សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ចិន បានអះអាងពីការប្រកាន់ខ្ជាប់នូវកិច្ចការពារសិទ្ធិ និងផលប្រយោជន៍របស់ខ្លួនដែលកំពុងធ្វើពាណិជ្ជកម្មជាមួយប្រទេសអ៊ីរ៉ង់ ខណៈដែលប្រធានាធិបតីអាម៉េរិក លោក Donald Trump បានគំរាមដាក់ពន្ធ ២៥% ភាគរយទៅលើប្រទេសណាមួយដែលធ្វើអាជីវកម្មជាមួយអ៊ីរ៉ង់ នេះបើយោងតាមសេចក្ដីរាយការណ៍ពី CNA ។
អ្នកនាំពាក្យក្រសួងការបរទេសចិន លោកស្រី Mao Ning បានលើកឡើងនៅក្នុងសន្និសីទសារព័ត៌មានថា គ្មានអ្នកណាម្នាក់ដែលឈ្នះនៅក្នុងសង្គ្រាមពន្ធគយនោះទេ ហើយចិននឹងការពារយ៉ាងម៉ឺងម៉ាត់នូវសិទ្ធិ និងផលប្រយោជន៍ស្របច្បាប់របស់ខ្លួន។ ទន្ទឹមនឹងនេះ ពាក់ព័ន្ធនឹងភ្ញៀវទេសចរចិនដែលធ្វើដំណើរទៅកាន់ប្រទេសអ៊ីរ៉ង់ ត្រូវបានលោកស្រី Mao Ning បញ្ជាក់ថា ទីក្រុងប៉េកាំង កំពុងតាមដានយ៉ាងដិតដល់នៃការវិវត្តស្ថានភាពរបស់អ៊ីរ៉ង់ ហើយក៏បានត្រៀមចាត់វិធានការចាំបាច់ទាំងអស់ដើម្បីការពារសុវត្ថិភាពពលរដ្ឋចិន។ យ៉ាងណាមិញ នៅមិនទាន់មានរបាយការណ៍ណាមួយដែលបញ្ជាក់អំពីការស្លាប់របស់ពលរដ្ឋចិននៅអ៊ីរ៉ង់នោះទេ។
លោកស្រី Mao Ning បានបង្ហាញពីក្ដីសង្ឃឹមថា រដ្ឋាភិបាល និងពលរដ្ឋអ៊ីរ៉ង់ នឹងអាចយកឈ្នះលើភាពលំបាកនាពេលបច្ចុប្បន្ន ហើយអាចរក្សាបានស្ថិរភាពនយោបាយនៅក្នុងប្រទេស។ មិនត្រឹមតែប៉ុណ្ណោះ ចិនតែងតែប្រឆាំងការជ្រៀតជ្រែករបស់ប្រទេសដទៃក្នុងកិច្ចការផ្ទៃក្នុងប្រទេសណាមួយ ជាមួយនឹងការតស៊ូមតិថា អធិបតេយ្យភាព និងសន្តិសុខរបស់ប្រទេសទាំងអស់គួរតែត្រូវបានការពារយ៉ាងពេញលេញដោយច្បាប់អន្តរជាតិ និងប្រឆាំងទៅនឹងការគំរាមកំហែងគាបសង្កត់ដោយប្រើកម្លាំងនៅក្នុងទំនាក់ទំនងអន្តរជាតិ។ ចិនក៏បានអំពាវនាវឱ្យភាគីនានាធ្វើសកម្មភាពដែលមានផលវិជ្ជមានសម្រាប់សន្តិភាព និងស្ថិរភាពនៅមជ្ឈិមបូព៌ាផងដែរ។
ទន្ទឹមនឹងនេះ អង្គការសិទ្ធិមនុស្ស Iran Human Rights (IHR) ដែលមានមូលដ្ឋាននៅប្រទេសណ័រវេស បានព្រមានថា មនុស្សសរុបចំនួន ៦៤៨ នាក់ត្រូវបានសម្លាប់ក្នុងអំឡុងការធ្វើបាតុកម្ម រួមមាន អនីតិជន ៩ នាក់ និងអ្នករងរបួសជាង ៦ ០០០ នាក់។ មិនត្រឹមតែប៉ុណ្ណោះ ការបិទអ៊ីនធឺណេតនៅក្នុងប្រទេសអ៊ីរ៉ង់បានធ្វើមានផលលំបាកខ្លាំងក្នុងការប្រមូលរបាយការណ៍ ហើយសង្ស័យថាមានមនុស្សប្រហែល ១ ម៉ឺននាក់ត្រូវបានចាប់ខ្លួន។ កាលពីថ្ងៃចន្ទ សប្ដាហ៍នេះ ប្រធានាធិបតីសហរដ្ឋអាម៉េរិក Donald Trump បានគំរាមដាក់ពន្ធ ២៥% លើប្រទេសណាដែលធ្វើអាជីវកម្មជាមួយអ៊ីរ៉ង់ ជាមួយនឹងការគាំទ្រលើពលរដ្ឋអ៊ីរ៉ង់ឱ្យធ្វើបាតុកម្មប្រឆាំងនឹងមេដឹកនាំ Ayatollah Ali Khamenei ។ អាម៉េរិកបានត្រៀមចាត់វិធានការដោយយោធាប្រឆាំងនឹងអ៊ីរ៉ង់ ប្រសិនបើការសម្លាប់មនុស្សនៅតែបន្ត និងបរាជ័យផ្នែកចរចាការទូត ខណៈដែលកំពុងស្ថិតនៅក្រោមការដាក់ទណ្ឌកម្មដ៏ធ្ងន់របស់មហាអំណាចមួយនេះស្រាប់ទៅហើយ។
ដោយឡែក សម្រាប់ការធ្វើពាណិជ្ជកម្ម អ៊ីរ៉ង់ បាននាំចេញប្រេងរបស់ខ្លួនភាគច្រើនទៅកាន់ប្រទេសចិន តួកគី អ៊ីរ៉ាក់ អារ៉ាប់រួម និងឥណ្ឌា ហើយបណ្តាប្រទេសទាំងនេះអាចទទួលរងនូវការដំឡើងពន្ធ ២៥% ពីអាម៉េរិក។ យោងតាមក្រសួងការបរទេសចិន បានឲ្យដឹងថា ទំហំពាណិជ្ជកម្មរវាងចិន និងអ៊ីរ៉ង់ បានឈានដល់ ១៣,៤ ពាន់លានដុល្លារក្នុងឆ្នាំ២០២៤ ដែលការនាំចេញរបស់ចិនមានចំនួន ៨,៩ ពាន់លានដុល្លារ ហើយការនាំចូលពីអ៊ីរ៉ង់បានឈានដល់ ៤,៤ ពាន់លានដុល្លារ៕
Account
Security
Favourite Content