សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រទេសកម្ពុជា ដែលស្ថិតក្នុងទ្វីបអាស៊ី និងប្រទេសប៉េរូ ស្ថិតនៅទ្វីបអាម៉េរិកខាងត្បូង បានសន្យាបង្កើនកិច្ចសហប្រតិបត្តិការលើវិស័យពាណិជ្ជកម្ម និងការវិនិយោគឱ្យបានកាន់តែច្រើន។ កម្ពុជារំពឹងថា ប៉េរូ នឹងធ្វើការផ្សព្វផ្សាយដល់វិនិយោគិនខ្លួនឱ្យមកទស្សនាស្វែងយល់ពីសក្តានុពល និងឱកាសវិនិយោគនៅកម្ពុជា ពិសេស លើវិស័យកសិកម្ម ឧស្សាហកម្ម កសិ-ឧស្សាហកម្ម ព្រមទាំងវិស័យទេសចរណ៍ ដើម្បីពង្រីកទំហំពាណិជ្ជកម្ម ក៏ដូចជាការវិនិយោគរវាងប្រទេសទាំងពីរ។
ការសន្យាជំរុញកិច្ចសហប្រតិបត្តិការនេះ បានកើតឡើងនៅក្នុងជំនួបពិភាក្សាការងាររវាងឯកឧត្តម រដ្ឋ សារ៉ាវុធ រដ្ឋលេខាធិការក្រសួងពាណិជ្ជកម្ម និងឯកឧត្តម Ricardo Estanislao Morote Canales ឯកអគ្គរដ្ឋទូតប្រទេសប៉េរូប្រចាំកម្ពុជា នារសៀលថ្ងៃពុធ ទី៤ ខែមិថុនា ឆ្នាំ២០២៥ នៅទីស្ដីការក្រសួងពាណិជ្ជកម្ម។
ប្រភពពីក្រសួងពាណិជ្ជកម្មបានឱ្យដឹងថា កិច្ចប្រជុំបានផ្តោតសំខាន់ទៅលើការជំរុញ និងបង្កើនទំហំពាណិជ្ជកម្មទ្វេភាគី ព្រមទាំងកិច្ចសហប្រតិបត្តិការវិនិយោគ ដែលមានសក្តានុពលនៅក្នុងប្រទេសទាំងពីរ ជាពិសេសក្នុងវិស័យកសិកម្ម និងកសិ-ឧស្សាហកម្ម ដូចជា ផលិតផលស្រូវ និងកៅស៊ូ ជាដើម។
ក្នុងជំនួបនោះ ឯកឧត្តមរដ្ឋលេខាធិការ បានស្នើដល់ឯកឧត្តមឯកអគ្គរដ្ឋទូត ឱ្យជួយជំរុញអ្នកវិនិយោគប៉េរូ មកធ្វើធុរកិច្ច និងនាំចេញផលិតផលកម្ពុជានៅក្នុងវិស័យទាំងពីរ ព្រមទាំងពិនិត្យលើការវិនិយោគលើវិស័យសក្តានុពលផ្សេងទៀត តួយ៉ាងដូចជា វិស័យទេសចរណ៍ជាដើម។
ជាការឆ្លើយតប ឯកឧត្តមឯកអគ្គរដ្ឋទូត បានកត់សម្គាល់នូវសំណូមពរ និងបានសន្យាថា នឹងចែករំលែកកិច្ចពិភាក្សាទាំងនេះទៅកាន់វិស័យឯកជនរបស់ប្រទេសប៉េរូ ដើម្បីធ្វើការសិក្សាអំពីលទ្ធភាពទាំងអស់នេះ៕
Account
Security
Favourite Content