ឍន៍ផ្លូវការមកកម្ពុជាសរុបប្រមាណជិត ៦ពាន់ លានដុល្លារអាម៉េរិកផងដែរ សម្រាប់ការអភិវឌ្ឍលើវិស័យសំខាន់ៗ ដូចជា ហេដ្ឋារចនាសម្ព័ន្ធ ថាមពលនិងអគ្គិសនី អប់រំ សុខាភិបាល កសិកម្ម និងប្រព័ន្ធធារាសាស្ត្រ ជាដើម។

គួរបញ្ជាក់ថា កាលពីឆ្នាំ២០២៤កន្លងទៅកម្ពុជា អនុម័តគម្រោងវិនិយោគសរុបចំនួន៤១៤គម្រោង ដែលមានទឹកប្រាក់វិនិយោគប្រមាណ៦,៩ពាន់លានដុល្លារអាមេរិក ក្នុងនោះប្រភពទុនវិនិយោគពីប្រទេសចិនមានរហូតដល់៤៩,៨២ភាគរយឯណោះ ឬប្រមាណ៣,៤៣ពាន់លានដុល្លារអាមេរិក ៕