បរទេស៖ យោងតាមប្រភពព័ត៌មានពី AP News បានរាយការណ៍ថា ប្រធានាធិបតីសហរដ្ឋអាម៉េរិក លោក Donald Trump បានប្រកាសពីការយកពន្ធលើការនាំចូលទំនិញ ២៥ ភាគរយពីប្រទេសកាណាដា និងម៉ិកស៊ិកចាប់ពីថ្ងៃសៅរ៍ សប្ដាហ៍នេះ ប៉ុន្តែកំពុងពិចារណាថា តើត្រូវយកពន្ធនាំចូលប្រេងពីប្រទេសទាំងនោះដែរឬអត់?

កាលពីថ្ងៃព្រហស្បតិ៍ ប្រធានាធិបតីសហរដ្ឋអាម៉េរិក លោក Donald Trump បានលើកឡើងថា នឹងយកពន្ធ ២៥ ភាគរយលើប្រទេសកាណាដា និងម៉ិកស៊ិក ចាប់ពីថ្ងៃសៅរ៍សប្ដាហ៍នេះ ប៉ុន្តែនៅមិនទាន់ច្បាស់ថា នឹងយកពន្ធ ឬមិនយកពន្ធលើការនាំចូលប្រេងពីប្រទេសទាំង២នេះនៅឡើយនោះទេ ។ ការសម្រេចចិត្តរបស់គាត់នឹងផ្អែកលើភាពជាក់ស្ដែងនៃតម្លៃប្រេងពីដៃគូពាណិជ្ជកម្មទាំងពីរមានតម្លៃសមរម្យ ឬ ភាពយុត្តិធម៌ដែរទេ ខណៈដែលគោលដៅចម្បងនៃការយកពន្ធទាក់ទងនឹងការបញ្ឈប់ការធ្វើអន្តោប្រវេសន៍ខុសច្បាប់ និងការរត់ពន្ធសារធាតុគីមីដែលប្រើសម្រាប់ fentanyl ។ យ៉ាងណាមិញ ប្រសិនបើ Trump ដាក់ពន្ធលើប្រេងកាណាដា និងម៉ិកស៊ិក ន៉ោះការសន្យាម្តងហើយម្តងទៀតរបស់គាត់ក្នុងការកាត់បន្ថយអតិផរណាទាំងមូលដោយការបញ្ចុះថ្លៃថាមពលអាចនឹងគ្មានផលនោះទេ។ ការចំណាយដែលទាក់ទងនឹងពន្ធគយអាចរីករាលដាលទៅអ្នកប្រើប្រាស់ក្នុងទម្រង់តម្លៃសាំងថ្លៃ ដែលនេះគឺជាបញ្ហាដែល Trump បានលើកឡើងជាចំណុចសំខាន់ក្នុងអំឡុងពេលយុទ្ធនាការបោះឆ្នោតជ្រើសប្រធានាធិបតី ដោយគាត់បានប្តេជ្ញាកាត់បន្ថយការចំណាយថាមពលពាក់កណ្តាលក្នុងរយៈពេលមួយឆ្នាំ។

យោងតាមរដ្ឋបាលព័ត៌មានថាមពល (EIA) បានឲ្យដឹងថា សហរដ្ឋអាម៉េរិកបាននាំចូលប្រេងជិត ៤,៦ លានបារ៉ែលជារៀងរាល់ថ្ងៃពីកាណាដាក្នុងខែតុលា និង ៥៦៣ ០០០​ បារ៉ែលពីម៉ិកស៊ិក។ ផលិតកម្មប្រចាំថ្ងៃរបស់សហរដ្ឋអាម៉េរិកក្នុងអំឡុងខែនោះជាមធ្យមជិត ១៣,៥ លានបារ៉ែលក្នុងមួយថ្ងៃ។

Matthew Holmes អនុប្រធានប្រតិបត្តិ និងជាប្រធានគោលនយោបាយសាធារណៈនៅសភាពាណិជ្ជកម្មកាណាដាបានលើកឡើងថា ការយកពន្ធរបស់ Trump នឹងប៉ះពាល់ពលរដ្ឋអាមេរិចជាមុនក្នុងទម្រង់នៃថ្លៃដើមខ្ពស់ ហើយនេះគឺជាលទ្ធផល ចាញ់-ចាញ់-ចាញ់ ។ បន្ថែមពីនេះ កាណាដា នឹងបន្តធ្វើការជាមួយដៃគូដើម្បីបង្ហាញ Trump និងពលរដ្ឋអាមេរិកថា នេះមិនបានកាត់បន្ថយខ្ទង់ចំណាយនៃការរស់នៅទេ ប៉ុន្តែធ្វើឲ្យមានតម្លៃ​​ថ្លៃ​ជាង​មុន ហើយ​នឹងធ្វើ​ឱ្យ​អាជីវកម្ម​ទូទៅកាន់តែ​មាន​ភាព​ច្របូកច្របល់។ លើសពីនេះ កាណាដា និងម៉ិកស៊ិក នឹងឆ្លើយតបទៅនឹងពន្ធគយរបស់សហរដ្ឋអាម៉េរិកជាមួយនឹងវិធានការរបស់ពួកគេដែលកំពុងស្វែងរកការធានា និងឆ្លើយតបទៅនឹងទីក្រុងវ៉ាស៊ីនតោនថា ពួកគេកំពុងចាត់វិធានការនានាដើម្បីដោះស្រាយបញ្ហាព្រំដែនជាមួយសហរដ្ឋអាម៉េរិក។

យ៉ាងណាមិញ Trump មិនបានបង្ហាញពីការព្រួយបារម្ភពាក់ព័ន្ធទៅនឹងការដាក់គំនៀបពន្ធនាំចូលលើដៃគូពាណិជ្ជកម្មរបស់ខ្លួនដែលអាចនឹងជះឥទ្ធិពលអវិជ្ជមានដល់សេដ្ឋកិច្ចអាមេរិកនោះទេ បើទោះបីជាហានិភ័យនៃការកើនឡើងតម្លៃទំនិញខ្ពស់ត្រូវបានបង្ហាញនៅក្នុងការវិភាគរបស់អ្នកជំនាញសេដ្ឋកិច្ចក៏ដោយ។

Trump នៅតែអះអាងថា អាម៉េរិក មិនត្រូវការផលិតផលរបស់ប្រទេសទាំងនោះទេ ដោយសារអាម៉េរិកមានប្រេង ក៏ដូចជាផលិតផលផ្សេងៗទៀត ខណៈដែលកាលពីថ្មីៗនេះ ប្រធានាធិបតីសហរដ្ឋអាម៉េរិករូបនេះ បានគំរាមដាក់ពន្ធ ១០ ភាគរយលើទំនិញនាំចូលដែលផលិតចាប់ពីថ្ងៃទី ១ ខែកុម្ភៈ ឆ្នាំ២០២៥ ហើយក៏កំពុងពិចារណាលើការយកពន្ធពីការនាំចូលទំនិញពីសហភាពអឺរ៉ុបផងដែរ។ មិនត្រឹមតែប៉ុណ្ណោះ Trump បានគំរាមយកពន្ធបន្ថែមទៀតលើបណ្តាប្រទេសដែលកំពុងសម្លឹងមើលជម្រើសផ្សេងជំនួសប្រាក់ដុល្លារអាមេរិកជាមធ្យោបាយនៃការផ្លាស់ប្តូរពិភពលោក៕