ភ្នំពេញ ៖ រហូតមកដល់ពេលនេះ ​អចលនទ្រព្យ​នៅតែជា​វិស័យមួយ​​ដែលពេញ​និយម​សម្រាប់​អ្នកវិ​និយោ​គ ប៉ុន្តែ​នៅក្នុងកាលៈទេសៈ​នេះដែរ ការ​លក់​អចលនទ្រព្យ​មិនសូវជាទទួលបាន​នូវផលចំណេញនោះទេ។ អាស្រ័យដូចនេះ លោក ​សន សៀប ប្រធាន​សមាគម​អ្នកវាយ​តម្លៃ និងភ្នាក់ងារ​អចលវត្ថុ​កម្ពុជា បានចែករំលែក​នូវ​បទ​ពិ​សោ​ធន៍ និងពេលវេលា​ដែលល្អសម្រាប់​លក់​អចលនទ្រព្យឱ្យ​ទទួល​បានប្រាក់​ចំណេញខ្ពស់ ។

លោក សន សៀប បានមានប្រសាសន៍ថា​ ជាទូទៅ​អ្នកមានអចលនទ្រព្យ​ដាក់លក់​ប្រាកដ​ណាស់ច្បាស់​ជា​ចង់​​បានតម្លៃខ្ពស់ ហើយ​អ្នក​ទិញអចលនទ្រព្យ​វិញ ចង់ទិញអចលនទ្រព្យ​ដែល​មានតម្លៃក្រោមទីផ្សារ​ និងស្ថិត​នៅទីតាំង​ល្អៗ​ ដូច្នេះនេះ រឿងពីរ២នេះ គឺមិនស្រ​បគ្នា​ទេ ។​

លោកបន្តថា ៖ ទ្រឹស្ដីទិញលក់ គេនិយាយថា ទិញ​នៅពេល​មានអ្នកលក់ ចំណែកលក់ គឺនៅពេល​មានអ្នកទិញ ទើប​ធ្វើឱ្យការ​លក់ ​និងការទិញត្រូវ​រ៉ូវគ្នា និង​ទទួលបានផល​ចំណេញទាំងសងខាង។ ការលក់​អ​ចល​ន​ទ្រ​ព្យ​​នៅពេល​ដែល​មានអ្នកទិញ គឺ​នឹងទទួល​បានផល​ចំណេញខ្ពស់ ពីព្រោះថា​នៅពេល​មាន​អ្ន​ក​ណាច​ង់​ទិ​ញ​អ​​ចល​នទ្រព្យ​ ​គេ​ប្រាកដ​ណាស់​នឹងផ្តល់​តម្លៃខ្ពស់​ ព្រោះគេ​ត្រូវការ​អចល​នទ្រព្យ​សម្រាប់ប្រើ​ប្រា​ស់​ក្នុងតម្រូវការ​ចាំបាច់របស់គេ។ ដោយឡែក នៅពេលគេចង់បាន​អចលនទ្រព្យ​ ទោះតម្លៃរាង​ខ្ពស់​បន្តិច​ក៏គេ​ហ៊ានឱ្យដែរ ដូច្នេះ​ការលក់អចលនទ្រព្យ​នៅពេល​មានតម្រូវការ​នឹង​ទទួលបានផល​ចំណេញ​ខ្ពស់។​

លោកបន្ថែមថា ចំណែកការទិញ​អចលនទ្រព្យវិញ គឺទិញ​នៅពេល​មានអ្នក​ចង់លក់​​ហើយនៅទីតាំង​ល្អ ។​ នៅពេល​ដែល​ចង់​លក់​កាន់តែខ្លាំង តម្លៃអចលនទ្រព្យ​នោះ​នឹងអាច​ទាបជាង​ទីផ្សារ​ជាក់ស្ដែង​ ហើយអាច​រក​បាននៅទីទាំង​ល្អ ដែលអាច​នឹងមានឱកាស​ឡើងថ្លៃនៅពេលអនាគតផងដែរ។ ក្នុ​ងស្ថានភាព​បច្ចុប្បន្ន​នេះ គឺជា​ឱកាស​ល្អស​ម្រាប់អ្នកមានលុយ​ក្នុ​ងកា​រប្រមូលទិញ​អចលនទ្រព្យក្រោមទីផ្សារ និងអាច​រក​ប្រាក់ចំណេញ​មក​វិញនៅពេល​ស្ថានភាពសេដ្ឋកិច្ច​បានប្រសើរឡើង ។

