ភ្នំពេញ ៖ តំបន់​សេដ្ឋកិច្ច​ពិសេស​ បានដើរ​តួនាទី​យ៉ាង​សំខាន់​ក្នុងការទាក់ទាញការ​វិនិយោគ ដូច្នេះហើយទើប​​រាជរដ្ឋាភិបាល​បានសម្រេច​បង្កើត​ និងជំរុញឱ្យវិស័យឯកជនដែលជាអ្នកវិនិយោគបង្កើត​តំបន់សេដ្ឋកិច្ច​ពិសេស​បន្ថែមជា​បន្ត​បន្ទាប់ ។ ជាលទ្ធផល ក្នុងរយៈពេល​ជាង​៥ឆ្នាំកន្លងមកនេះ ពោលគឺចាប់តាំងពី​ឆ្នាំ២០២០ ដល់​ខែកក្កដា ឆ្នាំ២០២៥ គ្រាន់តែតំបន់​សេដ្ឋកិច្ច​ពិសេស​ដែល​វិនិយោគ​ដោយ​វិនិយោគិនចិន​ បានទាក់ទាញ​គម្រោង​វិនិយោគប្រមាណ៤០០​គម្រោងចូលមកបណ្ដាក់ទុននៅកម្ពុជា ។

យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា បច្ចុប្បន្ន​នេះ កម្ពុជាបានអនុម័ត​លើគម្រោងបង្កើតតំប​​ន់សេដ្ឋកិច្ច​ពិសេស​ចំនួន ៥៧ ​ហើយក្នុងនោះមាន ១១តំបន់​ គឺជាការ​វិនិយោគរបស់ចិន​ ហើយក្នុងចំណោម​តំបន់​សេដ្ឋកិច្ច​ទាំង ​១១តំបន់​ ដែលជា​ការ​វិនិយោគរបស់ចិន​ បានទាក់​ទាញ​គម្រោង​រហូតដល់​ជាង​៤០០គម្រោងរួចទៅហើយ ។

បើតាមក្រុមប្រឹក្សាអភិវឌ្ឍន៍កម្ពុជា​បានបញ្ជាក់ថា គិតចាប់ពីឆ្នាំ២០២០ ដល់ខែកក្កដា ឆ្នាំ២០២៥ មានគម្រោងវិនិយោ​គប្រមាណ ៤០០គម្រោង បានចូលមកបណ្ដាក់ទុនវិនិយោគរួចរាល់នៅក្នុងតំបន់សេដ្ឋកិច្ចទាំងនោះ ហើយជាមួយគ្នានេះ ចំពោះការវិនិយោគផ្ទាល់ពីបរទេស គិតត្រឹមរយៈពេល ៨ខែ នៃឆ្នាំ២០២៥នេះ មានគ​ម្រោងវិនិយោគចំនួន ៤៩១គម្រោង ដែលក្រុមប្រឹក្សាអភិវឌ្ឍន៍កម្ពុជាបានអនុម័តជូនវិនិយោគិនដើ​ម្បី​បណ្ដាក់ទុនវិនិយោគនៅកម្ពុជា ។

នៅក្នុងជំនួប​ជាមួយ​ឯកឧត្តម ​វ៉ាង​ យី​ សហប្រធាន​នៃគណៈកម្មាធិការ​សម្របសម្រួល​អន្តររដ្ឋាភិបាល​កម្ពុជា-ចិន កាលពីពេលថ្មីៗនេះ ឯកឧត្តម ​ស៊ុន ចាន់ថុល​ ឧបនាយករដ្ឋ​មន្ត្រី និងជាអនុប្រធានទី១​ក្រុមប្រឹក្សាអភិវឌ្ឍន៍កម្ពុជា ​បានពិភាក្សាលើប្រធានបទសំខាន់ៗក្នុងការជំរុញពង្រឹងកិច្ចសហប្រតិបត្តិការ និងការអនុវត្តគម្រោងផែនការនានាលើវិស័យហេដ្ឋារចនាសម្ព័ន្ធ វិនិយោគ ពាណិជ្ជកម្ម កសិកម្ម ឧស្សាហកម្ម សុខាភិបាល វប្បធម៍ និងបច្ចេកវិទ្យាជាដើម ដែលស្ថិតក្រោមក្របខណ្ឌនៃអនុស្សរណៈនៃការយោគយល់គ្នា និងកិច្ចព្រមព្រៀងពាណិជ្ជកម្មសេរីកម្ពុជា-ចិន គម្រោងគួរឱ្យកត់សម្គាល់ដែលបានលើកយកមកពិភាក្សាមានដូចជា គម្រោងព្រែកជីកហ្វូណនតេជោ គម្រោងកែលំអផ្លូវជាតិលេខ៣ តភ្ជាប់កំពត-វាលរេញ គម្រោងសាងសង់កំណាត់ផ្លូវជាតិលេខ៧ រមាត-ត្រពាំងគ្រៀល គម្រោងទំនើបកម្មប្រព័ន្ធចម្រោះទឹកកខ្វក់ខេត្តព្រះសីហនុ គម្រោងពង្រីកការនាំចេញពីកម្ពុជាទៅកាន់ប្រទេសចិនក្រោមកិច្ចព្រមព្រៀងពាណិជ្ជកម្មសេរី និងគម្រោងច្រករបៀងត្រី និងអង្ករ ជាដើម ។

