សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សម្រាប់មន្ត្រីរាជការស៊ីវិល កងកម្លាំងប្រដាប់អាវុធ ប្រជាពលរដ្ឋ ដែលបានត្រៀមខ្លួនក្នុងពិធីបុណ្យចូលថ្មីប្រពៃណីជាតិខ្មែរ ឆ្នាំ២០២៤ ដែលនឹងចូលមកដល់នៅប៉ុន្មានថ្ងៃខាងមុខនេះ នឹងទទួលបានកាដូពីរាជរដ្ឋាភិបាលអាណត្តិទី៧ នូវការដំឡើងប្រាក់បំណាច់មុខងារជូនមន្រ្តីរាជការស៊ីវិល និងកងកម្លាំងប្រដាប់អាវុធ និងការបន្តផ្តល់ប្រាក់ឧបត្ថម្ភសម្រាប់បុណ្យចូលថ្មីប្រពៃណីជាតិខ្មែរ ដែលនេះគឺជាសមានចិត្តរបស់រាជរដ្ឋាភិបាលចំពោះជនរួមជាតិ ហើយក៏ជាការបញ្ជាក់អំពីការធានាសេដ្ឋកិច្ចសង្គមកម្ពុជាផងដែរ។
ជាមួយគ្នានេះ តាមរយៈរដ្ឋបាលរាជធានីភ្នំពេញ ដោយអនុវត្តតាមប្រសាសន៍ដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សាលារាជធានី បានរៀបចំរថយន្តក្រុង ចំនួន ៤៥៥គ្រឿង សម្រាប់បម្រើសេវាដឹកជញ្ជូនសាធារណៈរយៈពេល៦ថ្ងៃ ចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៤ ដោយមិនបង់ប្រាក់ ដើម្បីជួយសម្រួលដល់ការចំណាយរបស់បងប្អូនប្រជាពលរដ្ឋ ក្នុងការធ្វើដំណើរទៅលេងស្រុកកំណើត ជួបជុំបងប្អូន ក្រុមគ្រួសារ ក្នុងពិធីបុណ្យចូលឆ្នាំប្រពៃណីជាតិខ្មែរ។
លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានលើកឡើងថា ការផ្តល់ប្រាក់ឧបត្ថម្ភ និងដំឡើងប្រាក់បំណាច់មុខងារផ្សេងៗជូនមន្រ្តីរាជការស៊ីវិល និងកងកម្លាំងប្រដាប់អាវុធ រួមទាំងការផ្តល់សម្រាប់បម្រើសេវាដឹកជញ្ជូនសាធារណៈដោយមិនបង់ប្រាក់ ដើម្បីជួយសម្រួលដល់ការចំណាយជូនបងប្អូនប្រជាពលរដ្ឋក្នុងការធ្វើដំណើរទៅលេងស្រុកកំណើតសម្រាប់ឆ្នាំ២០២៤នេះ គឺជាការបន្តយកចិត្តទុកដាក់របស់រាជរដ្ឋាភិបាល ដែលដឹកនាំដោយ សម្តេចធិបតី ហ៊ុន ម៉ាណែត ។
លោកបណ្ឌិត បានលើកឡើងថា ទោះបីជាស្ថានភាពសេដ្ឋកិច្ចពិភពលោកកំពុងប្រឈមយ៉ាងណាក្តី ប៉ុន្តែរាជរដ្ឋាភិបាលកម្ពុជានៅមានជំហររឹងមាំ និងមានកញ្ចប់ថវិកាគ្រប់គ្រាន់សម្រាប់ដំឡើង និងឧបត្ថម្ភជូនមន្រ្តីរាជការ និងកងកម្លាំងប្រដាប់អាវុធ រួមទាំងការផ្តល់ជូនមធ្យោបាយធ្វើដំណើរដល់ប្រជាពលរដ្ឋបានធ្វើដំណើរផងដែរ ដោលគោលនយោបាយរាជរដ្ឋាភិបាល ដែលដឹកនាំដោយសម្តេចធិបតី គឺការបង្កើនការឧបត្ថម្ភ និងដំឡើងប្រាក់បៀវត្សជារៀងរាល់ឆ្នាំ។
ចំណុចនេះបញ្ជាក់ថា ទោះស្ថានភាពសេដ្ឋកិច្ចសកលមានភាពថមថយយ៉ាងណាក៏ដោយ ប៉ុន្តែរាជរដ្ឋាភិបាល បានកាត់បន្ថយខ្ទង់ចំណាយមួយចំនួន ដោយបង្វែថវិកាទាំងនោះមកផ្តល់ជូនមន្រ្តីរាជការស៊ីវិល និងកងកម្លាំងប្រដាប់អាវុធ ដើម្បីប្រសិទ្ធភាពការងារ ក៏ដូចជាភាពសុខដុមរមនារបស់ប្រជាពលរដ្ឋកម្ពុជា ។
លោកបណ្ឌិត ហុង វណ្ណៈ បានបញ្ជាក់ថា ៖ «ការផ្តល់ជូនមធ្យោបាយធ្វើដំណើរដល់ប្រជាពលរដ្ឋដោយមិនបង់ប្រាក់នៅក្នុងព្រឹត្តិការណ៍ ក៏ដូចជាកម្មវិធីធំៗ គឺជាការរួមចំណែកក្នុងការកាត់បន្ថយការចំណាយរបស់ប្រជាពលរដ្ឋបានមួយចំនួនធំផងដែរ ។ បើយើងគិតជាមធ្យមគ្រប់ ២៥ ខេត្តក្រុង មានអ្នកដំណើរទៅស្រុកប្រមាណ ១លាននាក់ ដោយក្នុង១នាក់ ១០ដុល្លារ ដូច្នេះ ទាំងទៅស្រុក និងត្រឡប់ពីស្រុកមកក្រុងភ្នំពេញវិញ គឺអាចចំណាយ ២០ដុល្លារ ហើយគុណនឹង១លាននាក់ គឺស្មើនឹង ២០លានដុល្លារ »។
ដោយឡែកការដំឡើងប្រាក់មុខងារ គ្រប់តំណែង ឋានៈ ទាំងអស់ ដែលគិតជាមធ្យមក្នុងម្នាក់តម្លើងបាន ៣ម៉ឺនរៀល ជាមួយចំនួនមន្ត្រីរាជការសរុបត្រឹមប្រមាណ៥០ម៉ឺននាក់ ក៏ចំនួននេះមិនតិចនោះដែរ ដែលទាំងនេះក៏ជាការបង្ហាញពីការគិតគូរទៅដល់កម្រិតជីវភាពមន្ត្រីរាជការផងដែរ៕
Account
Security
Favourite Content