លោក​បន្ថែមទៀតថា ៖ គ្រប់អចលនទ្រព្យ​ទាំងអស់​មិនប្រាកដថាអាច​ទិញ​បានក្នុង​តម្លៃធូរ​នាពេល​នេះ និង​លក់​បានតម្លៃខ្ពស់ទាំងអស់​នៅពេលខាងមុខ​នោះទេ ​។​ អចលនទ្រព្យ​​ទិញ​បានក្នុងតម្លៃធូរ ហើយលក់​វិញនៅពេល​អនាគតក្នុងតម្លៃខ្ពស់​ តែអចលនទ្រព្យ​ខ្លះ​ទិញ​ក្នុងតម្លៃធូរ រយៈពេល​ ៣ – ៤​ ​ឆ្នំាហើយ​ក៏នៅ​តែ​មិន​ឡើង​ថ្លៃដែរ ។​ សរុប​សេចក្ដី ក្នុងវិបត្តិគឺជាឱកាស​ក្នុងការ​ទិញអចលនទ្រព្យ  តែវាមិនល្អសម្រាប់អ្នក​ត្រូ​វ​ការ​លក់​អចលនទ្រព្យ ពីព្រោះក្នុងស្ថានភាព​ដែលវិបត្តិ​មានអ្នកលក់​អចលនទ្រព្យ​ក្រោម​ទីផ្សារ​មានច្រើន​ជាង​អ្នក​ទិញ ដូច្នេះហើយ​ក្នុងស្ថានភាពបែបនេះ គឺល្អសម្រាបទិញ​តែមិនសូវ​ល្អសម្រាប់ការលក់។​

អ្នក​នាង​ អាន សុធីតា នាយិកា​ប្រតិបត្តិ​ ក្រុមហ៊ុន​អចលនទ្រព្យ PropNex Cambodia ក៏បានលើកឡើងផងដែរថា​ ក្នុងស្ថានភាពណា​ក៏ដោយ​ បើអចលនទ្រព្យ​ដែលទិញរយៈពេល​ ៤ទៅ៥ឆ្នាំហើយ តែនៅតែមិនអាច​ឡើង​ថ្លៃ​បាន មិនគួរទុកទ្រព្យ​នោះឱ្យ​ទំនេរទេ គួ​រលក់​វា​ចេញហើយយកលុយ​ទៅរកទិញ​អចលនទ្រព្យ​ផ្សេង​នៅ​ទីតាំ​ង​​ផ្សេ​​ងដើម្បីបង្កើនទ្រព្យបន្ត​ទៀត ដោយមិនគួរ​ខាត​ពេល​ដោយទ្រព្យ​មិនកើននោះឡើយ  ។

ក្រៅពីនេះ មានអ្នកជំនាញ​នៃវិស័យអចលនទ្រព្យខ្លះទៀត​ក៏បាន​ផ្ដល់ជាយោបល់ថា សម្រាប់អ្នកចង់ទិញ​អចលនទ្រព្យ​នាពេ​ល​បច្ចុប្បន្ន​នេះ បើ​អចលនទ្រព្យ​នោះលក់​មិនក្រោមតម្លៃទីផ្សារទេមិនគួរទិញនោះឡើយ ហើយតម្លៃក្រោមទីផ្សារ​ប្រមាណពី៣០​ទៅ​៥០​ឆ្នាំ​ចាំទិញ បើលក់​ក្នុងតម្លៃទីផ្សារ​វាមានឱកាស​តិច​ណាស់​ក្នុងការ​ឡើង​ថ្លៃនាពេល​ខាងមុខ និងត្រូវការពេលវវេលា​យូរ​ដើម្បីទទួល​បានប្រាក់​ចំណេញ ៕