សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងទៅតាមប្រភពពីព័ត៌មានពី Courthouse News Service បានបង្ហាញថា សហភាពអឺរ៉ុបគ្រោងនឹងរៀបចំយុទ្ធសាស្ត្រដ៏តឹងរ៉ឹងសម្រាប់ប្លុកនេះ ដើម្បីទប់ទល់នឹងហានិភ័យសន្តិសុខសេដ្ឋកិច្ច រួមទាំងប្រកួតប្រជែងជាមួយនឹងរុស្ស៊ី និងចិនផងដែរ។
កាលពីឆ្នាំកន្លងទៅនេះ សហភាពអឺរ៉ុបដែលពឹងផ្អែកខ្លាំងទៅលើថាមពលរបស់រុស្ស៊ី ចាំបាច់ត្រូវព្យាយាមស្វែងរកធនធានថ្មីបន្ទាប់ពីសង្គ្រាមរវាងរុស្ស៊ី-អ៊ុយក្រែន។ កាលពីថ្ងៃអង្គារ៍កន្លងទៅនេះ លោកស្រី Ursula von der Leyen ដែលជាប្រធានគណៈកម្មាការអឺរ៉ុបបានជំរុញឱ្យសហភាពអឺរ៉ុបបង្កើនផលិតកម្មកាន់តែច្រើននៅក្នុងតំបន់បន្ទាប់ពីខ្សែសង្វាក់ផ្គត់ផ្គង់ត្រូវបានបំផ្លិចបំផ្លាញអំឡុងពេលរាតត្បាតកូវីដ-១៩។ លើសពីនេះ សហភាពអឹរ៉ុបចាំបាច់ត្រូវរៀបចំយុទ្ធសាស្រ្តថ្មី ដោយខ្លួននឹងប្រកាសសំណើមួយមុនដំណាច់ឆ្នាំនេះអំពីការវិនិយោគក្រៅប្រទេស ដែលអាចកំណត់ការផ្តល់មូលនិធិដោយក្រុមហ៊ុនអឺរ៉ុបសម្រាប់ប្រតិបត្តិការនៅបរទេស ពីព្រោះវាអាចជាបញ្ហាប្រឈមមួយ។
ម៉្យាងវិញទៀត ការបែកធ្លាយព័ត៌មានដ៏រសើបអំពីបច្ចេកវិទ្យាទំនើប គឺជាហានិភ័យចម្បងមួយដែលអាចបង្កើនសមត្ថភាពយោធា និងស៊ើបការណ៍របស់តួអង្គណាមួយដែលអាចប្រើសមត្ថភាពទាំងនេះដើម្បីគំរាមកំហែងដល់សន្តិភាព និងសន្តិសុខអន្តរជាតិ។ បច្ចេកវិទ្យាសំខាន់ៗដែលដាក់នៅក្នុងយុទ្ធសាស្ត្រសន្តិសុខរបស់អឹរ៉ុបនោះមានដូចជា quantum, semiconductors កម្រិតខ្ពស់ និង បញ្ញាសិប្បនិម្មិតជាដើម។ ប្រធានគណៈកម្មាការអឺរ៉ុប លើកឡើងដែរថា ពួកគេកំពុងសម្លឹងមើលទៅលើសំណុំតូចមួយនៃបច្ចេកវិទ្យាទំនើបចុងក្រោយនៅក្នុងសន្តិសុខសេដ្ឋកិច្ច ដើម្បីធ្វើឱ្យប្រាកដថា ពួកគេមិនបង្កើនសមត្ថភាពយោធានៃប្រទេសមួយចំនួន។
ស្របពេលនេះដែរ ប្រធានគណៈកម្មាការអឺរ៉ុបបដិសេធមិនពណ៌នាអំពីយុទ្ធសាស្ត្រសម្រាប់ជាការឆ្លើយតបទៅនឹងទីក្រុងប៉េកាំងនោះទេ ប៉ុន្តែសហភាពអឺរ៉ុបបានអនុម័តវិធានការជាបន្តបន្ទាប់ដើម្បីប្រជែងនឹងការពង្រីកកម្លាំងសេដ្ឋកិច្ចរបស់ចិន ដែលជាការឆ្លើយតបទៅនឹងសម្ពាធពីសហរដ្ឋអាមេរិក។ មិនត្រឹមតែប៉ុណ្ណោះ សហភាពអឺរ៉ុបក៏នឹងពិនិត្យឡើងវិញនូវបទប្បញ្ញត្តិរបស់ខ្លួនដើម្បីរឹតបន្តឹងការគ្រប់គ្រងលើការនាំចេញទំនិញប្រើប្រាស់លើគោលបំណងពីរទាំងស៊ីវិល និងយោធា រួមទាំងពិនិត្យមើលការទិញយកពីបរទេសនៅក្នុងឧស្សាហកម្មសំខាន់ៗផងដែរ។
ទោះជាយ៉ាងណាក៏ដោយ ទីក្រុងប៊្រូសែលមានចង់កំណត់យុទ្ធសាស្រ្តផ្ទាល់របស់ខ្លួនចំពោះទីក្រុងប៉េកាំង ដោយសារមានការព្រួយបារម្ភលើការពឹងផ្អែកខ្លាំងពេកលើប្រទេសចិន ខណដែលចង់រក្សាទំនាក់ទំនងជាមួយប្រទេសសេដ្ឋកិច្ចធំបំផុតទីពីររបស់ពិភពលោកមួយនេះ។ ក្នុងពេលឥឡូវនេះ រដ្ឋសមាជិកសហភាពអឺរ៉ុបមួយចំនួនព្រួយបារម្ភអំពីការបង្កជម្លោះជាមួយចិន និងការចាប់ផ្តើមសង្គ្រាមពាណិជ្ជកម្ម។ កាលពីដើមខែកន្លងទៅនេះ បន្ទាប់ពីចិនបានកំណត់គោលដៅលើប្រទេសលីទុយអានីក្នុងជម្លោះជាមួយនឹងកោះតៃវ៉ាន់ សហភាពអឺរ៉ុបបានសម្រេចចិត្តបង្កើតយន្តការពាណិជ្ជកម្មដែលនឹងដាក់ទណ្ឌកម្មលើប្រទេសណាដែលព្យាយាមដាក់សម្ពាធលើសមាជិកណាមួយរបស់ខ្លួន។ ទន្ទឺមនឹងនោះដែរ សហភាពអឺរ៉ុបបានប្រកាសថានឹងជំរុញឱ្យអឺរ៉ុបផលិតបច្ចេកវិទ្យាគុណភាពល្អជាងមុនរួមទាំងវត្ថុធាតុដើមសំខាន់ៗដែលត្រូវការសម្រាប់ផលិតផលអគ្គិសនី។ អ្នកការទូតអ៊ឺរ៉ុបម្នាក់បាននិយាយថា ការកើនឡើងនៃចំនួនរថយន្តអគ្គិសនីពីចិនដែលបានលក់នៅក្នុងប្លុកអឺរ៉ុបនេះ អាចនឹងគំរាមកំហែងដល់ឧស្សាហកម្មផលិតរថយន្ត របស់ខ្លួន៕
Account
Security
Favourite Content