បរទេស៖​ យោងតាមប្រភពពីបរទេសបានលើកឡើងថា ធ្យូងថ្មគឺជាធាតុសំខាន់នៅក្នុងផលិតកម្មថាមពលសកលទូទាំងពិភពលោក។ ការផលិតធ្យូងថ្មបានកើនឡើងគួរឱ្យកត់សម្គាល់នៅទូទាំងពិភពលោក មានជាង ៥០ ប្រទេសចូលរួមក្នុងការផលិត ដោយផលិតកម្មបានកើនឡើង ៧០ ភាគរយ ឬ ៨ ៧៤១ លានតោនក្នុងរយៈពេលជាងពីរទសវត្សរ៍។

ស្របពេលដែលទ្វីបអឺរ៉ុបជួបប្រទះនឹងការធ្លាក់ចុះធ្យូងថ្ម ប៉ុន្តែអាស៊ីបានក្លាយជាជាចំណុចស្នូលក្នុងផលិតកម្មធ្យូងថ្មចាប់តាំងពីឆ្នាំ ២០១១។ ខាងក្រោមនេះគឺជាប្រទេសផលិតធ្យូងថ្មកំពូលៗទាំង ៥ របស់ពិភពលោក៖

១. ចិនមានផលិតកម្មធ្យូងថ្ម ៤ ៤៣០ លានតោនក្នុងឆ្នាំ២០២៤។ ចិន គឺជាអ្នកផលិត និងអ្នកប្រើប្រាស់ធ្យូងថ្មដ៏ធំបំផុតរបស់ពិភពលោក ដែលមានចំណែកស្មើនឹងជាង ៥០ ភាគរយនៃទិន្នផលសកល។ ខេត្តសំខាន់ៗដែលផលិតធ្យូងថ្មរួមមាន ម៉ុងហ្គោលី សានស៊ី និងសាអានស៊ី ដែលជំរុញការផលិតធ្យូងថ្មរបស់ប្រទេស។ អណ្តូងរ៉ែធ្យូងថ្ម Haerwusu នៅម៉ុងហ្គោលីខាងក្នុងគឺជាអណ្តូងរ៉ែបើកចំហដ៏ធំបំផុតរបស់ប្រទេសចិន ដែលដំណើរការដោយក្រុមហ៊ុន Shenhua Group។ ទោះបីជាមានការផលិតធ្យូងថ្មយ៉ាងច្រើនក៏ដោយ ប្រទេសចិនក៏នាំចូលធ្យូងថ្មពីឥណ្ឌូនេស៊ី និងរុស្ស៊ីសម្រាប់ផលិតដែកផងដែរ។ យ៉ាងណាមិញ ចិនមានបំណងផ្តោតលើការធ្វើទំនើបកម្ម និងការធ្វើពិពិធកម្ម លើថាមពលរបស់ខ្លួនតាមរយៈការវិនិយោគលើប្រភពថាមពលនុយក្លេអ៊ែរ និងថាមពលកកើតឡើងវិញ ដោយរំពឹងថាទិន្នផលធ្យូងថ្មនឹងមានថយចុះបន្តិចម្តងៗក្រោយឆ្នាំ ២០៣០។

២. ឥណ្ឌាមានផលិតកម្មធ្យូងថ្ម ៩៣៧ លានតោនក្នុងឆ្នាំ ២០២៤។ ឥណ្ឌាជាប់ចំណាត់ថ្នាក់ជាប្រទេសផលិត និងប្រើប្រាស់ធ្យូងថ្មធំជាងគេទីពីររបស់ពិភពលោក។ ទីក្រុង Dhanbad ត្រូវបានគេស្គាល់ថាជា ទីក្រុងធ្យូងថ្ម គឺជាកន្លែងផលិតធ្យូងថ្មដ៏សំខាន់របស់ប្រទេស។ ធ្យូងថ្មនៅតែមានសារៈសំខាន់សម្រាប់វិស័យថាមពលរបស់ឥណ្ឌា ដោយមានចំណែកផ្គត់ផ្គង់ ៥៥ ភាគរយសម្រាប់តម្រូវការថាមពលរបស់ខ្លួន។ ទោះបីជាមានការខិតខំប្រឹងប្រែងធ្វើពិពិធកម្មទៅលើប្រភពថាមពលផ្សេងក៏ដោយ ប៉ុន្តែធ្យូងថ្មនៅតែបន្តដើរតួនាទីសំខាន់ក្នុងទីផ្សារថាមពលរបស់ឥណ្ឌា ដោយសារជម្រើសមានកម្រិត និងតម្រូវការកើនឡើង។

