ភ្នំពេញ ៖ ខេត្ត​ស្វាយរៀង​ ជា​ខេត្ត​ដែលជាប់នឹង​ព្រំប្រទល់​ប្រទេស​វៀតណាម និងជាខេត្ត​ដែលមានការ​អភិវឌ្ឍ​លើ​ឧស្សាហកម្មច្រើនជាង​គេ ជាពិសេស​នៅក្នុង​ក្រុង​បាវិតផ្ទាល់​តែម្ដង ។ នៅក្នុង​ខេត្ត​នេះ​មាន​តំបន់សេដ្ឋកិច្ច​ដែល​កំពុង​ដំណើរ​ការ​ច្រើនជាង​គេ​ក្នុង​ចំណោម​​បណ្ដាខេត្ត​ទូទាំង​ប្រទេស​​ ជាក់ស្ដែង​ក្នុង​ចំណោម​តំបន់​សេដ្ឋ​កិច្ចពិ​សេស​ដែល​កំពុង​ដំណើរការ​ទាំង​២៨តំបន់​ ឬទីតាំង ​នៅទូទាំង​ប្រទេស​ ដោយឡែក​ខេត្តស្វាយរៀង​មានតំបន់​សេដ្ឋកិច្ច​ពិសេស​កំពុង​ដំណើរការ​រហូតដល់១២​ទីតាំងទៅ​ហើយ ។​

យោងតាម​សេចក្ដី​ប្រកាសព័ត៌មានរបស់ក្រុមប្រឹក្សាអភិវឌ្ឍន៍​កម្ពុជា​កាលពីថ្ងៃទី ១២ ខែមករា ឆ្នាំ២០២៥ បាន​បង្ហា​ញឱ្យ​ដឹងថា គិតមកដល់​ឆ្នាំ២០២៥​នេះ កម្ពុជា​មានតំបន់​សេដ្ឋកិច្ច​ពិសេស​សរុប​រហូតដល់៥២​តំបន់ ប៉ុន្តែ​មាន​តែ​២៨​តំបន់ប៉ុណ្ណោះកំពុង​ដំណើរការ ក្នុងនោះ ខេត្តស្វាយរៀង​មាន​តំបន់​សេដ្ឋកិច្ច​ពិសេស​ចំនួន១២​តំបន់​​ដែល​កំពុង​ដំណើរការ និង​បានស្រូបទាញ​គម្រោង​វិនិយោគ​ប្រមាណ២៨០​គម្រោង​ ក្នុង​ទុនវិនិយោគ​ប្រមាណ ៣​ពាន់​​លានដុល្លារអាមេរិក​ និង​បានផ្ដល់​ការងារ​ជូន​បងប្អូន​កម្មករ និយោជិត​​ប្រមាណជិត​១០ម៉ឺន​កន្លែង ។

ក្នុង​របាយការណ៍​ដដែលឱ្យដឹងថា គ្រាន់​តែ​តំបន់​សេដ្ឋកិច្ច​ពិសេស​មួយ​ក្នុង​ក្រុង​បាវិត ឈ្មោះ ស៊ីន​បាវិត​ បាន​ស្រូបទាញ​គម្រោង​វិនិយោគ​ចំនួន១១​គម្រោង និងសុទ្ធតែស្រូបទាញបានគម្រោងធំៗ​បណ្ដាក់ទុន​វិនិយោគ​ជា​បន្ត​បន្ទាប់​ជាពិសេស​ វិស័យឧស្សាហកម្ម​ ដោយប្រើប្រាស់​បច្ចេក​វិទ្យា​ទំនើប​ៗចុងក្រោយ ។​

