សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា ប្រធានាធិបតីសហរដ្ឋអាម៉េរិក Donald Trump បានចុះហត្ថលេខាលើសេចក្តីប្រកាសនៃការហាមឃាត់រាល់ការធ្វើដំណើរពីប្រទេសមួយចំនួន និងបានចាត់ទុកពួកគេជាតួអង្គបរទេសដ៏គ្រោះថ្នាក់។
សេចក្តីប្រកាសនេះត្រូវបានចុះហត្ថលេខាកាលពីថ្ងៃពុធសប្ដាហ៍នេះដោយបានកំណត់ថា សញ្ជាតិមកពី ១២ ប្រទេសត្រូវបានហាមឃាត់ទាំងស្រុងពីការចូលមកកាន់ទឺកដីអាម៉េរិក។ សញ្ជាតិទាំងនោះមានដូចជា៖ អាហ្វហ្គានីស្ថាន មីយ៉ាន់ម៉ា ឆាដ កុងហ្គោ អេក្វាទ័រហ្គីណេ អេរីទ្រា ហៃទី អ៊ីរ៉ង់ លីប៊ី សូម៉ាលី ស៊ូដង់ និងយេម៉ែន។ លើសពីនេះ អ្នកមានសញ្ជាតិចំនួន ៧ ប្រទេសផ្សេងទៀតដូចជា៖ ប៊ូរុនឌី គុយបា ឡាវ សៀរ៉ាឡេអូន តូហ្គោ តួកមិននីស្ថាន និងវ៉េណេស៊ុយអេឡា នឹងត្រូវដាក់រឹតបន្តឹងខ្លះៗ ឬក្នុងលក្ខណៈមិនពេញលេញ។
យោងតាមសេចក្តីថ្លែងការណ៍ដែលផ្តល់ដោយសេតវិមានបានឲ្យដឹងថា ប្រទេសដែលត្រូវបានហាមឃាត់ខាងលើនេះ មានភាពខ្វះខាតទាក់ទងនឹងប្រព័ន្ធត្រួតពិនិត្យ ហើយត្រូវបានកំណត់ថា បង្កហានិភ័យខ្ពស់ដល់សហរដ្ឋអាម៉េរិក។ យ៉ាងណាមិញ សេចក្តីប្រកាសនឹងចូលជាធរមាននៅថ្ងៃទី ៩ ខែមិថុនាខាងមុខនេះ ប៉ុន្តែទិដ្ឋាការដែលបានចេញមុនកាលបរិច្ឆេទនេះនឹងមិនត្រូវបានដកហូតវិញទេ។ លើសពីនេះ អត្តពលិក រួមទាំងគ្រូបង្វឹក និងសាច់ញាតិដែលត្រូវធ្វើដំណើរសម្រាប់ការប្រកួតព្រឹត្តិការណ៍កីឡាសំខាន់ៗ គឺត្រូវបានលើកលែង។
ទាក់ទិននឹងសេចក្ដីប្រកាសខាងលើ លោក Donald Trump បានលើកឡើងថា ការហាមឃាត់ការធ្វើដំណើររបស់ប្រទេសទាំងនោះមកកាន់អាម៉េរិក គឺដោយសារការវាយប្រហារនៅរដ្ឋ Colorado។ ជនជាតិអេហ្ស៊ីប ដែលមានឈ្មោះថា Mohamed Sabry Soliman ត្រូវបានចោទប្រកាន់ពីបទវាយប្រហារលើហ្វូងមនុស្សដែលចូលរួមក្នុងការតវ៉ារបស់ជនជាតិយូដានៅរដ្ឋ Colorado ដោយរូបគេបានប្រើគ្រាប់បែកផ្ទុះ ដែលបណ្តាលឱ្យមនុស្ស ៨ នាក់រងរបួស។ មិនត្រឹមតែប៉ុណ្ណោះ ជនជាតិអេហ្ស៊ីបម្នាក់នេះបានស្នាក់នៅអាម៉េរិកលើសទិដ្ឋាការទេសចរណ៍របស់គាត់ ជាមួយនឹងលិខិតអនុញ្ញាតការងារដែលផុតកំណត់។
Trump បាននិយាយនៅក្នុងវីដេអូមួយថា៖
«ការវាយប្រហារភេរវកម្មនាពេលថ្មីៗនេះនៅទីក្រុង Boulder រដ្ឋ Colorado បានគូសបញ្ជាក់ពីគ្រោះថ្នាក់ខ្លាំងបង្កឡើងដោយជនបរទេសដែលមិនត្រូវបានត្រួតពិនិត្យឱ្យបានត្រឹមត្រូវ ដូច្នេះយើងមិនចង់បានពួកគេទេ។ យើងនឹងមិនអនុញ្ញាតឱ្យអ្វីដែលធ្លាប់កើតឡើងនៅអឺរ៉ុប កើតឡើងនៅអាមេរិកដែរនោះទេ ហើយយើងក៏មិនចង់ឲ្យមានការធ្វើចំណាកស្រុកដោយបើកចំហពីប្រទេសណាមួយដែលខ្វះខាតការត្រួតពិនិត្យ និងខ្វះសុវត្ថិភាពនោះដែរ។ នោះហើយជាមូលហេតុដែលខ្ញុំចុះហត្ថលេខាលើបទបញ្ជាប្រតិបត្តិថ្មីមួយដោយដាក់ការរឹតបន្តឹងការធ្វើដំណើរលើប្រទេសនានា រួមមាន យេម៉ែន សូម៉ាលី ហៃទី លីប៊ី និងប្រទេសជាច្រើនទៀត»។
គួរឲ្យបញ្ជាក់ដែរថា ក្នុងអំឡុងពេលអាណត្តិដំបូងរបស់ Trump លោកធ្លាប់ហាមឃាត់អ្នកធ្វើដំណើរមកពីប្រទេសចំនួន ៧ ដែលមានភាគច្រើនជាមូស្លីម។ ក្រោយមក អតីតប្រធានាធិបតីអាម៉េរិក Joe Biden បានលុបចោលការហាមឃាត់នេះ ដោយសារវាប៉ះពាល់នឹងមនសិការជាតិ៕
Account
Security
Favourite Content