ភ្នំពេញ៖ ក្នុងអំឡុងពេលពិព័រណ៍ផលិតផលខ្មែរក្រោមប្រធានបទ «ខ្មែរធ្វើបាន៖ ចូលរួម ជំរុញ គាំទ្រ ផលិតផលក្នុងស្រុក» ចាប់ពីថ្ងៃទី២៦ ដល់ទី២៨ ខែកញ្ញា ឆ្នាំ២០២៥ នៅមជ្ឈមណ្ឌលមហាសន្និបាត និងពិព៍រណ៍កោះពេជ្រ រាជធានីភ្នំពេញ មានកិច្ចពិភាក្សាជាច្រើនក្រោមប្រធានបទផ្សេងៗគ្នា ដែលក្នុងនោះមានកិច្ចពិភាក្សាមួយបានលើកឡើងក្រោមប្រធានបទ «កម្ពុជា ក្រោមក្រសែភ្នែកពិភពលោក (Cambodia Through the Eyes of the World)»។

កិច្ចពិភាក្សានេះ មានការចូលរួមពីសំណាក់វាគ្មិនសំខាន់ចំនួន៤រូប រួមមាន លោក អាណូ ដាក ប្រធាន និងស្ថាបនិកក្រុមហ៊ុន Thalias Goroup , លោក ជេសស៊ី ម៉ាក់ខល ជាវិនិយោគិន, លោក គ្រសីស ឌីណា អ្នកបង្កើតវេទិកា និង លោក អួង ពីងអាន ជាសហគ្រិន។

ឆ្លើយតបនឹងសំណួរដែលចោទសួរថា តើ​អ្វី​ដែល​ធ្វើ​ឲ្យ​ប្រទេស​កម្ពុជា​ក្លាយ​ជា​ប្រទេស​មាន​ឱកាស ?

លោក អាណូ ដាក ដែលជាប្រធាន និងស្ថាបនិកក្រុមហ៊ុន​​ Thalias Goroup  និងជាអតីតប្រធានសភាពាណិជ្ជកម្មអឺរ៉ុបនៅកម្ពុជា បានលើកឡើងថា៖ កម្ពុជា មានឱកាសចំនួន៣ គឺទី១-មនុស្ស (People) ទី២ -ហេដ្ឋារចនាសម្ព័ន្ធ​(Infrastructure) និងទី៣- ភាពធន់ (Resilience)។

លោកបានមានប្រសាសន៍ថា៖

«ទាក់ទងនឹងមនុស្ស, អាយុជាមធ្យមរបស់កម្ពុជាគឺ ២៦ឆ្នាំ (ថៃអាយុ ៤០ឆ្នាំ, វៀតណាម ៣៣ឆ្នាំ) ខណៈដែលជា​រៀង​រាល់​ឆ្នាំ យុវជន​កម្ពុជាប្រមាណ ៣០០ ០០០ នាក់​បានចូល​បម្រើ​ការងារ។ នេះមិនមែនជាបន្ទុកទេ តែគឺជាភាគលាភប្រជាសាស្ត្ររបស់កម្ពុជា ។ ដោយឡែក ទាក់ទងនឹងហេដ្ឋារចនាសម្ព័ន្ធវិញ ពីមុនការទូទាត់ពន្ធគយអាចចំណាយពេល ២សប្តាហ៍ ប៉ុន្តែឥឡូវនេះ ចំណាយពេលត្រឹមតែ ៣ថ្ងៃប៉ុណ្ណោះ ហើយបច្ចុប្បន្ន មានផ្លូវល្បឿនលឿន តភ្ជាប់ពីភ្នំពេញ ទៅខេត្តព្រះសីហនុ ហើយអាកាសយានដ្ឋានថ្មីរបស់យើងបង្ហាញពីភាពជឿជាក់ទុកចិត្តក្នុងកម្រិតលំដាប់ពិភពលោក»។

ត្រង់ចំណុចទី៣ ពាក់ព័ន្ធនឹងភាពធន់ ត្រូវបានអ្នកជំនាញសេដ្ឋកិច្ចសកលរូបនេះបញ្ជាក់ថា៖

«កាល​ពី​ខែ​កក្កដា ការ​ប៉ះ​ទង្គិច​តាម​ព្រំដែន​រវាងកម្ពុជា ជាមួយ​ប្រទេស​ថៃ បាន​ធ្វើ​ឲ្យ​យើង​ខាត​បង់​ប្រាក់​ប្រមាណ ២៧​លាន​ដុល្លារ​ក្នុង​មួយ​ថ្ងៃ និងប្រមាណ ៨២៣​លាន​ដុល្លារ​ក្នុង​មួយ​ខែ។ កម្ពុជា​មិន​ភ័យ​ស្លន់ស្លោ​ទេ។ យើង​បាន​ជំរុញ និងកំណត់​ទិសដៅ​ភស្ដុភារ រក្សា​លំហូរ​ពាណិជ្ជកម្ម ការ​សម្រប​ខ្លួន​ដោយ​ស្ងប់ស្ងាត់ ប៉ុន្តែ​មាន​ប្រសិទ្ធភាព»។

ក្នុងពេលជាមួយគ្នានេះដែរ លោក អាណូ ដាក បានបន្តឱ្យដឹងថា សេដ្ឋកិច្ចកម្ពុជាកំពុងធ្វើពិពិធកម្ម រួមមាន ៖

– កសិ-កែច្នៃ៖ ម្រេចកំពត និង ស្ករត្នោត តម្លៃកើន ៥ ដងនៃតម្លៃពិភពលោក បន្ទាប់មកគឺគ្រាប់ស្វាយចន្ទី និងស្រូវ ។

– វិស័យទេសចរណ៍៖ នៅឆ្នាំ២០២៤ កម្ពុជាទទួលទេសចរចំនួន ៦.៧លាននាក់ កើនលើសសម័យមុនកូវីដ​១៩ បើទោះបីជាការលក់សំបុត្រចូលរមណីយដ្ឋានអង្គរទទួលបានតែ ៦៨% ក្រោមឆ្នាំ ២០១៩។ ជនជាតិចិនស្វែងរកការទិញទំនិញ ជនជាតិកូរ៉េស្វែងរកទំនុកចិត្ត ខណៈអឺរ៉ុបស្វែងរកបេតិកភណ្ឌ។

– ផលិតកម្ម៖ ផលិតផលមិនមែនកាត់ដេរ បច្ចុប្បន្ន មាន ៣៥% នៃការនាំចេញ។

– សេដ្ឋកិច្ចឌីជីថល៖ ៩៥% នៃអាយុក្រោម ៣០ឆ្នាំ រកស៊ីតាមអនឡាញ។ ប្រតិបត្តិការបាគងប្រចាំខែ ៣០លានប្រតិបត្តិការ ខណៈអាជីវករ ៥០ម៉ឺននាក់ប្រើ KHQR ។

– ការចាប់ផ្តើមអាជីវកម្មថ្មី៖ ស្ថាបនិកកម្ពុជា បានរកចំណូលបាន ៤៥លានដុល្លារនៅក្នុងឆ្នាំ

លោក អាណូ ដាក បានយល់ឃើញថា យុវជនកម្ពុជាមិនរង់ចាំអនាគតទេ ប៉ុន្តែពួកគេកំពុងកសាងអនាគតតាំងពីពេលឥឡូវនេះ៕