​​បើតាម​ក្រុមប្រឹក្សា​អភិវឌ្ឍន៍​កម្ពុជា ក្នុង​ចំណោម​តំបន់​សេដ្ឋកិច្ច​ពិសេស​ទាំង​២៨​តំបន់ បានស្រូបទាញ​គម្រោង​វិនិយោគ​ប្រមាណ៨៣៥គម្រោង​ក្នុងទំហំទឹកប្រាក់​វិនិយោគ​ប្រមាណ ១១,៧​ពាន់​លានដុល្លារអាមេរិក​ និង​ផ្ដល់​ការងារ​ជូន​ប្រជាពលរដ្ឋ​ប្រមាណ​ជាង ​១៩ម៉ឺន ​៥ពាន់​នាក់ ។

បើតាមឯកឧត្តម​ គង់ វិមាន អគ្គលេខាធិការ​​នៃ​អគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា បាន​មាន​ប្រសា​សន៍​ថា​ បច្ចុប្បន្ន​នេះ តំបន់​សេដ្ឋកិច្ច​ពិសេស​ក្នុងប្រទេស​កម្ពុជា​បាន​ស្រូបទាញ​គម្រោង​វិនិយោគ​ពី​ក្នុង និង​ក្រៅ​ប្រទេស​ច្រើន ហើយវិនិយោគិន​បរទេស​ ជាពិសេស​មកពីប្រទេស​ចិន បាន​សម្លឹង​រកឱកាស​វិនិយោគ​ក្នុង​តំបន់​សេដ្ឋកិច្ចពិសេស​ក្នុង​ប្រទេស​កម្ពុជា​បន្ត​បន្ទាប់ទៀត ។

ឯកឧត្តម​បន្តថា​ ក្នុង​ឆ្នាំ២០២៤​កន្លងទៅនេះ ក្រុមប្រឹក្សាអភិវឌ្ឍន៍​កម្ពុជា​បានអនុម័ត​គម្រោង​វិនិយោគ​សរុប​ចំនួន ៤១៤គម្រោង ដែលមានទឹកប្រាក់​ជិត ៧​ពាន់​លានដុល្លារអាមេរិក និងជា​ប្រវត្តិ​សាស្ត្រ​​របស់កម្ពុជា​ដែល​បានអនុម័តគម្រោង​វិនិយោគ​មានទឹកប្រាក់​ដ៏ច្រើន​បែបនេះ ។

គួរកត់សម្គាល់ថា រាជរដ្ឋាភិបាលកម្ពុជា​ បាន និងកំពុង​ជំរុញ​លើកទឹកចិត្ត​ដល់​វិនិយោគិន​ក្នុងស្រុក​ក៏ដូចជា​វិនិយោគិន​បរទេស​ដែល​ចូលមក​បណ្ដាក់ទុនវិនិយោគ​នៅកម្ពុជា ឱ្យ​បណ្ដាក់ទុនវិនិយោគ​លើ​តំបន់សេដ្ឋកិច្ច​ពិសេស​បន្ថែមទៀត ជាពិសេស​តំបន់សេដ្ឋកិច្ច​ដែល​ផ្ដោត​លើ​វិនិយោគិនមកពីមួយប្រទេស​ ឧទាហរណ៍​ដូចជា​តំបន់សេដ្ឋកិច្ច​ជប៉ុន តំបន់សេដ្ឋកិច្ចពិសេស​ចិន ឬតំបន់សេដ្ឋកិច្ចពិសេស​កូរ៉េ​ជាដើម  ។ ការ​បង្កើតតំបន់សេដ្ឋកិច្ច​ពិសេស​បែបនេះ នឹង​ទាក់ទាញ​វិនិយោគិនមកពីប្រទេស​ទាំង​នោះឱ្យ​ចូលមកវិនិយោគ​ក្នុង​តំបន់សេដ្ឋកិច្ចពិសេស​ទាំង​នោះ ព្រោះក្នុង​តំបន់សេដ្ឋកិច្ច​ពិសេស វិនិយោគិនមិន​មានភាពស្មុគស្មាញ​ក្នុងការ​វិនិយោគ​ ៕