ការអភិវឌ្ឍ​លើ​ហេដ្ឋារចនាសម្ព័ន្ធទាំងនេះ នឹងជួយ​សម្រួលដល់ការ​ដឹកជញ្ជូន ចូលទៅកាន់ទីតាំង​ផលិត​ និង​ដឹកជញ្ជូនទៅកាន់ទីផ្សារ​វិញ ទាំង​ក្នុងនិងក្រៅប្រទេស​ ជាពិសេស​ការ​សាងសង់​ហេដ្ឋារចនាសម្ព័ន្ធ តភ្ជាប់ទៅកាន់​តំបន់​សេដ្ឋកិច្ចពិសេស​ ។​

គួរ​បញ្ជាក់ថា ដើម្បីទាក់ទាញ​ដល់គម្រោងវិនិយោគ​ពីខាងក្រៅប្រទេស ជាពិសេស​សម្រួលដល់ការវិនិយោគរបស់វិនិយោគិន​តាមប្រទេស​នីមួយៗ រាជរដ្ឋាភិបាលកម្ពុជាបានជំរុញ​ឱ្យបង្កើត​តំបន់សេដ្ឋកិច្ច​ពិសេស​ដោយផ្ដោតលើ​ប្រទេស​មួយៗ ដូចជា ​តំបន់សេដ្ឋកិច្ចពិសេស​ចិន តំបន់សេដ្ឋកិច្ចពិសេសជប៉ុន ​និងតំបន់សេដ្ឋកិច្ចពិសេស​សម្រាប់ប្រទេស​ដែលមានការ​វិនិយោគ​ច្រើននៅកម្ពុជា​ ។ ជាលទ្ធផល​វិនិយោគិនបានដាក់ទុនវិនិយោគ​លើ​បង្កើត​តំបន់សេដ្ឋកិច្ចពិសេស​ច្រើនជាង​គេ ក្នុងនោះគ្រាន់តែតំបន់សេដ្ឋកិច្ចពិសេស​ក្រុងព្រះសីហនុមួយ ដែលជា​ការ​វិនិយោគរបស់ចិន បានទាក់ទាញ​ការ​វិនិយោគពីចិន​ផ្ទាល់​យ៉ាង​ច្រើន ហើយរដ្ឋាភិបាល​ចិន ក៏បាន​ប្ដេជ្ញា​ក្នុងការ​ជំរុញ​វិនិយោគិន​របស់ខ្លួនមក​បណ្ដាក់ទុនវិនិយោគនៅក្នុង​តំបន់​សេដ្ឋកិច្ចពិសេស​នេះ​បន្ថែម ហើយគ្រោងនឹង​បង្កើត​តំបន់​សេដ្ឋកិច្ចពិសេស​មួយទៀត​ផងដែរ ។

យោងតាម​របាយការណ៍របស់​ក្រុមប្រឹក្សាអភិវឌ្ឍន៍កម្ពុជា​​បានបង្ហាញ​ឱ្យថា ជារៀងរាល់ខែ ​ក្រុមប្រឹក្សាអភិវឌ្ឍន៍កម្ពុជា​ តែងអនុម័ត​គម្រោង​វិនិយោគ​ដែលមានលក្ខណៈសម្បត្តិគ្រប់គ្រាន់នៅក្នុង​តំបន់​សេដ្ឋកិច្ចពិសេស​ជា​បន្ត​បន្ទាប់​ ពីព្រោះ​ការ​វិនិយោគនៅក្នុង​តំបន់​សេដ្ឋកិច្ច​មានភាពងាយស្រួល មិនស្មុគ្រស្មាញ​ មានហេដ្ឋារចនាសម្ព័ន្ធគ្រប់គ្រាន់​រួចជា​ស្រេច​សម្រាប់​ផ្ដល់ជូន​វិនិយោគិន ។