សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ បន្ទាប់ពីគម្រោងព្រែកជីកហ្វូណនតេជោ បានបើកការដ្ឋានសាងសង់ជាផ្លូវការកាលពីថ្ងៃទី៥ សីហា ២០២៤ ឃើញថាវិនិយោគិនបរទេសនិងក្នុងស្រុកជាច្រើនចាប់ផ្ដើមសម្លឹងឱកាសវិនិយោគនៅក្នុងខេត្តតំបន់សមុទ្រចំនួនពីរ ជាពិសេសខេត្តកែប ។
បើតាមភ្នាក់ងារអចលនទ្រប្យមួយរូបប្រចាំខេត្តកំពត និងកែប បានប្រាប់ASM ឱ្យដឹងថា ក្រោយរដ្ឋាភិបាលបានបើកការដ្ឋានសាងសង់ព្រែកជីកហ្វូណនតេជោមក ឃើញមានវត្តមានវិនិយោគិនជនបរទេស និងក្នុងស្រុកជាច្រើនចាប់អារម្មណ៍ក្នុងការបណ្ដាក់ទុនវិនិយោគនៅក្នុងខេត្តកែប និងខេត្តកំពត ជាពិសេសទៅលើសេវាកម្មទេសចរណ៍ដូចជាផ្ទះសំណាក់ សណ្ឋាគារ ភោជនីយដ្ឋាន ជាដើម ។
បើតាមភ្នាក់ងារអចលនទ្រព្យរូបនេះ បានឱ្យដឹងថា ក្រោយពេលរដ្ឋាភិបាលកម្ពុជាបានប្រកាសបើកការដ្ឋានសាងសង់ព្រែកជីកហ្វូណនតេជោបានប៉ុន្មានសប្ដាហ៍ ក៏មានអ្នកវិនិយោគបរទេសមួយក្រុមស្វែងរកការវិនិយោគលើអគារកំពុងដំណើរការនៅក្នុងខេត្តកែប និងវិនិយោគលើសណ្ឋាគារ ឬបដិសណ្ឋារកិច្ចនៅក្នុងខេត្តមួយនេះ ស្របនឹងរដ្ឋាភិបាលក៏ទើបចេញសេចក្ដីជូនដំណឹងស្ដីពីការបន្តការអភិវឌ្ឍឆ្នេរខ្សាច់កម្សាន្តកម្រិតខ្ពស់នៅក្នុងខេត្តកែប ។ ការអភិវឌ្ឍឆ្នេរកម្សាន្តនេះដែរ នឹងទាក់ទាញការវិនិយោគបន្ថែមពីក្នុងក្រៅប្រទេស និងក្នុងប្រទេសចូលមកបណ្ដាក់ទុនវិនិយោគ នៅក្នុងខេត្តកែបនិងកំពតបន្ថែមទៀត ។
លោកជិន ណារិន នាយកប្រតិបត្តិក្រុមហ៊ុនសាន់សាញរៀលអ៊ីស្ទេត បានលើកឡើងថា ដោយសារតែខេត្តកែបនិងកំពតជាខេត្តដែលបំពេញបន្ថែមឱ្យគ្នា ដូច្នេះនៅពេលខេត្តណាមួយមានការអភិវឌ្ឍវានឹងធ្វើឱ្យទេសចរនិងវិនិយោគិនអាចស្វែងរកតំបន់ដែលនៅជាប់គ្នានោះ ជាក់ស្ដែងនៅពេលរដ្ឋាភិបាលអភិវឌ្ឍព្រែកជីកហ្វូណនតេជោ ពីទន្លេបាសាក់មកកាន់ខេត្តកែប និងគម្រោងអភិវឌ្ឍន៍ឆ្នេរកម្សាន្តកម្រិតខ្ពស់នៅក្នុងខេត្តកែប វាក៏នឹងធ្វើឱ្យខេត្តកំពតមានសក្ដានុពលក្នុងការទាក់ទាញការវិនិយោគមួយកម្រិតទៀតផងដែរ។
លោកបន្តថា នៅក្នុងស្ថានភាពនៃសេដ្ឋកិច្ចមិនទាន់ប្រសើរដូចនៅមុនវិបត្តិកូវីដ១៩ ការវិនិយោគ មិនថាតែនៅកែប នៅកំពត ឬនៅតំបន់ណាផ្សេងទៀតនោះទេ គឺនៅតែមិនទាន់មានភាពល្អប្រសើរដូចគ្នា ប៉ុន្តែស្របនឹងវឌ្ឍនភាពនៃហេដ្ឋារចនាសម្ព័ន្ធដែលរដ្ឋាភិបាលកម្ពុជាបាននិងកំពុងអភិវឌ្ឍន៍តាំងពីដើម រហូតមកដល់ពេលនេះ លោកជឿថានៅពេលអនាគត ខេត្តកែប និងកំពតកាន់តែមានសក្ដានុពលទាក់ទាញការវិនិយោគ និងមានវិនិយោគិនក្នុងនិងក្រៅប្រទេសជាច្រើនចូលមកបណ្ដាក់ទុនវិនិយោគក្នុងតំបន់ឆ្នេរមួយនេះ ។
លោកលឹម រដ្ឋា ភ្នាក់ងារអចលនទ្រព្យប្រចាំខេត្តកែប ក៏បានឱ្យដឹងថា តាំងពីការប្រកាសសាងសង់ព្រែកជីកមកម្ល៉េះ មានអ្នកស្វែងរកទិញដីទាំងខ្នាតតូចៗនិងធំ ជាច្រើន ប៉ុន្តែអ្នកទិញចង់បានតម្លៃទាប ក្នុងពេលស្ថានភាពមិនទាន់ប្រសើរ ហើយអ្នកលក់ចង់លក់ក្នុងតម្លៃខ្ពស់ ដោយគិតថាសក្ដានុពលតំបន់នេះកាន់តែល្អប្រសើរ ដូច្នេះការទិញលក់មិនសូវមានច្រើនទេ តែសម្រាប់អចលនទ្រព្យណាដែលមានតម្លៃទាបជាងទីផ្សារឃើញថាមានការទិញលក់ច្រើនដដែល ៕
Account
Security
Favourite Content