បរទេស៖ យោងតាមប្រភពពី CNN រាបានយការណ៍ថា តម្លៃមាសបានឡើងថ្លៃដល់កម្រិតខ្ពស់ ២ ៦៨៧ ដុល្លារក្នុងមួយអោន បន្ទាប់ពីធនាគារកណ្តាលអាមេរិកបានកាត់បន្ថយអត្រាការប្រាក់ជាលើកដំបូងក្នុងរយៈពេល ៤ ឆ្នាំចុងក្រោយនេះ។

ជាទូទៅ មាសត្រូវបានពិភពលោកមើល​ឃើញថាជា​ទ្រព្យសម្បត្តិមានតម្លៃ និងសុវត្ថិភាពបំផុត មិនថាក្នុងអំឡុងពេលមានសេដ្ឋកិច្ចធ្លាក់ចុះ ឬ កើនឡើងនោះទេ។ តម្លៃមាសបាន​​ឡើងថ្លៃ​ប្រហែល ៣០ ភាគរយនៅ​ឆ្នាំ​នេះ។ មិនត្រឹមតែប៉ុណ្ណោះ តម្លៃមាសត្រូវបានជំរុញដោយការកើនឡើងនៃតម្រូវការពីធនាគារកណ្តាលប្រទេសមួយចំនួនរួមមានដូចជា ចិន តួកគី និងឥណ្ឌា ដែលត្រូវការមាសបន្ថែមក្នុងទុនបម្រុងរបស់ពួកគេ ដើម្បីធ្វើពិពិធកម្មជៀសឆ្ងាយពីប្រាក់ដុល្លារអាម៉េរិក។

យ៉ាងណាមិញ អ្នកវិនិយោគយល់ឃើញថា ការឡើងថ្លៃតម្លៃមាសត្រូវបានជំរុញដោយសារភាពមិនប្រាកដប្រជានៃសេដ្ឋកិច្ចអាម៉េរិក បើទោះបីជាទីផ្សារភាគហ៊ុនមានការកើនឡើងក៏ដោយ។ ជាទូទៅ តម្លៃ មាស និងទីផ្សារភាគហ៊ុនមានភាពបញ្ច្រាសគ្នា មានន័យថា នៅពេលដែលតម្លៃមាសឡើងថ្លៃ ទីផ្សារភាគហ៊ុននឹងធ្លាក់ចុះ។ លើសពីនេះ ពាណិជ្ជករមានទំនោរទៅរកមាសក្នុងអំឡុងពេលនៃភាពមិនច្បាស់លាស់ ដោយសារតម្លៃរបស់វាមានស្ថិរភាពជាងទ្រព្យសកម្មផ្សេងទៀត ដូចជា ភាគហ៊ុន មូលបត្របំណុល និងរូបិយប័ណ្ណ ប្រសិនបើសេដ្ឋកិច្ចប្រឈមនឹងការធ្លាក់ចុះ។

លោក Jerome Powell ប្រធានធនាគារកណ្តាលអាម៉េរិកបាននិយាយថា ការកាត់បន្ថយអត្រាការប្រាក់មានគោលបំណងទប់ស្កាត់ការធ្លាក់ចុះទីផ្សារការងារបន្ថែមទៀត។ សេដ្ឋវិទូមួយចំនួនបានលើកឡើងថា ទោះបីជាមានការកាត់បន្ថយអត្រាការប្រាក់ក៏ដោយ ប៉ុន្តែសេដ្ឋកិច្ចហាក់មិនទាន់មានភាពច្បាស់លាស់នៅឡើយ ដោយចង្អុលបង្ហាញថាអត្រាអ្នកអត់ការងារធ្វើមិនងាយនឹងថយចុះនោះទេ។ អត្រាគ្មានការងារធ្វើមាន ៤,២ ភាគរយក្នុងខែសីហា ដែលកើនឡើងពី ៣,៨ ភាគរយធៀបនឹងរយៈពេលដូចគ្នាកាលពីឆ្នាំមុន។ ទន្ទឹមនឹងនេះ ទិន្នន័យនៃទំនុកចិត្តអ្នកប្រើប្រាស់ថ្មីៗបង្ហាញថា ប្រជាជនអាមេរិកកំពុងមានអារម្មណ៍អវិជ្ជមានចំពោះសេដ្ឋកិច្ចអាមេរិក និងអនាគតនៃទីផ្សារការងារ។ សន្ទស្សន៍ទំនុកចិត្តប្រចាំខែបានធ្លាក់ចុះដល់ ៩៨,៧ ពិន្ទុក្នុងខែកញ្ញា ដែលធ្លាក់ចុះពី ១០៥,៦ ពិន្ទុកាលពីខែសីហា។ គេមើលឃើញថា ភាព​មិន​ប្រាកដ​ប្រជា​នោះ​អាច​ជា​ប្រយោជន៍​សម្រាប់​មាស ដែលជំរុញតម្លៃវាឡើងថ្លៃ។

អ្នកស្រាវជ្រាវមកពី JPMorgan Chase បានព្យាករណ៍ថា តម្លៃមាសអាចនឹងឡើងថ្លៃដល់ ២ ៨៥០ ដុល្លារក្នុងមួយអោននៅឆ្នាំ២០២៥ ប្រសិនបើធនាគារកណ្តាលអាម៉េរិក (Fed) ទម្លាក់អត្រាការប្រាក់ថែមទៀត។ មិនត្រឹមតែប៉ុណ្ណោះ វិធានការថ្មីៗពីប្រទេសចិនដើម្បីធ្វើឱ្យសេដ្ឋកិច្ចរបស់ខ្លួនងើបឡើងវិញក៏មានឥទ្ធិពលលើតម្លៃមាសផងដែរ។ ជាក់ស្ដែង កាលពីថ្ងៃអង្គារ៍កន្លងទៅនេះ ធនាគារកណ្តាលចិន P(BOC) បានអនុម័តនូវវិធានការចំនួន២ ដើម្បីកាត់បន្ថយការចំណាយរបស់ពលរដ្ឋលើការខ្ចីប្រាក់។ ការផ្លាស់ប្តូរនេះកើតឡើងបន្ទាប់ពីទិន្នន័យបង្ហាញថា សេដ្ឋកិច្ចចិនមិនបានសម្រេចគោលដៅកំណើន ៥ ភាគរយរបស់ខ្លួនសម្រាប់ឆ្នាំនេះទេ៕