៣. ឥណ្ឌូនេស៊ីមានផលិតកម្មធ្យូងថ្ម ៦២១ លានតោនក្នុងឆ្នាំ ២០២៤។ នៅក្នុងឆ្នាំ ២០២២ ការផលិតធ្យូងថ្មរបស់ឥណ្ឌូនេស៊ីមានការកើនឡើងយ៉ាងខ្លាំងដល់ទៅ ៦៨៧ លានតោន បើធៀបនឹង ៦១៤ លានតោនក្នុងឆ្នាំ ២០២១។ យ៉ាងណាមិញ ផលិតកម្មបានធ្លាក់ចុះនៅឆ្នាំ ២០២៣ និង ២០២៤ ដោយសារតម្លៃធ្យូងថ្មធ្លាក់ចុះ និងការអនុវត្តវិធានការចម្រុះក្នុងគោលបំណងកាត់បន្ថយការបញ្ចេញកាបូន ជាមួយនឹងគោលដៅ ៣១,៨៩ ភាគរយត្រឹមឆ្នាំ ២០៣០។

៤. សហរដ្ឋអាមេរិកមានផលិតកម្មធ្យូងថ្ម ៥៤០ លានតោន ក្នុងឆ្នាំ ២០២៤។ កាលពីឆ្នាំ ២០១៤ សហរដ្ឋអាមេរិកគឺជាអ្នកផលិតធ្យូងថ្មធំជាងគេទីពីរនៅលើពិភពលោកដែលមានផលិតកម្ម ៩២២ លានតោន ប៉ុន្តែធ្លាក់មកចំណាត់ថ្នាក់លេខ ៣ នៅឆ្នាំ ២០១៨ ដោយសារការធ្លាក់ចុះនៃផលិតកម្ម។ មិនត្រឹមតែប៉ុណ្ណោះ ការផ្លាស់ប្តូរពីធ្យូងថ្មទៅប្រភពថាមពលកកើតឡើងវិញត្រូវបានជះឥទ្ធិពលដោយសារតម្លៃឧស្ម័នធម្មជាតិទាបជាងធ្យូងថ្ម និងការគាំទ្រគោលនយោបាយសម្រាប់ការបង្កើតថាមពលពីខ្យល់ និងពន្លឺព្រះអាទិត្យ។ ទោះបីជាការប្រើប្រាស់បានធ្លាក់ចុះប៉ុន្មានឆ្នាំមកនេះ ប៉ុន្តែការផលិតអគ្គិសនីនៅប្រើប្រាស់ធ្យូងថ្មជាចម្បង។

៥. អូស្ត្រាលីមានផលិតកម្មធ្យូងថ្ម ៤៥៩ លានតោនក្នុងឆ្នាំ ២០២៤។ អូស្ត្រាលីមានអណ្តូងរ៉ែធ្យូងថ្មសឹងតែគ្រប់រដ្ឋ ហើយរដ្ឋ New South Wales និង Queensland មានទុនបម្រុងធ្យូងថ្មធំជាងគេក្នុងប្រទេស។ មិនត្រឹមតែប៉ុណ្ណោះ អូស្ត្រាលីនាំចេញធ្យូងថ្មប្រហែល ៧០ ភាគរយ ភាគច្រើនទៅកាន់អាស៊ីខាងកើត ហើយធ្យូងថ្មដែលនៅសេសសល់ត្រូវបានប្រើប្រាស់សម្រាប់បង្កើតថាមពល៕