បរទេស ៖ យោងតាមប្រភពព័ត៌មានពីរ៉យទ័របានរាយការណ៍ថា សហភាពអឺរ៉ុបមានផែនការប្រើប្រាស់ប្រាក់ចំណេញដែលបង្កើតដោយទ្រព្យសម្បត្តិបង្កករបស់រុស្ស៊ី ដើម្បីទិញអាវុធសម្រាប់អ៊ុយក្រែន ប៉ុន្តែសមជិកមួយចំនួនបានប្រឆាំងនឹងផែនការនេះ។

កាលពីខែមុន លោកស្រី Ursula von der Leyen ប្រធានគណៈកម្មការអឺរ៉ុបបានស្នើឱ្យប្រើការប្រាក់ដែលរកបានពីទ្រព្យសម្បត្តិបង្កករុស្ស៊ី ដើម្បីទិញអាវុធជួយអ៊ុយក្រែនជាជាងការប្រើប្រាស់មូលនិធិសម្រាប់ការកសាងប្រទេសឡើងវិញដូចដែលបានគ្រោងទុកដំបូង។ យ៉ាងណាមិញ ប្រទេសម៉ាល់តា លុចសំបួ និងហុងគ្រី បានប្រឆាំងនឹងផែនការនេះក្នុងអំឡុងពេលកិច្ចប្រជុំរបស់ឯកអគ្គរដ្ឋទូតសហភាពអឺរ៉ុបទាំង ២៧ រូបកាលពីថ្ងៃពុធកន្លងទៅនេះ។

គួរឲ្យបញ្ជាក់ដែរថា លោកខាងលិចបានបង្កកទ្រព្យសម្បត្តិរុស្ស៊ីប្រហែល ៣០០ ពាន់លានដុល្លារដែលជាកម្មសិទ្ធិរបស់ធនាគារកណ្តាលរុស្ស៊ីចាប់តាំងពីការចាប់ផ្តើមនៃជម្លោះអ៊ុយក្រែនកាលពី ២ ឆ្នាំមុន។ លើសពីនេះ Euroclear ការិយាល័យបោសសម្អាតដែលមានមូលដ្ឋាននៅទីក្រុងប្រ៊ូសែល បានកាន់កាប់ទ្រព្យសម្បត្តិបង្កកនេះប្រហែល ១៩១ ពាន់លានអឺរ៉ូ (២០៥ ពាន់លានដុល្លារ) ហើយបានទទួលការប្រាក់ជិត ៤,៤ ពាន់លានអឺរ៉ូ។ ទន្ទឹមនឹងនេះ សហភាពអឺរ៉ុបមានបំណងចង់ផ្តល់ឱ្យទីក្រុងគីវពី ២ ​​ទៅ ៣ ពាន់លានអឺរ៉ូនៅក្នុងប្រាក់ចំណូលដែលបង្កើតដោយទ្រព្យសម្បត្តិដែលបានបង្កកនោះ។ យោងតាម​ប្រភពដដែលបានដកស្រង់សម្តីមន្ត្រីសហភាពអឺរ៉ុបម្នាក់ថា កញ្ចប់ប្រាក់ជំនួយដំបូងអាចនឹងត្រូវបានបញ្ចេញនៅដើមខែកក្កដា ប្រសិនបើទីក្រុងប្រ៊ូសែលសែលអាចធានាបាននូវការយល់ព្រមពីសមាជិកប្លុកទាំងអស់នោះ។

ទោះជាយ៉ាងណាក្តី ប្រទេសជាសមាជិកមួយចំនួនមានការប្រុងប្រយ័ត្នចំពោះសំណើដ៏ចម្រូងចម្រាសមួយនេះ ដោយនិយាយថា ពួកគេត្រូវការការវិភាគឱ្យបានហ្មត់ចត់បន្ថែមទៀត។ លើសពីនេះ ហុងគ្រីបានលើកឡើងថា ប្រាក់ចំណូលពីទ្រព្យសម្បត្តិរបស់រុស្ស៊ីគួរតែត្រូវបានបែងចែកទៅឱ្យការកសាងឡើងវិញរបស់អ៊ុយក្រែនជាជាងប្រើសម្រាប់ផ្តល់មូលនិធិទៅលើវិស័យយោធា។​ ទោះបីជាប្រទេសលោកខាងលិចមួយចំនួនគាំទ្រលើទីក្រុងគីវ ដោយយល់ស្របថាទ្រព្យសម្បត្តិដែលបង្កកគួរតែត្រូវបានប្រើដើម្បីជួយដល់អ៊ុយក្រែន ប៉ុន្តែពួកគេមិនយល់ស្របលើភាពស្របច្បាប់នៃការរឹបអូសទាំងស្រុងនោះទេ។ ស្របពេលជាមួយគ្នានេះ សហរដ្ឋអាមេរិក និងចក្រភពអង់គ្លេសបានគាំទ្រលើការរឹបអូសសាច់ប្រាក់ដោយផ្ទាល់ ប៉ុន្តែសមាជិកសហភាពអឺរ៉ុបមួយចំនួនដូចជា បារាំង និងអាល្លឺម៉ង់ បានព្រមានថា វិធានការនេះនឹងបំផ្លាញការជឿទុកចិត្តលើប្រព័ន្ធហិរញ្ញវត្ថុអឺរ៉ុប។ មិនត្រឹមតែប៉ុណ្ណោះ​ ទង្វើដ៏ខ្លាំងក្លាបែបនេះនឹងបង្កើតគំរូមិនល្អ ដែលអាចជំរុញឱ្យប្រទេសផ្សេងទៀតអស់ទំនុកចិត្តក្នុងការរក្សាប្រាក់បម្រុងរបស់ពួកគេជារូបិយប័ណ្ណលោកខាងលិច ពីព្រោះពួកគេភ័យខ្លាចថា នៅថ្ងៃណាមួយពួកគេអាចក្លាយជាគោលដៅនៃទណ្ឌកម្ម។

ជាការឆ្លើយតប ទីក្រុងម៉ូស្គូបានព្រមានម្តងហើយម្តងទៀតថា រាល់សកម្មភាពដែលធ្វើឡើងប្រឆាំងនឹងទ្រព្យសម្បត្តិរបស់ខ្លួនស្មើនឹង “ចោរកម្ម” ដោយសង្កត់ធ្ងន់ថា ការរឹបអូសយកមូលនិធិ ឬសកម្មភាពស្រដៀងគ្នាណាមួយនឹងបំពានច្បាប់អន្តរជាតិ និងធ្វើឱ្យខូចដល់រូបិយប័ណ្ណលោកខាងលិចដែលជាប្រព័ន្ធហិរញ្ញវត្ថុសកល និងសេដ្ឋកិច្ចពិភពលោក៕