សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមអ្នកជំនាញសេដ្ឋកិច្ចបានលើកឡើងស្រដៀងគ្នាថា បើទោះបីកម្ពុជា ជួបវិបត្តិសង្គ្រាមឈ្លានពានព្រំដែនពីសំណាក់ភាគីថៃផ្ទួនៗដោយ ក៏សេដ្ឋកិច្ចកម្ពុជានៅតែរក្សាបាននូវភាពធន់ ពោលគឺស្ថិតក្នុងរង្វង់ប្រមាណជា ៥% ប្រហាក់ប្រហែលឆ្នាំ២០២៥។
លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម និងសេដ្ឋកិច្ចបានព្យាករណ៍ថា សេដ្ឋកិច្ចកម្ពុជានៅតែរក្សាបានក្នុងរង្វង់ ៥% ប្រហាក់ប្រហែលនឹងឆ្នាំ២០២៥ ដោយសារកម្ពុជាមានវិស័យដែលជាជន្ទល់ទប់លំនឹងសេដ្ឋកិច្ចសំខាន់ៗដូចជា វិស័យវាយណភណ្ឌកាត់ដេរសម្លៀកបំពាក់ ស្បែកជើង វិស័យកម្មន្តសាល វិស័យទេសចរណ៍ និងវិស័យកសិកម្ម។
លោកបានបញ្ជាក់ថា ៖
«ជារូមការងើបឡើងនៃសេដ្ឋកិច្ចរបស់កម្ពុជា Macro Economic ទាញឡើងដោយវិស័យឧស្សាហកម្ម ជាពិសេសវិស័យឧស្សាហកម្មដែលមានរោងចក្រផលិតនៅតំបន់សេដ្ឋកិច្ច គឺឧស្សាហកម្មរោងចក្រកាត់ដេរសម្លៀកបំពាក់ ស្បែកជើង និងសម្ភារៈធ្វើដំណើរ រួមទាំងវិស័យកម្មន្តសាល ក៏ដូចជាវិស័យវិស័យសេវាកម្ម»។
ទោះជាយ៉ាងណា វិស័យសហគ្រាសធុនតូច និងមធ្យម វិស័យលក់រាយ ក៏ដូចជាអចលនទ្រព្យនៅមានភាពត្រដាបត្រដួសនៅឡើយ ដែលតម្រូវឱ្យមានការយកចិត្តទុកដាក់បន្ថែមទៀតពីរាជរដ្ឋាភិបាល ក្នុងការជួយសម្របសម្រួល និងលើកទឹកចិត្តឱ្យវិស័យនេះងើបឡើងវិញ ក្នុងកាលទេសដែលកម្ពុជាធ្វើពហិការមិនប្រើទំនិញថៃ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា បានវាយតម្លៃថា ទោះបីកម្ពុជាជួបសង្គ្រាមឈ្លានពានទឹកដីពីប្រទេសថៃ ប៉ុន្តែសេដ្ឋកិច្ចក្នុងប្រទេសហាក់មិនមានបញ្ហាប្រឈមនោះឡើយ ដោយសារការនាំចេញនៅតែរក្សាបានកំណើនកើនខ្ពស់បើធៀបនឹងឆ្នាំមុន។
លោកបន្តថា ៖
«យើងក្រឡេកមើលអំពីការនាំចេញរបស់កម្ពុជា ហាក់ដូចមិនមានបញ្ហាប្រឈមអ្វីនោះទេ ដូច្នេះប្រទេសកម្ពុជាយើងគឺជាប្រទេសដែលធ្វើការនាំចេញ សម្រាប់ចំណូលកំណើនសេដ្ឋកិច្ច ដែលយើងអាចរំពឹងថាសេដ្ឋកិច្ចកម្ពុជា នៅតែរក្សាកំណើនប្រមាណ ៤%»។
ទោះជាដូច្នេះក្ដី អ្នកជំនាញសេដ្ឋកិច្ចរូបនេះបានព្រមានថា ការបែងចែកកំណើនសេដ្ឋកិច្ចនៅមានភាពមិនស្មើគ្នា។ មិនស្មើគ្នានៅត្រង់ថា ទោះជាការនាំចេញមានកំណើនខ្ពស់ ប៉ុន្តែវិស័យលក់រាយនៅតែមានបញ្ហាប្រឈមដោយសារពលរដ្ឋជាច្រើនបាត់បង់មុខរបរ ក្រោយការរត់ភៀសខ្លួនចេញពីសង្រ្គាមឈ្លានពានទឹកដីពីសំណាក់យោធាថៃ ពិសេសការធ្លាក់ចុះវិស័យសេវាកម្មទេសចរណ៍ វិស័យលក់ដុំ និងលក់រាយ ព្រមទាំងវិស័យអចលនទ្រព្យជាដើម។
គួរបញ្ជាក់ថា ធនាគារអភិវឌ្ឍន៍អាស៊ី (ADB) កាលពីពេលថ្មីៗនេះបានបន្ទាបការព្យាករកំណើនសេដ្ឋកិច្ចកម្ពុជា ពី ៦,២% មកនៅត្រឹម ៥% សម្រាប់ឆ្នាំ២០២៦ ដែលនេះបានឆ្លុះបញ្ចាំងពីបញ្ហាប្រឈមសម្រាប់សេដ្ឋកិច្ចកម្ពុជា ទាក់ទងនឹងភាពតានតឹងភូមិសាស្ត្រនយោបាយ បញ្ហាសង្រ្គាមឈ្លានពានទឹកដី និងភាពមិនច្បាស់លាស់នៃទីផ្សារនាំចេញទៅសហរដ្ឋអាម៉េរិក ក្រោយការដាក់សម្ពាធពន្ធបដិការមកលើកម្ពុជា៕
Account
Security
Favourite Content