កាលពីខែឧសភា ឆ្នាំ២០២៣ យន្តហោះដឹកអ្នកដំណើរដែលផលិតក្នុងស្រុកដំបូងបង្អស់របស់ប្រទេសចិន C919 ត្រូវបានប្រកាសជាផ្លូវការដាក់ឲ្យប្រតិបត្តិការហោះហើរជាលើកទី១ដែលគិតមកទល់ពេលនេះមានរយៈពេលជាង១ឆ្នាំទៅហើយ។

ទោះបីជាមិនទាន់អាចហក់ចូលក្នុងទីផ្សារអឺរ៉ុបបាននៅឡើយក្តី ប៉ុន្តែដើម្បីប្រជែងទៅនឹងក្រុមហ៊ុនផលិតយន្តហោះរបស់បារាំង និងអាមេរិក Airbus ក៏ដូចជា Boeing ផងដែរនោះ C919 ដែលជាផលិតផលរបស់ក្រុមហ៊ុនចិន COMAC (The Commercial Aircraft Corporation of China) កំពុងដាក់យុទ្ធសាស្ត្រក្នុងការពង្រីកខ្លួនចូលក្នុងទីផ្សារអាស៊ី ជាពិសេសទីផ្សារក្នុងស្រុកចិនតែម្តងដែលកំពុងមានតំរូវការខ្លាំង និងត្រូវបានទទួលស្គាល់ថាជាទីផ្សារដែលមានសកម្មភាពមមាញឹកបំផុតមួយរបស់ពិភពលោក។

ខែឧសភាកន្លងទៅថ្មីនេះ ក្រុមហ៊ុនអាកាសចរចិន China Eastern Airlines ទើបតែទទួលបានយន្តហោះ C919 ទី៦របស់ខ្លួនដើម្បីប្រើប្រាស់ក្នុងប្រតិបត្តិការដឹកជញ្ជូនភ្ញៀវពីអាកាសយានដ្ឋាន Shanghai Pudong International Airport ទៅ Shanghai Hongqiao International Airport។

ក្នុងឆ្នាំ២០២៤នេះ តម្លៃលក់របស់យន្តហោះ C919 មានការកើនឡើងគួរឲ្យកត់សំគាល់ ពោលគឺលើសតម្លៃដែលក្រុមហ៊ុនធ្លាប់បានកុងត្រាឲ្យ China Eastern Airlines កាលពីឆ្នាំ២០២២ ពី ៩៩លានដុល្លារទៅដល់ ១០៨លានដុល្លារក្នុងមួយគ្រឿង ខណៈដែលយន្តហោះដែលមានរូបរាងស្រដៀងគ្នាដូចជា Boeing 737 MAX7 ជាដើមមានតម្លៃត្រឹមតែ៩៩,៧លានដុល្លារ ហើយ Airbus A320 ត្រឹមតែ៩៨លានដុល្លារ។

តាមផែនការក្នុងឆ្នាំនេះ COMAC អាចផលិត និងប្រគល់ C919 សរុបចំនួន១០គ្រឿងទៅឲ្យក្រុមហ៊ុនអាកាសចរ China Eastern Airlines ពោលគឺស្ថិតនៅក្នុងចំណោមកញ្ចប់ចំនួនយន្តហោះដែលខ្លួនបានចុះកុងត្រាទិញសរុបដល់ទៅ១០០គ្រឿង។

គួរឲ្យដឹងដែរថា យុទ្ធសាស្ត្របច្ចុប្បន្ននេះ COMAC មិនអាចធ្វើអ្វីលើសពីទីផ្សារក្នុងស្រុកនៅឡើយ ជាពិសេសប្រទេសចិនខ្លួនឯង និងជម្រើសបន្ទាប់គឺក្នុងតំបន់អាស៊ី។ ជាក់ស្តែងកាលពីដើមឆ្នាំកន្លងមក C919 ធ្លាប់បានបង្ហាញវត្តមាននៅក្នុងពិពណ៍យន្តហោះអន្តរជាតិរបស់ប្រទេសសិង្ហបុរីផងដែរ ដោយសង្ឃឹមថានឹងអាចទាក់ទាញចិត្តអតិថិជននៅក្នុងតំបន់។ វាក៏ជាលើកទី១ដូចគ្នាដែរ ចំពោះវត្តមានរបស់យន្តហោះដឹកអ្នកដំណើរនេះបានបង្ហាញខ្លួននៅក្រៅប្រទេសចិន។

ប្រធានផ្នែកទីប្រឹក្សាអាកាសចរអាស៊ី និងជាសាស្ត្រាចារ្យនៅសកលវិទ្យា New York University លោក David Yu បានមើលឃើញអំពីយុទ្ធសាស្ត្ររបស់ COMAC ថាជាការរៀបចំដ៏ត្រឹមត្រូវ និងចំពេលវេលាបំផុតដោយការបង្ហាញខ្លួននៅក្នុងទីផ្សារអាស៊ីនៅពេលនេះ ខណៈដែលក្រុមហ៊ុន Boeing កំពុងមានបញ្ហាផលិតកម្មដោយសារបញ្ហាបច្ចេកទេស ហើយ Airbus កំពុងជួបបញ្ហាយឺតយ៉ាវក្នុងសង្វាក់ផលិតកម្មរបស់ខ្លួនដូចគ្នាដែរ។

ទោះជាយ៉ាងណាក៏ដោយ ទីផ្សារអាស៊ីគឺនៅតែជាគោលដៅអាទិភាពបំផុតសម្រាប់ C919 ដោយសារតែការវាយលុកចូលទីផ្សារអឺរ៉ុបមានភាពតឹងតែងខ្លាំងពាក់ព័ន្ធចាប់តាំងពីទំនុកចិត្តទីផ្សារទៅដល់បញ្ហាច្បាប់អនុញ្ញាត ជាពិសេសក្នុងគ្រាដែលនយោបាយធ្វើពាណិជ្ជកម្មរវាងមហាយក្សចិន និងអាមេរិកហាក់ដូចជាមិនត្រូវរ៉ូវគ្នាឡើងវិញនៅឡើយនោះ៕