ភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់ប្រជាកសិករនៅទូទាំងប្រទេសកម្ពុជា គួរជ្រើសរើសពូជស្រូវជាតិចំនួន ២ប្រភេទ គឺ ស្រូវផ្ការំដួល និងសែនក្រអូប សម្រាប់ធ្វើការដាំដុះ ដោយសារពូជស្រូវទាំងនេះមានតម្រូវការទីផ្សារសម្រាប់ការនាំចេញខ្ពស់ និងមានតម្លៃសមរម្យ។

 ឯកឧត្តមបណ្ឌិត យ៉ង សាំងកុមារ រដ្ឋលេខាធិការ ​ក្រសួង​កសិកម្ម រុក្ខាប្រមាញ់ និងនេសាទ បានជំរុញឱ្យកសិករជ្រើសរើសពូជស្រូវផ្ការំដួល និងសែនក្រអូប សម្រាប់ដាំដុះ ដើម្បីទទួលបានទិន្នផលខ្ពស់ស្របតាមតម្រូវការទីផ្សារ ទាំងក្នុងស្រុក និងសម្រាប់ការនាំចេញក្រៅប្រទេស។ ជាមួយគ្នានេះ ការប្រើប្រាស់គ្រាប់ពូជស្រូវដែលមានប្រភពច្បាស់លាស់អាចជួយដល់ផលិតកម្មឱ្យមានភាពល្អប្រសើរ និងមានតម្រូវការ ព្រមទាំងតម្លៃនៅលើទីផ្សារមានភាពសមរម្យ។

ឯកឧត្តមបណ្ឌិត យ៉ង សាំងកុមារ បានមានប្រសាសន៍ថា ៖

«ការដែលប្រជាកសិករជ្រើសរើសពូជស្រូវផ្ការំដួល និងសែនក្រអូប ដែលជាពូជជាតិរបស់យើង ដើម្បីធ្វើការផលិត ផ្សារភ្ជាប់ នឹងទីផ្សារ ។ ពូជផ្ការំដួល និងសែនក្រអូបទាំង២នេះ មានតម្រូវការទីផ្សារខ្ពស់ ជាពិសេសរោងម៉ាស៊ីនក្នុងស្រុកមានតម្រូវការពូជទាំង២ ដើម្បីធ្វើការកែច្នៃជាអង្ករនាំចេញទៅក្រៅប្រទេស ហើយបងប្អូនប្រជាកសិករអាចលក់ស្រូវទាំងនោះទទួលបានតម្លៃសមរម្យ និងមានស្ថិរភាពតម្លៃផងដែរ»។

គួររំលឹកថា ជាការចូលរួមលើកកម្ពស់ការផលិតស្រូវដែលកំពុងមានតម្រូវការទីផ្សារ កាលពីថ្ងៃទី៩ ខែ សីហា២០២៤  មន្ត្រីកសិកម្មឃុំទាំងអស់នៅក្នុងខេត្តកំពង់ធំ បានសហការគ្នាចូលរួមជួយស្ទូងស្រូវប្រជាកសិករដែលជាសមាជិកសហគមន៍កសិកម្ម សម្រាប់ផលិតគ្រាប់ពូជនៅឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ក្រោមការដឹកនាំ និងរៀបចំដោយប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ លើផ្ទៃដីចំនួន ៦០អារ ប្រភេទពូជស្រូវផ្ការំដួល។

សូមបញ្ជាក់ថា ផលិតកម្មស្រូវបានកើនឡើងខ្លាំងក្នុងរយៈពេលជាង១០ ឆ្នាំចុងក្រោយនេះតាមរយៈការបង្កើនទិន្នផល និងកំណើនផ្ទៃដីដាំដុះបាន២ ទៅ ៣ដង ។ កម្ពុជាក៏បានជាប់ជាប្រទេសសំខាន់មួយនៅលេខរៀងទី៩ ក្នុងការចូលរួមធានាសន្តិសុខស្បៀងពិភពលោក តាមរយៈការផលិតស្រូវបានជាង ១២លានតោនក្នុងមួយឆ្នាំ៕