សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បាត់ដំបង៖ សភាពាណិជ្ជកម្មកម្ពុជា មជ្ឈមណ្ឌលអភិវឌ្ឍធុរកិច្ច (BDC) និងសភាពាណិជ្ជកម្មខេត្តបាត់ដំបង សហការជាមួយក្រសួងពាណិជ្ជកម្ម និងមូលនិធិអភិវឌ្ឍន៍ជំនាញ (SDF) បានរៀបចំសិក្ខាសាលាស្តីពី «អត្ថប្រយោជន៍នៃការប្រើប្រាស់ស្លាកសញ្ញាស្តង់ដារសម្រាប់ផលិតផល និងប្រព័ន្ធផលិតកម្ម» ក្រោមការគាំទ្រពីសហគ្រិនខ្មែរ(KE) ។
សិក្ខាសាលានាថ្ងៃទី ២៣ ខែមេសា ឆ្នាំ២០២៥ នៅសណ្ឋាគារស្ទឹងសង្កែ ខេត្តបាត់ដំបងនេះ មានគោលបំណងលើកកម្ពស់គុណភាព និងសុវត្ថិភាពផលិតផល ជំរុញការប្រកួតប្រជែង និងពង្រីកទីផ្សារ ក៏ដូចជាបញ្ជ្រាបការយល់ដឹងឱ្យកាន់តែទូលំទូលាយពីអត្ថប្រយោជន៍នៃការប្រើប្រាស់ស្លាកសញ្ញាស្តង់ដារលើផលិតផល និងប្រព័ន្ធផលិតកម្ម ដើម្បីបង្កើនទំនុកចិត្តពីអតិថិជន និងរក្សាបានចីរភាពលើទីផ្សារសម្រាប់ម្ចាស់សហគ្រាសនានា។
ឯកឧត្តម ផេង សិទ្ធី អភិបាលរងខេត្តបាត់ដំបង និងអ្នកឧកញ៉ា ភួ វាសនា ប្រធានសភាពាណិជ្ជកម្មខេត្តបាត់ដំបង ព្រមទាំងអនុប្រធាន សមាជិក-សមាជិកា សភាពាណិជ្ជកម្មខេត្តពោធិ៍សាត់ សភាពាណិជ្ជកម្មមណ្ឌលខេត្តកំពង់ធំ-ព្រះវិហារ សភាពាណិជ្ជកម្មខេត្តប៉ៃលិន សភាពាណិជ្ជកម្មខេត្តបន្ទាយមានជ័យ មន្ទីរស្ថាប័នពាក់ព័ន្ធ ពាណិជ្ជករ អាជីវករ សិប្បករ និងសិស្ស-និស្សិត ប្រមាណ១២០នាក់បានចូលរួមក្នុងងសិក្ខាសាលានេះ។
ឯកឧត្តម អភិបាលរងខេត្តបានថ្លែងថា៖ ស្ដង់ដារ គឺជាឧបករណ៍ក្នុងការវាស់វែងផលិតផលមួយ អំពីសុវត្ថិភាព និងគុណភាពសម្រាប់អ្នកបរិភោគបាន នោះគឺជាទីផ្សារដ៏សំខាន់ ដូច្នេះម្ចាស់សហគ្រាស សិប្បកម្មទាំងអស់ត្រូវគិតអំពីស្តង់ដារលើផលិតផលនិងប្រព័ន្ធផលិតកម្មរបស់ខ្លួនឱ្យបានល្អ ដើម្បីប្រយោជន៍បានយូរអង្វែង។
ដោយឡែក អ្នកឧកញ៉ា ភួ វាសនា បានលើកឡើងពីសារៈសំខាន់នៃស្លាកសញ្ញាស្តង់ដារក្នុងការកសាងទំនុកចិត្តរបស់អ្នកប្រើប្រាស់ និងធានាគុណភាពផលិតផល ជាពិសេសផលិតផលដែលមានបំណងនាំចេញទៅកាន់ទីផ្សារក្រៅស្រុក។
អ្នកឧកញ៉ា ភួ វាសនា បានបន្តថា ៖ ស្លាកសញ្ញាស្តង់ដារ ក្រៅពីបានបង្ហាញ និងបញ្ជាក់ពីម៉ាក គុណភាព និងប្រភពផលិត – នាំចេញ ថែមទាំងបានផ្សព្វផ្សាយពីកម្ពុជា ដែលជាប្រទេសមានសក្ដានុពលក្នុងវិស័យកសិកម្ម ឧស្សាហកម្ម ដើម្បីអាចទាក់ទាញអ្នកវិនិយោគពីបរទេសមកកាន់កម្ពុជាបន្ថែមទៀត។
ក្រៅពីនេះ អ្នកឧកញ៉ាក៏បានសង្កត់ធ្ងន់ទៅលើគុណប្រយោជន៍នៃអង្គសិក្ខាសាលាដែលបានផ្តល់នូវសារៈសំខាន់យ៉ាងចាំបាច់ជូនដល់អ្នកចូលរួម អាចឈ្វេងយល់កាន់តែស៊ីជម្រៅអំពីនិតីវិធី និងអត្ថប្រយោជន៍នៃការប្រើប្រាស់ស្លាកសញ្ញាស្ដង់ដារសម្រាប់ផលិតផល និងប្រព័ន្ធផលិតកម្ម ដែលបានពន្យល់យ៉ាងក្បោះក្បាយលម្អិតពីមន្រ្ដីជំនាញមកពីវិទ្យាស្ថានស្ដង់ដារ នៃក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្តន៍៕
Account
Security
Favourite Content