សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជា កំពុងស្វែងរកឱកាសនាំចេញកសិផលបន្ថែមទៀតទៅកាន់ប្រទេសឥណ្ឌា ជាពិសេស លទ្ធភាពនាំចេញគ្រាប់ស្វាយចន្ទី អង្ករ និងគ្រឿងទេសមួយចំនួនទៀត រួមមានទាំងម្សៅរមៀត ទៅកាន់ទីផ្សារប្រទេសឥណ្ឌាបន្ថែមពីលើទីផ្សារចិនដែលមានស្រាប់។
ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ប្រទេសឥណ្ឌា ជាទីផ្សារដ៏ធំដែលមានសក្តានុពលខ្ពស់សម្រាប់ផលិតផល និងកសិផលរបស់កម្ពុជា ជាពិសេសសម្រាប់គ្រាប់ស្វាយចន្ទីតែម្ដង ខណៈដែលជាទូទៅភាគច្រើន ឥណ្ឌា តែងនាំចូលគ្រាប់ស្វាយចន្ទីពីបណ្តាប្រទេសនៅទ្វីបអាហ្វ្រិកក្នុងទំហំច្រើន។
ឯកឧត្តម ឃឹម ហ្វីណង់ បានបញ្ជាក់ថា៖
« ឱកាសធំជាងគេ ពាក់ព័ន្ធស្វាយចន្ទីនេះ គឺឥណ្ឌាជាអ្នកផលិតស្វាយចន្ទី (ផលិតផលសម្រេច) ធំជាងគេ ហើយឥណ្ឌាក៏ជាអ្នកនាំចូលស្វាយចន្ទីច្រើនផងដែរ។ ដូច្នេះយើងអាចមានលទ្ធភាពដោយសារយើងមានសមត្ថភាពផលិតគ្រាប់ស្វាយចន្ទីបានរហូតដល់ ១លានតោនក្នុង ១ឆ្នាំ ។ បើការងារនេះអាចធ្វើទៅបាន វានឹងផ្ដល់ប្រយោជន៍ដល់កសិករយើងបានច្រើន ដោយសារយើងមិនទាន់បានកែច្នៃ»។
លោក អួន ស៊ីឡុត ប្រធានសមាគមស្វាយចន្ទីកម្ពុជា (សសក) បានប្រាប់ AMS ថា សព្វថ្ងៃនេះ កម្ពុជាបាននាំចេញគ្រាប់ស្វាយចន្ទីប្រមាណជា ៩៥% ទៅប្រទេសវៀតណាម ហើយការពឹងផ្អែកលើទីផ្សារតែមួយ គឺជាហានិភ័យខ្ពស់ ដែលជាមូលហេតុធ្វើឱ្យរាជរដ្ឋាភិបាលផ្តួចផ្ដើមធ្វើពិពិធកម្មទីផ្សារ និងរកអ្នកវិនិយោគបន្ថែម ដើម្បីធ្វើឱ្យសម្បូរបែបទីផ្សារ ដែលមានស្តង់ដារល្អ ខណៈដែលការនាំចេញច្រើនលើសលប់ជាគ្រាប់ស្វាយចន្ទីមិនទាន់កែច្នៃ។
លោក អួន ស៊ីឡុត បានមានប្រសាសន៍បញញជាក់ថា៖
«យើងមានគោលបំណង កាត់បន្ថយការពឹងផ្អែកលើទីផ្សារតែមួយ ខណៈពេលការកែច្នៃក្នុងស្រុកកំពុងអភិវឌ្ឍ ការពង្រីកទៅកាន់ទីផ្សារថ្មីៗនឹងជួយរក្សាតម្លៃឱ្យមានស្ថិរភាពសម្រាប់កសិករ និងធានបាននូវកំណើនប្រកបដោយចីរភាព។ សម្រាប់ទីផ្សារឥណ្ឌា ចូលចិត្តនាំចូលគ្រាប់ឆៅជាងគ្រាប់កែច្នៃ ដោយសារវត្ថុធាតុដើមកែច្នៃ គាត់យកពីប្រទេសអាហ្វ្រិកខាងលិច និងប្រទេសផ្សេងៗទៀត ហើយ ៨០% កែច្នៃសម្រាប់ប្រើប្រាស់ក្នុងស្រុក និងនាំចេញតែ២០% ទេ។ ឥណ្ឌាចូលចិត្តនាំគ្រាប់ឆៅចូល ព្រោះផលិតផលកែច្នៃ មានពន្ធនាំចូលខ្ពស់ថ្លៃប្រមាណ ៤៥% រីឯការនាំគ្រាប់ឆៅចូល មិនមានពន្ធគយនោះទេ ដែលខុសពីប្រទេសប្រទេសវៀតណាមនាំចេញ ៨០% ដោយទិញពីអាហ្វ្រិក ពីកម្ពុជា ហើយកែច្នៃសម្រាប់ការនាំចេញ ប្រមាណ ៨០% ហើយប្រើក្នុងស្រុកតែ២០% ប៉ុណ្ណោះ»។
ប្រធានសមាគមស្វាយចន្ទីកម្ពុជារូបនេះបានគូសបញ្ជាក់ថា នេះគឺជាគោលនយោបាយដ៏ល្អរបស់រាជរដ្ឋាភិបាល និងក្រសួងពាក់ព័ន្ធ ដែលបានខិតខំថ្វើពិពិធកម្មទីផ្សារលើផលិតផលគ្រាប់ស្វាយចន្ទីនេះ។
យោងតាម សមាគមស្វាយចន្ទីកម្ពុជា បានឱ្យដឹងថា បច្ចុប្បន្ន តម្លៃគ្រាប់ស្វាយចន្ទីឆៅស្ថិតនៅចន្លោះ ៧២០០ ទៅ ៨០០០រៀល (គ្រាប់ស្ងួត) បើគ្រាប់សើមវិញមានតម្លៃ ៥០០០រៀលក្នុង១គីឡូក្រាម ។ ប៉ុន្តែ ចាប់ពីខែឧសភារហូតមក ភាគច្រើនកសិករមិនលក់គ្រាប់សើមទៀតទេ ។ ដូច្នេះ ក្នុងរយៈពេល ៨ខែ ឆ្នាំ២០២៥ សមាគម បានរកឃើញថា មានការកើនទិន្នផលប្រមាណជាង២០% ដោយកម្ពុជាបាននាំចេញគ្រាប់ស្វាយចន្ទីឆៅប្រមាណ ៩៤១ ០០០តោន ដែលបង្កើនប្រាក់ចំណូលបាន ១,៤ពាន់លានដុល្លារចាក់ចូលក្នុងចរន្តសេដ្ឋកិច្ច៕
Account
Security
Favourite Content