សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីបរទេសបានរាយការណ៍ថា រដ្ឋមន្ត្រីការបរទេសនៃប្រទេស G7 បានជួបប្រជុំគ្នានៅប្រទេសកាណាដា កាលពីថ្ងៃព្រហស្បតិ៍ បន្ទាប់ពីមានភាពតានតឹងកើនឡើងរយៈពេល៧សប្តាហ៍ រវាងប្រធានាធិបតីសហរដ្ឋអាម៉េរិក Donald Trump និងសម្ព័ន្ធមិត្តរបស់ខ្លួនជុំវិញគោលនយោបាយការបរទេសរបស់លោកលើអ៊ុយក្រែន និងការដាក់ពន្ធគយ។
នៅថ្ងៃថ្ងៃព្រហស្បតិ៍ សប្ដាហ៍នេះ រដ្ឋមន្ត្រីការបរទេសមកពី ៧ ប្រទេសរួមមាន អង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន និងសហរដ្ឋអាម៉េរិក រួមជាមួយនឹងសហភាពអឺរ៉ុបបានជួបប្រជុំគ្នានៅទីក្រុង La Malbaie, ខេត្តកេប៊ិចនៃប្រទេសកាណាដា ដោយកិច្ចប្រជុំមានរយៈពេលពីរថ្ងៃ ដើម្បីពិភាក្សាលើបញ្ហាដែលពួកគេកំពុងប្រឈមមុខ។ របៀបវារៈកំពូលសម្រាប់កិច្ចប្រជុំរបស់រដ្ឋមន្ត្រីការបរទេស G7 គឺកិច្ចពិភាក្សាររវាងរដ្ឋមន្ត្រីការបរទេសអាម៉េរិក Marco Rubio ជាមួយនឹងទីក្រុងគីវនៅអារ៉ាប៊ីសាអូឌីតកាលពីថ្ងៃអង្គារ៍។ ក្នុងថ្ងៃដដែលនោះ អ៊ុយក្រែន បានលើកឡើងថា ខ្លួនត្រៀមខ្លួនជាស្រេចដើម្បីគាំទ្រកិច្ចព្រមព្រៀងបទឈប់បាញ់រយៈពេល ៣០ ថ្ងៃ។
យ៉ាងណាមិញ វាមានភាពតានតឹងក្នុងការរៀបចំសេចក្តីថ្លែងការណ៍ចុងក្រោយ ដែលត្រូវការមតិឯកច្ឆន្ទជាចាំបាច់។ ជាក់ស្តែង ការសម្រេចចិត្តរបស់សហរដ្ឋអាម៉េរិកក្នុងការដាក់ពន្ធ ២៥ ភាគរលើការនាំចូលដែកថែប និងអាលុយមីញ៉ូមទាំងអស់ពីបរទេស បានធ្វើឲ្យកាណាដា និងសហភាពអឺរ៉ុបដាក់ពន្ធសងសឹកទៅវិញភ្លាមៗ។ មិនត្រឹមតែប៉ុណ្ណោះ ទីក្រុងវ៉ាស៊ីនតោនត្រូវការភាសាការទូតច្បាស់លាស់ពីអ៊ុយក្រែន និងបង្កើនការប្រុងប្រយ័ត្នចំពោះការបែងចែកការអនុវត្តទណ្ឌកម្មប្រឆាំងនឹងរុស្ស៊ី ខណៈពេលដែលទាមទារភាសាការទូតរឹងមាំបន្ថែមទៀតលើប្រទេសចិន។
កាលពីថ្ងៃចន្ទ រដ្ឋមន្ត្រីការបរទេសអាម៉េរិក Marco Rubio បានព្រមានថា ទីក្រុងវ៉ាស៊ីនតោនមិនចង់បានភាសាការទូតដែលអាចបង្កគ្រោះថ្នាក់ដល់កិច្ចខិតខំប្រឹងប្រែងដើម្បីនាំរុស្ស៊ី និងអ៊ុយក្រែនមកកាន់តុចរចានោះទេ។ លោកសង្ឃឹមថា សេចក្តីថ្លែងការណ៍វិជ្ជមានរបស់ G7 នឹងទទួលស្គាល់ថា សហរដ្ឋអាម៉េរិកបានផ្លាស់ប្តូរដំណើរការដើម្បីបញ្ចប់សង្រ្គាម។ យ៉ាងណាមិញ ចាប់តាំងពីការវិលត្រឡប់មកវិញរបស់ Trump គេមើលឃើញថា សហរដ្ឋអាម៉េរិកប្រកាន់ជំហរមិនសូវស្និទ្ធស្នាលលើអ៊ុយក្រែននោះទេ ព្រមទាំងដាក់សម្ពាធឱ្យអឺរ៉ុបទទួលបន្ទុកបន្ថែមទៀតផង។ លើសពីនេះ Trump បានប្រើប្រាស់មន្ត្រីជាច្រើនដែលមិនមែនជាបុគ្គលិកក្រសួងការបរទេសចូលទៅក្នុងកិច្ចពិភាក្សាចាប់តាំងពីអ៊ុយក្រែនរហូតដល់ស្ថានភាពនៅមជ្ឈិមបូព៌ា ដែលធ្វើឲ្យសម្ព័ន្ធមិត្តបានព្រួយបារម្ភចំពោះសេចក្តីថ្លែងការណ៍ខុសឆ្គងណាមួយដែលអាចកើតឡើងពីទីក្រុងវ៉ាស៊ីនតោន។
មិនត្រឹមតែប៉ុណ្ណោះ ទំនាក់ទំនងរវាងសហរដ្ឋអាមេរិក និងកាណាដាកាន់តែមានភាពតានតឹងក្នុងប៉ុន្មានខែថ្មីៗនេះ ដោយសារការគំរាមកំហែងរបស់ Trump ក្នុងការដាក់ពន្ធលើការនាំចូលទាំងអស់ពីប្រទេសកាណាដា និងមហិច្ឆិតាគាត់ចង់ឲ្យប្រទេសនេះក្លាយជារដ្ឋទី ៥១ របស់សហរដ្ឋអាម៉េរិក។ ទោះបីជារដ្ឋមន្ត្រីការបរទេសអាម៉េរិក Marco Rubio អះអាងថា ពួកគេនឹងផ្តោតសំខាន់លើបញ្ហាទាំងអស់ក្នុងកិច្ចប្រជុំ G7 មិនមែនអំពីបញ្ហាដែលអាម៉េរិកនឹងកាន់កាប់ប្រទេសកាណាដានោះទេ ប៉ុន្តែកាណាដានៅតែសម្តែងការមិនពេញចិត្ត។ អ្នកស្រី Melanie Joly រដ្ឋមន្ត្រីការបរទេសកាណាដា លើកឡើងថា គាត់នឹងលើកឡើងពីបញ្ហាពន្ធដារនៅក្នុងកិច្ចប្រជុំ ដើម្បីពិភាក្សារជាមួយខាងអឺរ៉ុប និងដាក់សម្ពាធទៅអាម៉េរិកវិញ៕
Account
Security
Favourite Content