ភ្នំពេញ ៖ ត្រឹមរយៈពេលមួយខែដើមឆ្នាំ២០២៥កន្លងទៅនេះ (ខែមករា ) អត្រាអតិផរណានៅលើទីផ្សារកម្ពុជា បានកើនឡើងប្រមាណ ៦% ជាតួលេខដែលមានការកើនឡើងខ្ពស់បើធៀបនឹងរយៈពេលមួយខែដូចគ្នាកាលពីខែមករា ឆ្នាំ២០២៤។

លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជាបានឱ្យដឹងតាមរយៈបណ្តាញទំនាក់ទំនងហ្វេសប៊ុកផ្ទាល់ខ្លួនថា តួលេខឡើងខ្ពស់នៃអតិផរណាក្នុងខែមករាឆ្នាំ២០២៥​​​នេះ បណ្តាលមកពីសន្ទស្សន៍ថ្លៃទំនិញមានកម្រិតអវិជ្ជ​មាន -០,៥% កាលពីខែមករា ឆ្នាំ២០២៤ ដែលជាមូលដ្ឋាននៃការគណនាទាប។

លោកជំទាវបណ្ឌិតបានបញ្ជាក់ថា ៖

«អតិផរណាឡើងខ្ពស់ខាងលើ ភាគច្រើនបណ្តាលមកពីការឡើងថ្លៃនៃម្ហូបអាហារកាលពីចុងខែមករា ឆ្នាំ២០២៥ ស្របពេលពលរដ្ឋមួយចំនួនរៀបចំសែនប្រេនក្នុងប្រពៃណីចូលឆ្នាំចិន និងវៀតណាម ចំពេលដែលកម្ពុជាមានកំណើនភ្ញៀវទេសចរជាតិ និងអន្តរជាតិ ដែលជាកត្តាធ្វើឱ្យថ្លៃម្ហូបអាហារមួយចំនួនឡើងថ្លៃផងដែរ»។

ជាការកត់សម្គាល់ សន្ទស្សន៍នៃបន្លែកើន ១៥,៦% ផ្លែឈើកើន ១១,៩% ថ្លៃត្រីរ៉ស់ធម្មជាតិកើន ៦,៧% និងថ្លៃសាច់ជ្រូកកើន ៤,៩% និយាយជារួមសន្ទស្សន៍ថ្លៃម្ហូបអាហារទូទៅកើនឡើង​ប្រមាណជា ៧,៨%។ បើការគណនាអតិផរណា ដកចេញនូវថ្លៃម្ហូបអាហារ និងភេស្ជជៈមិនស្រវឹងចេញ នោះអតិផរណានៅខែមករាឆ្នាំ២០២៥នេះ នៅសល់ត្រឹមតែ ៣,៧%ប៉ុណ្ណោះ។

លោកជំទាវបណ្ឌិតបានពន្យល់ថា ៖

«ពាក្យថាសន្ទស្សន៍ គឺជាការច្របាច់ថ្លៃទំនិញមួយចំនួនរួមបញ្ចូលគ្នាដោយឱ្យទម្ងន់ទៅលើថ្លៃទំនិញមួយណា ដែលមានសារៈសំខាន់សម្រាប់ជីវភាពរស់នៅប្រចាំថ្ងៃច្រើនជាងមុខទំនិញដទៃ។ ដូច្នេះមិនអាចនិយាយថា ការឡើងថ្លៃ ៦% ចំពោះគ្រប់ទំនិញនោះទេ»។

លោកជំទាវបណ្ឌិត ជា សិរី ក៏បានបញ្ជាក់ដែរថា ៖ ការគណនាអត្រាអតិផរណា គឺត្រូវប្រើប្រាស់វិធីសាស្ត្រដែលមានលក្ខណៈស្តង់ដារ ទទួលស្គាល់ជាអន្តរជាតិ។ ការប្រមូលថ្លៃទំនិញ ត្រូវបានរៀបចំឡើងដោយវិទ្យាស្ថានជាតិស្ថិតិជាប្រចាំលើមុខទំនិញជាក់លាក់ចំនួន២៥៩ មុខនៅលើទីផ្សរ រាប់ចាប់តាំងពីទីតាំងលក់មួយចំនួនជាក់លាក់ ដែលគេហៅថា កន្ត្រកទំនិញ។ ក្រោយពីទទួលបានសន្ទស្សន៍ថ្លៃទំនិញ ធនាគារជាតិនៃកម្ពុជា ធ្វើការគណនាអត្រាអតិផរណាប្រចាំខែ និងប្រចាំឆ្នាំ។ ក្នុងចំណោមមុខទំនិញទាំងអស់នោះ មានមុខទំនិញខ្លះដែលសំខាន់សម្រាប់ជីវភាពរស់នៅរបស់ប្រជាជន ហើយត្រូវបានឱ្យទម្ងន់ច្រើនជាងមុខទំនិញមួយចំនួនទៀត។ ជាឧទាហណ៍ទម្ងន់នៃថ្លៃម្ហូបអាហារមានសមាមាត្រ ៤៤,៨% នៃកន្ត្រកមុខទំនិញ សម្រាប់ការគណនារកសន្ទស្សន៍ថ្លៃទំនិញ។

គួរបញ្ជាក់ថា អាត្រាអតិផរណា គឺជាសូចនាករមួយដែលអ្នករៀបចំគោលនយោបាយអាចយល់អំពីស្ថានភាពថ្លៃទំនិញ និងរៀបចំគោលនយោបាយសមស្រប ដើម្បីរក្សាអំណាចទិញ​ទំនិញរបស់ប្រជាជន។ ការរក្សាស្ថិរភាពថ្លៃទំនិញ គឺជាមុខងារភារកិច្ចចម្បងមួយរបស់ធនាគារជាតិនៃកម្ពុជា តាមរយៈការប្រើឧបករណ៍គោលនយោបាយរូបិយវត្ថុ ប៉ុន្តែរាជរដ្ឋាភិបាល ក៏មានភារកិច្ចសំខាន់ផងដែរតាមរយៈការប្រើឧបករណ៍គោលនយោបាយសារពើពន្ធ និងជំរុញផលិតភាពសម្រាប់ប្រើប្រាស់ក្នុងស្រុក៕ វិន ឈុនហ៊ាត