ភ្នំពេញ ៖ យោងតាម​របាយការណ៍​​អគ្គនាយកដ្ឋាន​គយ និង​រដ្ឋាករ ​បាន​បង្ហាញថា ការ​ធ្វើ​ពាណិជ្ជកម្ម​របស់​កម្ពុជាជាមួយបណ្តា​ប្រទេសដែលជា​សមាជិក​អាស៊ាន ក្នុង​រយៈពេល ៨ ខែ​​នៃ​ឆ្នាំ២០២៤​ មានទំហំ​ទឹកប្រាក់ប្រមាណ ១០.៤៩ ពាន់​​លាន​ដុល្លារ​អាមេរិក ​កើនឡើង ១១.៨ ភាគរយ​ ខណៈដែលកាលពីឆ្នាំ២០២៣កន្លងទៅនេះ ក្នុងរយៈពេលដូចគ្នាមានទំហំត្រឹម ៩.៣៨ ពាន់​លាន​ដុល្លារ។ ជារួម ទំហំពាណិជ្ជកម្មកម្ពុជា-អាស៊ាន​ ស្មើនឹងប្រមាណ ២៨.៤ ភាគរយ​នៃ​ទំហំ​ពាណិជ្ជកម្ម​សរុបរបស់កម្ពុជា ដែលគិតជាទឹកប្រាក់ប្រមាណ ៣៦.៩ ពាន់​លាន​ដុល្លារ​។

នៅក្នុងរបាយ​ការណ៍ដដែល​​បាន​ឱ្យ​ដឹង​ថា គិតចាប់ពីខែមករា រហូតដល់ខែសីហា ឆ្នាំ២០២៤ ​ប្រទេសកម្ពុជា​បាន​នាំ​ចេញ​ផលិតផលចម្រុះ​ទៅ​កាន់​បណ្តាប្រទេស​ដែលជាសមាជិកអាស៊ាន​ មានទំហំទឹកប្រាក់ ​ប្រមាណ ៣.៤៣ ពាន់​លាន​ដុល្លារ ​កើន​ឡើង ១០ ភាគរយ​ ពី ៣.១១ ពាន់​លាន​ដុល្លារ​ក្នុង​រយៈពេល​ដូច​គ្នា​កាល​ពី​ឆ្នាំមុន ខណៈដែលការ​នាំ​ចូល​របស់​ប្រទេស​កម្ពុជា​ពី​ប្រទេស​ជា​សមាជិក​អាស៊ាន មាន​តម្លៃ ៧.០៦ ពាន់​លាន​ដុល្លារ កើន​ឡើង ១២.៥ ភាគរយ​ ពី ៦.២៧ ពាន់​លាន​ដុល្លារក្នុងរយៈពេលដូចគ្នាកាលពីឆ្នាំ២០២៣។

របាយ​ការណ៍​​នេះ​បាន​បញ្ជាក់​ថា​ ក្នុង​អំឡុងពេល​ប្រាំបី​ខែ​​នៃ​ឆ្នាំនេះ ទំហំ​ពាណិជ្ជ​កម្ម​​​ប្រទេស​កម្ពុជា​ជាមួយ​អាស៊ាន​មាន​​ចំនួន ​២៨.៤ ភាគរយ​នៃ​ទំហំ​ពាណិជ្ជកម្ម​សរុប ៣៦.៩ ពាន់​លាន​ដុល្លារ​ ហើយដៃគូ​ពាណិជ្ជកម្ម​កំពូល​ទាំង​ប្រាំ​របស់​ប្រទេស​ក្នុង​អាស៊ាន​គឺ វៀតណាម ថៃ សិង្ហ​បុរី ឥណ្ឌូនេស៊ី និង​ម៉ាឡេស៊ី។

ដោយឡែកក្នុងទំនាក់ទំនង​ដៃគូពាណិជ្ជកម្មដ៏សំខាន់របស់អាស៊ាននេះដែរ គឺប្រទេសចិន ហើយប្រទេសកម្ពុជាដែលចូលរួមក្នុងពិព័រណ៌ចិន-អាស៊ានលើកទី២១ (ថ្ងៃទី២៤-២៨ ខែកញ្ញា) នៅទីក្រុងណាននីង តំបន់ស្វយ័តក្វាងស៊ី ក្នុងគោលដៅជំរុញឱ្យពាណិជ្ជករ និងអ្នកវិនិយោគលើកកម្ពស់ការនាំចេញកសិផលកម្ពុជាបន្ថែមទៀត ដើម្បីលើកស្ទួយជីវភាពកសិករ។

