បរទេស៖ យោងតាមប្រភពពី FX Street បានលើកឡើងថា តម្លៃមាសបានឡើងថ្លៃជិត ២ ២០០ ដុល្លារក្នុងមួយអោននៅថ្ងៃចន្ទដើមសប្ដាហ៍នេះ បន្ទាប់ពីមានការរំពឹងថាធនាគារកណ្តាលអាម៉េរិកអាចនឹងចាប់ផ្តើមកាត់បន្ថយអត្រាការប្រាក់នៅចុងឆ្នាំនេះ។

ឥឡូវនេះ មាសមានតម្លៃ ២ ១៦៨ ដុល្លារក្នុងមួយអោន ខណៈកាលពីសប្តាហ៍មុន ធនាគារកណ្តាលអាម៉េរិកបានរក្សាអត្រាការប្រាក់គោលរបស់ខ្លួនមិនផ្លាស់ប្តូរសម្រាប់កិច្ចប្រជុំលើកទី ៥ ជាប់ៗគ្នានៅកម្រិត ៥,២៥ ភាគរយទៅ ៥,៥០ ភាគរយបន្ទាប់ពីកិច្ចប្រជុំខែមីនារបស់ខ្លួន។

​លោក Jerome Powell ប្រធានធនាគារកណ្តាលអាម៉េរិក លើកឡើងថា ធនាគារកណ្តាលកំពុងស្ថិតនៅលើផ្លូវសម្រាប់ការកាត់បន្ថយអត្រាការប្រាក់ចំនួន ៣ ក្នុងឆ្នាំ ២០២៤ ដែលជំរុញឱ្យមានតម្រូវការមាសពីវិនិយោគិនកាន់តែច្រើន និងការឡើងថ្លៃនៃតម្លៃមាស។

ការឡើងថ្លៃតម្លៃមាសបានចាប់ផ្តើមនៅពាក់កណ្តាលខែកុម្ភៈ ត្រូវបានគាំទ្រដោយការកើនឡើងជាបន្តបន្ទាប់ រួមមាន ការកើនឡើងនៃហានិភ័យភូមិសាស្ត្រនយោបាយ និងការកើនឡើងការទិញរបស់ធនាគារកណ្តាល។ ក្នុងខែមីនានេះផងដែរ មាសបានឡើងដល់កម្រិតខ្ពស់ថ្មីចំនួនប្រាំដងរួចទៅហើយ ដែលការកើនឡើងយ៉ាងឆាប់រហ័សរបស់វាកើតឡើងដោយសារភាពច្បាស់លាស់ជាច្រើន។ បន្ថែមពីនេះ អ្វីដែលជំរុញដល់ការឡើងថ្លៃតម្លៃមាសខ្លាំងជាងគេ គឺ​ការ​រំពឹង​ទុក​សម្រាប់​គោល​នយោបាយ​រូបិយវត្ថុ​​នៅ​អាម៉េរិក។

ទោះជាយ៉ាងណាក្តី មាសនៅតែទទួលបានអត្ថប្រយោជន៍កាន់តែច្រើននៅពេលដែលអត្រាការប្រាក់របស់សហរដ្ឋអាមេរិកធ្លាក់ចុះ ដោយសារតែមូលនិធិជួញដូររូបិយប័ណ្ណដែលគាំទ្រដោយមាសអាចបង្កើនឥទ្ធិពលរបស់ពួកគេ។  មិនត្រឹមតែប៉ុណ្ណោះ កត្តាហានិភ័យនៃភូមិសាស្ត្រនយោបាយមួយចំនួនក៏បានជំរុញតម្លៃមាសផងដែរដូចជា ជម្លោះរុស្ស៊ី-អ៊ុយក្រែន ជម្លោះអ៊ីស្រាអែល និងក្រុមហាម៉ាស់នៅតែបន្តមិនឈប់ឈរ ដែលនាំឱ្យអ្នកវិនិយោគងាកទៅរកមាស ដែលជាទ្រព្យសម្ប្តត្តិមានសុវត្ថិភាពសម្រាប់ហិរញ្ញវត្ថុពួកគេ។​ ទន្ទឹមនឹងនេះ ពួកគេទិញមាស និងគ្រឿងអលង្ការផ្សេងៗស្តុកទុក ដើម្បីការពារទ្រព្យសម្បត្តិរបស់ពួកគេពីការធ្លាក់ចុះនៃទ្រព្យសម្បត្តិ និងការខាតបង់ជាច្រើននៅក្នុងទីផ្សារភាគហ៊ុនរបស់ប្រទេស៕