បរទេស៖ យោងតាមប្រភពព័ត៌មានពី Investopedia បានរាយការណ៍ថា តម្លៃមាសបានឡើងថ្លៃដល់កម្រិតខ្ពស់​ជាង ៣ ៤០០ ដុល្លារ​ក្នុង​មួយ​អោន​ ដោយសារតែកើនឡើងនៃការព្រួយបារម្ភអំពីសង្គ្រាមពាណិជ្ជកម្មពិភពលោក ជាពិសេស អាមេរិក ជាមួយមហាយក្សចិន។

កាល​ពី​ថ្ងៃ​ចន្ទ មាសឡើងថ្លៃ ៣% មានតម្លៃ  ៣ ៤៣០ ដុល្លារ​ក្នុង​មួយ​អោន (នៅទីផ្សារកម្ពុជា មាសមានតម្លៃ ៤ ១៤៨ ដុល្លារក្នុងមួយតម្លឹង និង ៤១៤ ដុល្លារក្នុងមួយជី)។ បើគិតចាប់តាំងពីដើមឆ្នាំ ២០២៥ នេះ តម្លៃមាសឡើងថ្លៃជិត ៣០% ។ ទន្ទឹមនឹងនេះ ការព្រួយបារម្ភអំពីគោលនយោបាយពន្ធគយដែលមិនអាចទាយទុកជាមុនបានរបស់ប្រធានាធិបតី Trump បង្កឱ្យមានភាពមិនច្បាស់លាស់ខាងសេដ្ឋកិច្ចដល់កម្រិតខ្ពស់បំផុតក្នុងរយៈពេលប៉ុន្មានឆ្នាំមកនេះ ធ្វើឲ្យអ្នកវិនិយោគសម្រុកទៅរកទ្រព្យសម្បត្តិដែលមានសុវត្ថិភាពដូចជា មាស។ ហាងឆេងមាសដែលគេហៅថា ETFs ទទួលបានលំហូរចូលដល់ទៅ ២១ ពាន់លានដុល្លារនៅក្នុងត្រីមាសទីមួយនៃឆ្នាំ២០២៥ ដែលជាលំហូរចូលប្រចាំត្រីមាសដ៏ធំបំផុតទីពីរនៅក្នុងកំណត់ត្រា។

មិនត្រឹមតែប៉ុណ្ណោះ គេព្យាករណ៍ថា តម្លៃមាសនឹងបន្តឡើងថ្លៃបន្ថែមទៀតដោយសារភាពវឹកវរនៅក្នុងទីផ្សារភាគហ៊ុន និងសញ្ញាប័ណ្ណ ខណៈដែលជាង ៤០% នៃអ្នកគ្រប់គ្រងមូលនិធិអះអាងថា មាសគឺជាទ្រព្យសម្បត្តិដែលមានតម្លៃ និងដំណើរការល្អបំផុតប្រចាំឆ្នាំ។ ស្របពេលដែលសេដ្ឋកិច្ចពិភពលោកកំពុងមានភាពមិនច្បាស់លាស់ មាសគឺជាទ្រព្យសម្បត្តិដែលមានតម្លៃ និងសុវត្ថិភាពបំផុត។ ជាក់ស្តែងក្នុងរយៈពេលប៉ុន្មានខែនេះ ភាពមិនប្រាកដប្រជានៃពាណិជ្ជកម្ម និងសង្គ្រាមពន្ធកំពុងជំរុញមាសឲ្យកាន់តែឡើងថ្លៃ។ កាលពីដើមខែនេះ អាម៉េរិកបានពន្យារពេលយកពន្ធតបតឲ្យមានភាពស្មើរគ្នារយៈពេល ៩០ ថ្ងៃ ដើម្បីទុកពេលឲ្យប្រទេសទាំអនោះចរចារ ប៉ុន្តែបានដំឡើងពន្ធ ១៤៥% លើទំនិញរបស់ចិន។ កាលពីថ្ងៃចន្ទ ចិនព្រមានថា ខ្លួននឹងសងសឹកប្រឆាំងនឹងប្រទេសណាមួយដែលឈានដល់កិច្ចព្រមព្រៀងពាណិជ្ជកម្មជាមួយសហរដ្ឋអាម៉េរិកដែលប៉ះពាល់ដល់ផលប្រយោជន៍របស់ចិន។

លើសពីនេះ Trump បានវាយប្រហារតាមរយៈពាក្យសម្តីរបស់គាត់លើប្រធានធនាគារកណ្តាលអាម៉េរិក Jerome Powell ដើម្បីអំពាវនាវឱ្យមានការកាត់បន្ថយការប្រាក់ទុកជាមុន ដើម្បីការពារសេដ្ឋកិច្ចពីការធ្លាក់ចុះ។ Trump កំពុងខឹងសម្បារនឹងលោក Powell និងគំរាមដកតំណែងចេញ បន្ទាប់ពីគាត់លើកឡើងថា ពន្ធគយទំនងជាធ្វើឱ្យមានភាពស្មុគស្មាញដល់កិច្ចខិតខំប្រឹងប្រែងរបស់ធនាគារកណ្តាលក្នុងការទប់ទល់អតិផរណានិងលើកកម្ពស់ទីផ្សារការងារ។ ទន្ទឹមនឹងនេះ ទីប្រឹក្សាសេដ្ឋកិច្ចកំពូលរបស់សេតវិមាន លោក Kevin Hassett លើកឡើងថា រដ្ឋបាលកំពុងពិនិត្យមើលថាតើអាចដកតំណែងប្រធានធនាគារកណ្តាលអាម៉េរិកចេញ ឬអត់?