ពិព័រណ៍ចិន-អាស៊ាន លើកទី២១ គឺជាវេទិកាដ៏សំខាន់សម្រាប់មេដឹកនាំអាស៊ាន ដើម្បីជំរុញពាណិជ្ជកម្ម សេដ្ឋកិច្ច ការវិនិយោគ ទេសចរណ៍ ទំនាក់ទំនងនយោបាយ ការទូត ការផ្លាស់ប្តូរវប្បធម៌រវាងប្រជាជន និងប្រជាជន និងកិច្ចសហប្រតិបត្តិការតំបន់ទូលំទូលាយរវាងចិន និងអាស៊ាន និងក៏ជាឱកាស ដ៏ល្អមួយសម្រាប់ការប្រាស្រ័យទាក់ទងគ្នា ធ្វើពាណិជ្ជកម្ម និងវិនិយោគក្នុងនាមដៃគូពាណិជ្ជកម្ម ក៏ដូចជាផ្សព្វផ្សាយផលិតផលកម្ពុជានៅក្នុងទីផ្សារអាស៊ាន ជាពិសេសប្រទេសចិន។

ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ដែលដឹកនាំប្រតិភូ និងបានកាត់ខ្សែបូស្តង់ទំនិញកម្ពុជាក្នុងពិព័រណ៌ចិន-អាស៊ានលើកទី២១ បានកោតសរសើរដល់ក្រុមការងារគ្រប់ក្រសួង ស្ថាប័ន និងអាជីវករទាំងអស់ ដែលបានខិតខំប្រឹងប្រែងរៀបចំ និងនាំយកផលិតផលកម្ពុជាមកផ្សព្វផ្សាយជូនសាធារណជនក្នុងពិព័រណ៍ចិន-អាស៊ាននេ

ឯកឧត្តម វង្សី វិស្សុត បានគូសបញ្ជាក់ថា៖ «ពិព័រណ៍ចិន-អាស៊ានបានក្លាយជាវេទិកាដ៏សំខាន់មួយសម្រាប់ការលើកកម្ពស់បន្ថែមទៀតនៃសកលភាវូបនីយកម្ម និងសេរីភាវូបនីយកម្មពាណិជ្ជកម្ម ហើយកិច្ចខិតខំប្រឹងប្រែងរបស់ប្រទេសសមាជិក និងកិច្ចសហប្រតិបត្តិការផ្សេងទៀតកំពុងបន្តជំរុញការអភិវឌ្ឍក្នុងតំបន់ ហើយបានក្លាយជាផ្នែកសំខាន់នៃកិច្ចខិត​ខំប្រឹងប្រែងរួមគ្នាដើម្បី ស្វែងរកការអភិវឌ្ឍ និងវិបុលភាព»។

ឯកឧត្តម បានបន្តទៀតថា រាជរដ្ឋាភិបាលកម្ពុជា ក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត បានអនុវត្តយុទ្ធសាស្ត្របញ្ចកោណដំណាក់កាលទី១ ដោយកំណត់ទិសដៅកសាងប្រទេសឱ្យរស់រវើក ដែលអាចជឿទុកចិត្តបាន និងក្របខ័ណ្ឌច្បាប់ដ៏រឹងមាំ ការកសាងធនធានមនុស្សដ៏ ហេដ្ឋារចនាសម្ព័ន្ធទំនើប ការកសាងបណ្តាញដ៏ធំទូលាយ និងភាពជាដៃគូអាជីវកម្ម ព្រមទាំងបង្កើតបរិយាកាសធុរកិច្ច និងវិនិយោគអំណោយផលសម្រាប់ពាណិជ្ជករ និងអ្នកវិនិយោគមកពីគ្រប់ទិសទី។

សូមបញ្ជាក់ថា សមាជិក​របស់ អាស៊ាន ឬ​សមាគម​ប្រជាជាតិ​អាស៊ីអាគ្នេយ៍ រួមមាន​ប្រទេស ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មី​យ៉ាន់​ម៉ា ហ្វីលីពីន សិង្ហ​បុរី ថៃ និង​វៀតណាម។

ក្រសួងពាណិជ្ជកម្ម បានសម្របសម្រួលស្តង់ពាណិជ្ជចំនួន ៨៩ សម្រាប់ពិព័រណ៍ចិន-អាស៊ាន ដែលមានក្រុមហ៊ុន និងសមាគមចំនួន ៥៨ បានចូលរួម ដោយដាក់តាំងបង្ហាញផលិតផលសម្គាល់ភូមិសាស្ត្រ ផលិតផលកសិកម្ម ផលិតផលឧស្សាហកម្ម វាយនភ័ណ្ឌ សូត្រ គ្រឿងអលង្ការ ការវិនិយោគ និងសេវាកម្មទេសចរណ៍ និងបានរៀបចំទីតាំងរួមទំហំ៥៤ ម៉ែត្រការ៉េ ដើម្បីបង្ហាញផលិតផលកម្ពុជាដែលមានសក្តានុពលជាមួយនឹងការវេចខ្ចប់ដ៏ប្រណិតសម្រាប់អ្នកទស្សនា និងផ្សព្វផ្សាយពីគេហទំព័រ CambodiaTrade.com ៕