សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ សេវាដឹកជញ្ជូនអ្នកដំណើរសាធារណៈដោយរថយន្តក្រុងឥតគិតថ្លៃត្រូវបានសាកល្បងអនុវត្តជាលើកដំបូងនៅក្នុងខេត្តសៀមរាប ដោយផ្តើមចេញពីក្រុងសៀមរាបទៅកាន់ក្រុងរុនតាឯកតេជោសែន និងពីក្រុងរុនតាឯកតោជោសែនមកកាន់ក្រុងសៀមរាបវិញ ដែលការដាក់ឱ្យអនុវត្តនេះគឺដើម្បីជួយសម្រួលដល់ការធ្វើចរាចរណ៍ កាត់បន្ថយគ្រោះថ្នាក់ចរាចរណ៍នៅតាមដងផ្លូវ ជាពិសេសកាត់បន្ថយចំណាយរបស់ប្រជាពលរដ្ឋដែលបានស្ម័គ្រចិត្តរុះរើលំនៅឋានតំបន់រមណីយដ្ឋានអង្គរ ហើយទៅតាំងលំនៅថ្មីក្នុងក្រុងរុនតាឯកតេជោសែន ដែលស្ថិតក្នុងឃុំរុនតាឯក ស្រុកបន្ទាយស្រី ខេត្តសៀមរាប។
លោក អ៊ឹង សុភ័ណ នាយករងរដ្ឋបាលខេត្តសៀមរាប បានថ្លែងប្រាប់បណ្តាអ្នកសារព័ត៌មាននៅទី១៥ ខែកុម្ភៈ ឆ្នាំ២០២៤ ថា ផ្អែកតាមការសម្រេចរបស់រាជរដ្ឋាភិបាល រដ្ឋបាលខេត្តសៀមរាប នៅថ្ងៃទី១៥ ខែកុម្ភៈនេះ បានដាក់ឱ្យដំណើរការអនុវត្តសាកល្បងរថយន្តក្រុងដឹកជញ្ជូនសាធារណៈ ពីក្រុងរុនតាឯកតេជោសែន មកក្រុងសៀមរាប និងពីក្រុងសៀមរាប ទៅក្រុងរុនតាឯកតេជោសែន ខេត្តសៀមរាប ដោយឥតគិតថ្លៃ ដើម្បីជួយសម្រួលដល់ការធ្វើដំណើរ និងកាត់បន្ថយការចំណាយរបស់បងប្អូនប្រជាពលរដ្ឋដែលបានស្ម័គ្រចិត្តចាកចេញពីតំបន់រមណីយដ្ឋានអង្គរ ទៅរស់នៅតំបន់អភិវឌ្ឍន៍រុនតាឯក ដែលមកបំពេញការងារ និងប្រកបរបរចិញ្ចឹមជីវិតប្រចាំថ្ងៃនៅក្នុងក្រុងសៀមរាប ។
លោក អ៊ឹង សុភ័ណ បានបញ្ជាក់ថា ៖« សម្រាប់ថ្ងៃដំបូងនៃការសាកល្បងនេះ យើងឃើញមានប្រជាពលរដ្ឋបានចាប់ផ្តើមប្រើប្រាស់សេវារថយន្តក្រុងនេះ អ្នកខ្លះក៏បានមកសួរនាំព័ត៌មានខ្លះៗអំពីសេវារថយន្តក្រុងដឹកជញ្ជូនសាធារណៈនេះ។ សម្រាប់ម៉ោងចេញដំណើរ គឺមានការកំណត់យ៉ាងទៀតទាត់ ហើយតារាងម៉ោងចេញដំណើរ គឺមានបិតនៅតាមចំណត ពោលគឺចេញដំណើរពីក្រុងរុនតាឯកនៅម៉ោង៥ និង៣០នាទីព្រឹក ហើយចេញពីក្រុងសៀមរាបនៅម៉ោង៦ព្រឹក» ។
លោក អ៊ឹង សុភ័ណ បានឱ្យដឹងទៀតថា ក្នុងការដាក់ឱ្យដំណើរការសាកល្បងនេះមានរថយន្ត១៥គ្រឿង ដោយក្នុងនោះមានរថយន្ត១០គ្រឿងធ្វើដំណើរជាប្រចាំ និង៥គ្រឿងទៀតត្រៀមចាំក្នុងករណីមានប្រជាពលរដ្ឋធ្វើដំណើរច្រើន ។ ទីចំណតរថយន្តសរុបចំនួន ១៣កន្លែង ដូចជា ទី១- នៅផ្សារតំបន់អភិវឌ្ឍន៍រុនតាឯក ។ ទី២- ផ្លូវបំបែកចូលតំបន់អភិវឌ្ឍន៍រុនតាឯក ។ទី៣- ផ្លូវបំបែកផ្លូវលេខ៦៧ ។ ទី៤- សាលាឃុំរុនតាឯក ។ ទី៥- មុខប្រាសាទបន្ទាយសំរ៉ែ ។ ទី៦- ផ្លូវបំបែកឃុំព្រះដាក់ ។ ទី៧- ស្រះស្រង់ ។ ទី៨-ផ្លូវបំបែកត្រួតពិនិត្យសំបុត្រអង្គរ និងផ្លូវ៦០ម៉ែត្រ ។ ទី៩- ផ្លូវ៦០ម៉ែត្រទំបន់អញ្ចាញ ។ ទី១០- មុខសាលាខេត្តសៀមរាប ។ ទី១១- ផ្លូវជាតិលេខ៦មុខផ្សារលើ ។ ទី១២-ផ្លូវជាតិលេខ៦មុខផ្សារសាមគ្គី ។ ទី១៣- នៅសួនច្បារហាត់ប្រាណមាត់ស្ទឹងសៀមរាប។
សម្រាប់ទីតាំងចំណតស្ថិតនៅសួនច្បារព្រះរាជដំណាក់ មាត់ស្ទឹងក្រុងសៀមរាប។ ពេលវេលា រូមមានម៉ោង៦ព្រឹក ម៉ោង៦និង៣០នាទី នៅម៉ោង៧ព្រឹក ម៉ោង៨ព្រឹក ម៉ោង១០ព្រឹក ម៉ៅង១២ថ្ងៃត្រង់ ម៉ោង៤រសៀល ម៉ោង៥ និងម៉ោង៦ល្ងាច។ ដោយឡែកនៅទីក្រុងតេជោសែនរុនតាឯក មានទីតាំងចំណត នៅផ្សារតំបន់អភិវឌ្ឍន៍រុនតាឯក តាមពេលវេលា រួមមាន នៅម៉ៅង៥ព្រឹក ម៉ោង៦ព្រឹក ម៉ៅង៧ព្រឹក ម៉ោង៨ព្រឹក ម៉ោង១០ព្រឹក ម៉ោង១២ព្រឹក ម៉ៅង៤រសៀល ម៉ៅង៥ល្ងាចនិងម៉ោង៦ល្ងាច។
គួរកត់សម្គាល់ដែរថា ប្រជាពលរដ្ឋដែលបានចូលរួមប្រើប្រាស់សេវារថយន្តក្រុងដឹកជញ្ជូនសាធារណៈក្នុងថ្ងៃដំបូងនេះ បានបង្ហាញពីក្ដីសប្បាយចិត្ត ព្រោះសេវាដឹកជញ្ជូនសាធារណៈនេះមានភាពងាយស្រួល ជិះដោយឥតគិតថ្លៃ ដែលបានជួយកាត់បន្ថយការចំណាយប្រចាំក្នុងការធ្វើដំណើរ និងមានសុវត្ថិភាព៕
Account
Security
Favourite Content